သျှမ်းပြည် နောင်ချိုမြို့နယ်တွင် စစ်ကောင်စီတပ်၏ တစ်ခုတည်းကျန်ရှိသည့် အမြောက်တပ် (ဒုံးတပ်) ၆၀၆ ကို တအာင်း(ပလောင်) အမျိုးသားလွတ်မြောက်ရေးတပ်မတော် TNLA ၊ DPLA နှင့် PDF ပူးပေါင်းတပ်ဖွဲ့များမှ ဆက်လက်ထိုးစစ်ဆင် တိုက်ခိုက်နေကြောင်း စုံစမ်းသိရသည်။

နောင်ချိုမြို့နယ် အတွင်းရှိ စစ်ကောင်စီလက်အောက်ခံ တပ်စခန်းများကို TNLA ၊ DPLA နှင့် MDY-PDF ပူးပေါင်းတပ်ဖွဲ့များက ဇွန်လ ၂၅ ရက်မှ စတင်ထိုးစစ်ဆင် တိုက်ခိုက်ခဲ့ရာ ခလရ-၁၁၄/၁၁၅ တပ်ရင်းနှင့် မြို့ပေါ်ရှိ အထင်ကရ ဌာနဆိုင်ရာများကို ထိန်းချုပ်ထားနိုင်ပြီး တစ်ခုတည်းကျန်ရှိသည့် အမြောက်တပ်(ဒုံးတပ်) ၆၀၆ ကို ဆက်လက်တိုက်ခိုက်နေပြီး တိုက်ပွဲပြင်းထန်ကြောင်း နောင်ချိုဒေသခံများက ပြောသည်။

“မနေ့ညအထိ ဒုံးတပ်ဘက်ကို လေယာဉ်နဲ့ ၃ ခါ ဗုံးလာကြဲသေးတာ။ မြို့ထဲက စာသင်ကျောင်းမှာ တစ်ခါ ဗုံးကြဲသွားတယ်။ ဒီနေ့လည်း အဲ့ဘက်ကို လေယာဉ်ဝဲနေတာ ရှိတယ်၊ အပေါ်ကနေ ပစ်နေတာတော့ မရှိသေးဘူး။ အတွင်းထဲကနေတော့ လက်နက်ကြီးနဲ့ သေနတ်သံ ကြားနေရသေးတယ်၊ မြို့ပေါ်မှာတော့ ငြိမ်နေတယ်”ဟု နောင်ချိုမြို့နယ်မှ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။

အလားတူ နောင်ချိုမြို့နယ်တွင် တိုက်ပွဲဖြစ်ပွားလျက်ရှိသော အမြောက်တပ် (ဒုံးတပ်) ၆၀၆ အနီးတဝိုက်သို့ စစ်ကောင်စီတပ်မှ Y-12 ရဟတ်ယာဉ်ဖြင့် (၈) ကြိမ်၊ ဂျက်ဖိုက်တာ လေယာဉ်ဖြင့် နောင်ချိုမြို့တွင်းရှိ စာသင်ကျောင်းသို့ (၁) ကြိမ် လေကြောင်းတိုက်ခိုက်မှု ပြုလုပ်ခဲ့ကြောင်း TNLA သတင်းနှင့် ပြန်ကြားရေးဌာနက ယမန်နေ့ (ဇူလိုင် ၈ ရက်)တွင် သတင်းထုတ်ပြန်သည်။

ပြီးခဲ့သည့် ဇူလိုင်လ ၅/၆ ရက်နေ့တို့တွင် ကျောက်မဲနှင့် နောင်ချိုမြို့အကြားရှိ နောင်ပိန်ဂုတ်တွင်းတွင် စစ်ကောင်စီတပ်နှင့် TNLA ၊ PDF ပူးပေါင်းတပ်ဖွဲ့တို့ ထိတွေ့တိုက်ပွဲ အပြင်းအထန် ဖြစ်ပွားခဲ့ပြီး မန္တလေး-လားရှိုး ရထားလမ်းပေါ် ဂုတ်ထိပ်တံတားအနီး စစ်ကောင်စီတပ်စခန်းငယ်ကို ထိန်းချုပ်လိုက်နိုင်ကြောင်း နောင်ချိုဒေသခံများထံမှ သိရသည်။

၎င်းနောက်တွင် နောင်ချိုမြို့နယ် ဂုတ်ထိပ်အနီးသို့ စစ်ကောင်စီတပ်မှ လေကြောင်းပစ်ကူဖြင့် အပြင်းအထန် ခုခံတိုက်ခိုက်ခဲ့ပြီး ဇူလိုင်လ ၆ ရက် တစ်ရက်တည်းတွင် ဂျက်ဖိုက်တာဖြင့် (၁၀) ကြိမ်၊ Y-12 ရဟတ်ယာဉ်ဖြင့် ဗုံး(၅၀)လုံး လေကြောင်းတိုက်ခိုက်မှု ပြုလုပ်ခဲ့ကြောင်း TNLA ဘက်မှ ထုတ်ပြန်သည်။

လက်ရှိတွင် နောင်ချိုမြို့နယ်အတွင်း စစ်ကောင်စီ၏ တစ်ခုတည်းကျန်ရှိသည့် အမြောက်တပ် (ဒုံးတပ်) ၆၀၆ ကို TNLA တပ်ဖွဲ့နှင့် မန္တလေး-PDF တပ်ဖွဲ့၊ ဓနုပြည်သူ့လွတ်မြောက်ရေးတပ်မတော် DPLA ၊ ကျောက်မဲခရိုင် အထူးတိုက်ခိုက်ရေးတပ် ပူးပေါင်းတပ်ဖွဲ့တို့က ဆက်လက်ထိုးစစ်ဆင် တိုက်ခိုက်လျက်ရှိပြီး တိုက်ပွဲပြင်းထန်စွာ ဖြစ်ပွားလျက်ရှိကြောင်း ဒေသခံများက ပြောသည်။

ဇူလိုင်လ ၄ ရက်တွင် နောင်ချိုမြို့နယ်အတွင်း နောက်ဆုံးကျန်ရှိသည့် အမြောက်တပ်-၆၀၆ ကို TNLA နှင့် PDF ပူးပေါင်းတပ်များက တိုက်ခိုက်နေစဉ် စစ်ကောင်စီတပ်မှ အဆိပ်ငွေ့ဗုံး (၃) လုံး အသုံးပြုတိုက်ခိုက်ခဲ့ကြောင်း TNLA သတင်းနှင့်ပြန်ကြားရေးဌာန ထုတ်ပြန်ချက်အရ သိရသည်။