သျှမ်းပြည် နမ့်ခမ်းမြို့နယ်တွင် သတ္တုတင်ဆောင်လာသည့် ကားမှ ကျောင်းသူ (၂) ဦးကို တိုက်မိခဲ့ရာ တစ်ဦး ပွဲချင်းပြီး သေဆုံး၍ ၁ဦး ဒဏ်ရာပြင်းထန်ကြောင်း စုံစမ်းသိရသည်။

ယနေ့ (ဇူလိုင် ၈ ရက်) နံနက်ပိုင်းတွင် နမ့်ခမ်းမြို့နယ် နောင်တိန်ကျေးရွာတွင် သတ္တုတင်ဆောင်လာသော ကားကြီးသည် တရုတ်ကျောင်းမှ ပြန်လာသည့် ကျောင်းသူ နှစ်ဦးကို တိုက်မိကာ အသက် (၁၂) နှစ်အရွယ်ရှိ ကျောင်းသူတစ်ဦး ထိုနေရာတွင် ပွဲချင်းပြီးသေဆုံး၍ အခြားကျောင်းသူတစ်ဦးမှာ ဒဏ်ရာပြင်းထန်ကြောင်း နမ့်ခမ်းဒေသခံများက ပြောသည်။

“ကလေးငယ် ၁၂ နှစ်က သူ့အမ ချက်ချင်းပဲ ပွဲချင်းပြီး ဆုံးသွားတာ။ ကလေးတွေက တရုတ်ကျောင်းဆင်းပြီး အပြန် လမ်းမှာ ကားကြီးက ဝင်တိုက်သွားတာ။ သူ့အမကတော့ ဆုံးသွားတာ၊ အငယ်တစ်ယောက်က‌တော့ ဒဏ်ရာရသွားတာ။ ကားကြီးတွေကလည်း တရုတ်ဘက်ကို သွားမဲ့ သတ္တုတင်တဲ့ ကားတွေ”ဟု နမ့်ခမ်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

သတ္တုတင်ဆောင်လာသည့် ကားတိုက်ခံရသူ ကျောင်းသူနှစ်ဦးမှာ အသက် ၁၃ အရွယ်ခန့် နမ့်ခမ်းမြို့နယ် နောင်ခမ်းရွာတွင် နေထိုင်သူများ ဖြစ်ကြပြီး၊ ကားကြီးမောင်းနှင်သည့် ယာဉ်မောင်းအမျိုးသားကို TNLA တပ်ဖွဲ့မှ လာရောက်ဖမ်းဆီး ခေါ်ဆောင်သွားကြောင်း ၎င်းအမျိုးသားက ဆက်ပြောသည်။

“ကားမောင်တဲ့လူကိုတော့ TNLA အဖွဲ့ကပဲ လာခေါ်သွားတယ်။ ခုနောက်ပိုင်း နမ့်ခမ်းမှာ TNLA ထိန်းချုပ်နေလည်း သတ္တုတင်တဲ့ကားတွေ သွားလာတာက မရပ်ဘူး။ ကားကြီးတွေ အတွက်ကလည်း စည်းကမ်းချက် မရှိဘူး။ သူတို့ ထိန်းချုပ်ထားတဲ့နောက်ပိုင်း ဒီလိုဖြစ်နေတာ မကြာခဏပဲ။ မီးတိုင် တိုက်တယ် မီးကြိုးတွေပျက်တယ် ကား၊ဆိုင်ကယ်တွေ တိုက်တယ် ခဏခဏပဲ”ဟု နမ့်ခမ်းမြို့‌ဒေသခံ ၎င်းအမျိုးသားက သျှမ်းသံတော်ဆင့်ကို ဆက်ပြောသည်။

နမ့်ခမ်းမြို့နယ်အတွင်း သတ္တုနှင့်ကျောက်မီးသွေး တင်ဆောင်သော ယာဉ်ကြီးများသည် သေချာစွာ ဖုံးအုပ်ထားခြင်း မရှိသည့်အပြင် မြို့တွင်းသို့ ဖြတ်သန်းသွားလာချိန်တွင် ယာဉ်များကို ကြမ်းတမ်းစွာ မောင်းနှင်မှုတို့ကြောင့် လမ်းများ ပျက်စီးခြင်း၊ ယာဉ်မတော်တဆ ထိခိုက်မှုများ ဖြစ်ပွားခြင်းတို့ကို မကြာခဏ ဖြစ်ပွားစေကြောင်း ဒေသခံများက ပြောသည်။

နမ့်ခမ်းမြို့နယ်ကို “၁၀၂၇ စစ်ဆင်ရေး”အတွင်း တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ပြီးနောက် တိုက်ပွဲငြိမ်သက်နေစဉ် နမ္မတူ၊ ဘော်တွင်းနှင့် နမ့်ခမ်းတောင်ကြောများမှ သတ္တုတွင်းထွက်နှင့် မီးသွေးတင်ကားများ တရုတ်-မြန်မာနယ်စပ် နောင်တောင်းဂိတ်မှတဆင့် နေ့စဉ်နီးပါး ဝင်ထွက်ရောင်းဝယ်နေကြောင်း ဒေသခံ ကုန်သည်များက ပြောသည်။

ပြီးခဲ့သည့် (ဇူလိုင်လ ၄ ရက်) တွင် TNLA တပ်ဖွဲ့ ထိန်းချုပ်ထားသည့် နမ့်ခမ်းမြို့နယ်ရှိ စာသင်ကျောင်းများကို လုံခြုံရေးစိုးရိမ်မှုကြောင့် ရက်အကန့်အသတ်မရှိ ပိတ်ထားရန် တအာင်းပြည်ပညာရေးကောင်စီ (TLEC) မှ ညွှန်ကြားခဲ့ကြောင်း သိရသည်။