သျှမ်းပြည် ကျောက်မဲနှင့် သီပေါမြိုနယ်တို့တွင် ဖြစ်ပွားခဲ့သည့် ရှမ်းပြည်တိုးတက်ရေးပါတီ/ ရှမ်းပြည်တပ်မတော် SSPP/SSA နှင့် တအာင်း(ပလောင်) အမျိုးသားလွတ်မြောက်ရေးတပ်မတော် TNLA တို့၏ တိုက်ပွဲများအတွင်း နှစ်ဘက်ထိခိုက်ကျဆုံးမှုရှိကြောင်း သတင်းသိရသည်။

ယမန်နေ့ (ဇူလိုင်လ ၅ ရက်)က ကျောက်မဲမြို့နယ် နောင်ပိန်ကျေးရွာအုပ်စုနှင့် သီပေါမြို့နယ် ကြံခင်းရွာတို့တွင် (၂) နေရာထက်မနည်း ဖြစ်ပွားခဲ့သည့် SSPP တပ်ဖွဲ့နှင့် TNLA တပ်ဖွဲ့တို့၏ တိုက်ပွဲများအတွင်း နှစ်ဘက်တပ်သား ထိခိုက်ကျဆုံးမှုရှိကြောင်း SSPP Info ၊ TNLA သတင်းနှင့် ပြန်ကြားရေးဌာနတို့က အသီးသီး ထုတ်ပြန်လာခဲ့သည်။

ကျောက်မဲမြို့နယ် ခေးနင်းကျေးရွာအုပ်စု လုပ်ပါကျေးရွာရှိ SSPP တပ်စခန်းကို TNLA တပ်သား အင်အား ၇၀ ကျော်က ယမန်နေ့ (ဇူလိုင် ၅ ရက်) ၁၁ နာရီခွဲကျော်တွင် ပြည်ထောင်စုလမ်းမကြီး မြောက်ဘက်မှ တောင်ဘက်သို့ ကျော်လာ၍ စတင်ပစ်ခတ်ခဲ့ရာမှ အပြန်အလှန် တိုက်ခိုက်မှု ဖြစ်ပွားခဲ့ပြီး နှစ်ဘက်ထိခိုက်သေဆုံးမှု ဖြစ်ပေါ်ခဲ့ရကြောင်း SSPP Info က ယနေ့ (ဇူလိုင် ၆ ရက်) တွင် ထုတ်ပြန်သည်။

သီပေါမြို့နယ်တွင်လည်း TNLA တပ်ဖွဲ့မှ ဘော်ကြိုကျေးရွာနှင့် ကျင်သီတံတား အနောက်ဘက်တွင် အင်အားဖြည့် နေရာယူကာ ကြံခင်းရွာတွင် SSPP တပ်ဖွဲ့ အထိုင်ချ တပ်စွဲထားသည့်နေရာကို ထိုးစစ်ဆင်တိုက်ခိုက်ခဲ့ခြင်းကြောင့် တိုက်ပွဲထပ်မံ ဖြစ်ပွားခဲ့ကြောင်း SSPP ထုတ်ပြန်ချက်တွင် ဖော်ပြထားသည်။

ကျောက်မဲနှင့် သီပေါမြို့နယ်အတွင်း SSPP/SSA နှင့် TNLA တပ်ဖွဲ့တို့ တစ်ရက်တည်း ၃ နေရာ တိုက်ပွဲဖြစ်ပွားခဲ့ခြင်းကြောင့် SSPP ဘက်မှ ရဲဘော် ၁ ဦး ကျဆုံးပြီး TNLA ဘက်မှ ကျဆုံးသူ၊ လက်နက်ချ အလင်းဝင်ရောက်သူနှင့် ဒဏ်ရာရ စစ်သုံ့ပန်း ၅ ယောက်ထက်မနည်း ရှိခဲ့ကြောင်း SSPP ထုတ်ပြန်ချက်အရ သိရသည်။

အလားတူ သီပေါမြို့နယ်တွင် စစ်ကောင်စီတပ်နှင့် တိုက်ပွဲအတွင်း TNLA က ဖမ်းဆီးရမိခဲ့သည့် စစ်သုံ့ပန်းများကို သယ်ယူပို့ဆောင်နေစဉ် ကြံခင်း(ရေပူ)ရွာအနီးတွင် SSPP တပ်ဖွဲ့က ပစ်ခတ်ခဲ့သဖြင့် ကားပေါ်လိုက်ပါလာသည့် TNLA တပ်ဖွဲ့၏ သီပေါမြို့နယ်မှူးဆိုသူ အသက်ပေးလှူခဲ့ရပြီး ရဲဘော်(၃) ဦး ထိခိုက်ဒဏ်ရာ ရရှိခဲ့ကြောင်း TNLA သတင်းနှင့် ပြန်ကြားရေးဌာနမှ ယမန်နေ့ (ဇူလိုင် ၅ ရက်)တွင် သတင်းထုတ်ပြန်သည်။

သီပေါမြို့နယ်အတွင်း စစ်သုံ့ပန်းများကို ခေါ်ဆောင်လာသည့် TNLA သီပေါမြို့နယ်မှူးအဖွဲ့အား သီပေါမြို့ ကြံခင်း(ရေပူ)ရွာအနီး လမ်းဘေးရှိ ဘုန်းကြီးကျောင်းဝင်းတွင် အသင့်စောင့်ဆိုင်းနေသည့် SSPP တပ်ဖွဲ့ဝင်များက ပစ်ခတ်ခဲ့ရာ ဗိုလ်ကြီး နေအုပ် သည် ကားပေါ်ပွဲချင်းပြီး သေဆုံးသွားခဲ့ကြောင်း TNLA ထုတ်ပြန်ချက်တွင် ဆိုထားသည်။

သီပေါမြို့နယ် TNLA တပ်ဖွဲ့၏ စစ်သုံ့ပန်းခေါ်ဆောင်လာသည့် ယာဉ်တန်းကို SSPP တပ်ဖွဲ့က ပစ်ခတ်ခဲ့သည့် ဖြစ်စဉ်အတွင်း TNLA သတင်းနှင့် ပြန်ကြားရေးဌာနမှ မည်သည့်ရက်တွင် ဖြစ်ပွားခဲ့ကြောင်း ရက်စွဲဖော်ပြထားခြင်း မရှိဘဲ ယခင်က သီပေါနှင့် ကျောက်မဲမြို့ကို ဖြတ်သန်းသွားလာရာတွင် TNLA တပ်ဖွဲ့အား SSPP တပ်ဖွဲ့မှ ပစ်ခတ်ခြင်း မရှိခဲ့ကြောင်း သိရသည်။

ထို့အပြင် ကျောက်မဲမြို့နယ် နောင်ပိန်နှင့် လုပ်ပါကျေးရွာတို့တွင် SSPP တပ်ဖွဲ့မှ TNLA တပ်ဖွဲ့အား စတင်ပစ်ခတ် တိုက်ခိုက်မှုကြောင့် နှစ်ဘက်တိုက်ပွဲ ဖြစ်ပွားခဲ့ကြောင်း TNLA ဘက်မှ ထုတ်ပြန်ပြောဆိုထားသည်။

ယခုကဲ့သို့ နှစ်ဘက်အောက်ခြေ နားလည်မှုလွှဲမှားပြီး အပြန်အလှန် ပစ်ခတ်မှု ဖြစ်ပွားသည်ကို သက်ဆိုင်ရာ ခေါင်းဆောင်များ ဆွေးနွေးညှိနှိုင်းပြီး နှစ်ဘက်အပြန်အလှန် ပစ်ခတ်မှုကို အဆုံးသတ် ရပ်တန့်နိုင်ခဲ့ကြောင်း သိရသည်။