သျှမ်းပြည် ကျောက်မဲမြို့နယ် နောင်ပိန်ကျေးရွာအုပ်စုအနီးရှိ ရှမ်းပြည်တိုးတက်ရေးပါတီ/ ရှမ်းပြည်တပ်မတော် SSPP/SSA စခန်းချနေရာကို တအာင်း(ပလောင်) အမျိုးသားလွတ်မြောက်ရေးတပ်မတော် TNLA က တိုက်ခိုက်ခဲ့ကြောင်း စုံစမ်းသိရသည်။

ပြီးခဲ့သည် ဇွန်လ နောက်ဆုံးပတ်တွင် TNLA တပ်ဖွဲ့က ကျောက်မဲမြို့နယ် နောင်ပိန်ကျေးရွာအုပ်စု ရဲစခန်းအနီးရှိ SSPP တပ်စခန်းကို ပြောင်းရွှေ့ခိုင်းခဲ့ရာ နှစ်ဘက်တင်းမာမှု ဖြစ်ပွားခဲ့ပြီး ယနေ့ (ဇူလိုင် ၅ ရက်) နံနက် ၁၀ နာရီခွဲကျော်တွင် သေနတ်ပစ်ခတ်မှု ဖြစ်ပွားသည်အထိ စစ်ရေး တင်းမာနေကြောင်း ကျောက်မဲမြို့နယ်မှ စစ်မြေပြင်တွင် ပါဝင်လှုပ်ရှားနေသူတစ်ဦးက သျှမ်းသံတော်ဆင့်ကိုပြောသည်။

“နောင်ပိန် အရှေ့ဘက်က လုပ်ပါရဲစခန်းနား ၁၀ နာရီခွဲလောက်မှာ ပစ်ကြတာ၊ အဲ့နားမှာ SSPP ဂိတ်ရှိတယ်။ TNLA တွေက လမ်းမကြီးအရှေ့ဘက်ကို အင်အားဖြည့်လာပြီး အဲ့ဒီဂိတ်နားကို ပစ်ကြတာ။ ဇွန်လကုန်တုန်းကလည်း တစ်ခါ သူတို့နှစ်ဖွဲ့ကြား တပ်နေရာနဲ့ ပတ်သက်ပြီး အဲ့နားတဝိုက် တင်းမာမှု ဖြစ်ကြသေးတယ်”ဟု ကျောက်မဲမြို့နယ်မှ စစ်ရေး သတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

အလားတူ ကျောက်မဲမြို့ပေါ်ရှိ စစ်ကောင်စီလက်အောက်ခံ ဌာနဆိုင်ရာ ရုံးများကို TNLA တပ်ဖွဲ့မှ ထိန်းချုပ်လိုက်ပြီးနောက် ဇွန်လ ၂၆ ရက်တွင် နောင်ပိန်ကျေးရွာရှိ တိုက်နယ်ဆေးရုံ၊ အထက်တန်းကျောင်းနှင့် ကျေးလက်ဆေးပေးခန်းတို့ကို TNLA တပ်သား (၂၀)ခန့်မှ လာရောက်ပြီး သော့ခတ်ချိတ်ပိတ်သွားခဲ့ကြောင်း ဒေသခံများက ပြောသည်။

ဇွန်လ ၂၅ ရက်တွင် စတင်ခဲ့သည့် နောင်ချိုနှင့် ကျောက်မဲမြို့နယ်တို့တွင် စစ်ကောင်စီတပ်နှင့် TNLA၊ PDF ပူးပေါင်းတပ်တို့ တိုက်ပွဲအပြင်းအထန် ဖြစ်ပွားပြီး လက်ရှိသတင်း ရေးသားနေချိန်အထိ ကျောက်မဲ၊ နောင်ချိုမြို့တို့နှင့် ၁၅ မိုင်ခန့်စီ ကွာဝေးသည့် နောင်ပိန်ဂုတ်တွင်းအနီးတွင် စစ်ကောင်စီတပ်နှင့် TNLA တပ်ဖွဲ့တို့ တိုက်ပွဲပြင်းထန်လျက်ရှိကြောင်း ဒေသခံများထံမှ သိရသည်။

တစ်ဖက်မှာလည်း TNLA ၊ ပြည်သူ့ကာကွယ်ရေးတပ် PDF ပူးပေါင်းတပ်ဖွဲ့တို့နှင့် စစ်ကောင်စီတပ်တို့သည် သျှမ်းပြည်မြောက်ပိုင်း လားရှိုး၊ ကျောက်မဲ၊ သီပေါနှင့် နောင်ချိုမြို့နယ်တို့တွင် တိုက်ပွဲပြင်းထန်လျက်ရှိပြီး အရပ်သားပြည်သူများ ထောင်နှင့်ချီ ထွက်ပြေးတိမ်းရှောင်နေရသည်။

“၁၀၂၇ စစ်ဆင်ရေး” ယာယီအပစ်ရပ်စဉ်အတွင်း ကျောက်မဲမြို့နယ်တွင် လှုပ်ရှားနေသည့် ရှမ်းပြည်တိုးတက်ရေးပါတီ/ ရှမ်းပြည်တပ်မတော် SSPP/SSA နှင့် တအာင်း(ပလောင်) အမျိုးသားလွတ်မြောက်ရေးတပ်မတော် TNLA တို့သည် ကျောက်မဲနှင့် မိုင်းလုံမြို့အကြား တပ်နေရာချထားရေးနှင့် ပတ်သက်၍လည်း နှစ်ဘက်တင်းမာမှု ရှိခဲ့ကြောင်း ဒေသခံများထံမှ သိရသည်။

အဆိုပါကိစ္စနှင့်ပတ်သက်ပြီး TNLA နှင့် SSPP တာဝန်ရှိသူကို သျှမ်းသံတော်ဆင့် မှ ဆက်သွယ်မေးမြန်းသော်လည်း ပြန်လည်ဖြေကြားခြင်းမရှိပေ။

ပြီးခဲ့သည့် မေလ (၂၇) ရက်ကလည်း နမ့်ခမ်းမြို့နယ် ရွှေလီမြစ်ကမ်းဘေးရှိ ကျေးရွာများမှ SSPP တပ်သားများကို လက်နက်ကိုင်ဆောင်ခွင့်မပြုဘဲ TNLA တပ်ဖွဲ့မှ ကားတင်ခေါ်ဆောင်ကာ မူဆယ်ဘက်သို့ ပို့ဆောင်လိုက်ခြင်းနှင့် ပတ်သက်၍ပြီး သာလွန်အင်အား အသုံးပြု၍ ဖယ်ရှားခံရခြင်းဖြစ်ကြောင်း SSPP ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်က သျှမ်းသံတော်ဆင့်ကို ဖြေကြားထားသည်။