သျှမ်းပြည် သီပေါမြို့တွင် လက်နက်ကြီးထိမှန်၍ အမျိုးသားတစ်ဦး ဒဏ်ရာပြင်ထန်ခဲ့ကြောင်း သတင်းရရှိသည်။
ယမန်နေ့ ( ဇူလိုင် ၄ ရက်) ည ၇ နာရီ ဝန်းကျင်တွင် သီပေါမြို့ ဒုဋ္ဌဝတီတံတားထိပ်တွင် တပ်စွဲထားသည့် စစ်ကောင်စီတပ်နှင့် တအာင်း(ပလောင်) အမျိုးသားလွတ်မြောက်ရေးတပ်မတော် TNLA တို့ တိုက်ပွဲပြင်းထန်ခဲ့သည်။
ထိုတိုက်ပွဲကြား လက်နက်ကြီးပစ်ခတ်မှုများကြောင့် သီပေါမြို့ ပန်းတိမ်တောင်ရပ်ကွက် အတွင်းသို့ လက်နက်ကြီးကျည် ကျရောက်ပေါက်ကွဲကာ အမျိုးသားတစ်ဦး လက်နက်ကြီးစ ထိမှန်၍ ဒဏ်ရာပြင်းထန်ခဲ့ကြောင်း သီပေါမြို့ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ရပ်ကွက်ထဲကို လက်နက်ကြီး ကျတာ။ နှစ်ဘက်လုံး ပစ်နေကြတာ သေနက်သံတွေကော လက်နက်ကြီးသံတွေကော နာရီဝက်လောက်ပစ်တာ တိုက်ပွဲပြင်းထန်တယ်။ မနေ့က တစ်ယောက်ထိတော့ အဲ့လူကို ပရဟိတအသင်းပဲ သွားယူပေးတာ။ သူကတော့ လက်နက်ကြီးစ ထိတာ လက်မောင်းနားကို”ဟု သီပေါမြို့ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
ထိခိုက်ဒဏ်ရာရရှိသူ အမျိုးသားကို နယ်စည်းမခြားပရဟိတအသင်းက သွားရောက် ခေါ်ဆောင်ကာ သီပေါမြို့တွင် ဆေးရုံများကို ပိတ်ထားသည့်အတွက်ကြောင့် နမ့်လန် တိုက်နယ်ဆရာဝန်ထံသို့ ထပ်မံပို့ဆောင်နိုင်ရန် ကြိုးစားနေကြောင်း သိရသည်။
ပြီးခဲ့သည့် ဇွန်လ ၁ ရက်ကလည်း သီပေါမြို့တွင် တိုက်ပွဲဖြစ်ပွားမှု မရှိဘဲ လက်နက်ကြီး ကျရောက် ပေါက်ကွဲမှုကြောင့် ထိခိုက်ဒဏ်ရာရရှိသူ ၅ ဦး ရှိခဲ့ကြောင်း သိရသည်။
သီပေါမြို့သို့ သွားလာနိုင်သည့် ပြည်ထောင်စုလမ်းမကြီး အဝင်အထွက် လမ်း၊ တံတားများ အားလုံး ဖျက်ဆီးခံထားရသည့်အပြင် မြို့အနီးတစ်ဝိုက်နှင့် ကျောက်မဲ၊ လားရှိုးမြို့နယ်တို့တွင်လည်း တိုက်ပွဲများ ဖြစ်ပွားနေပြီး ဒေသခံများ ထွက်ပြေးတိမ်းရှောင်ရန် ခက်ခဲနေကြောင်းသိရသည်။
Leave a Comments