သျှမ်းပြည် မူဆယ်မြို့မှ လားရှိုးမြို့သို့ ထွက်လာသော ကားများသည် တိုက်ပွဲများကြောင့် လမ်းပိုင်းတွင် ပိတ်မိနေကြောင်း သတင်းရရှိသည်။
မူဆယ်မြို့မှ လားရှိုးမြို့သို့ ထွက်ခွာလာသော ခရီးသည်တင်ကားနှင့် ကုန်တင်ကားများသည် ယမန်နေ့ (ဇူလိုင် ၃ ရက်)မှစတင်၍ တိုက်ပွဲများ ပြန်လည်ဖြစ်ပွားလာခြင်းကြောင့် လားရှိုးမြို့ အဝင်အထွက် ပိတ်ထားသဖြင့် မိုင်းတင်ကျေးရွာ အနီးတွင် ကားများ ရာနှင့်ချီ ပိတ်မိနေကြောင်း သိရသည်။
ထို့အပြင် စစ်ကောင်စီတပ်၏ လက်နက်ကြီး ရမ်းသမ်းပစ်ခတ်မှုကြောင့် ကားများကို ထိမှန်မှုများလည်း ရှိနေကြောင်း အသက် ၃၀ ဝန်းကျင် အမျိုးသားတစ်ဦးက သျှမ်းသံတော်ဆင့်ကို ပြောသည်။
“မနေ့ကတော့ စစ်ကောင်စီက လက်နက်ကြီးပစ်လို့ ကားတွေထိတယ်။ နမ့်ခမ်းကလာတဲ့ ကားတစ်စီးဆို ရွှေ့လို့မရတော့ဘူး။ ကားမှန်တွေလည်း ထိတယ်။ မနေ့ကတည်းက ပိတ်နေတာ သွားလို့ကို မရဘူး။ မန္တလေးဆင်းမယ့် ကားတွေကတော့ အဲ့မှာပဲ ရပ်ထားတာပေါ့ ။တချို့ ပြန်လှည့် လို့ရတဲ့ ကားတွေကတော့ လှည့်လာတယ်”ဟု မူဆယ်-လားရှိုးခရီးစဉ် ပြေးဆွဲနေသည့် ၎င်းကားသမားက သျှမ်းသံတော်ဆင့်ကို ပြောသည်။
ထိုပိတ်မိနေသော ကားသမားများသည် လက်နက်ကြီး ပစ်ခတ်မှုနှင့် လေကြောင်းဖြင့် ဗုံးကြဲခံရမည်ကို စိုးရိမ်နေကြရပြီး ကိုးကန့်တပ်ဖွဲ့ MNDAA မှ ပြည်သူ၏ ကားများကို သိမ်းယူသွားကြောင်း ခရီးသွားများထံမှ သိရသည်။
“ကိုးကန့်တပ်တွေကလည်း ကားကိုကြည့်ပြီး မြင့်တဲ့ကားကိုမှ ၃ စီးလောက်ကို ယူသွားတယ် လူပါခေါ်သွားတယ်။ ပြန်လွှတ်လာပြီလို့တော့ သိရတယ်။ ယူသွားတာက ကားကို စစ်မြေပြင်မှာ ပြန်သုံးဖို့လို့ ကြားတယ်၊ ခုက ခက်ခဲပါတယ်ဆို အဲ့လိုကားကို ယူသွားတော့ စိုးရိမ်ရတယ်။ သူတို့က ပြန်ပေးမယ်လို့သာ ပြောသာ ဒီကားနဲ့ပဲ လုပ်စားနေကြရတာ”ဟု ၎င်းခရီးသည်က သျှမ်းသံတော်ဆင့်ကို ပြောသည်။
ယမန်နေ့ (ဇူလိုင် ၃ ရက်)မှ စတင်ပြီး လားရှိုးမြို့ အဝင်အထွက်လမ်းများကို စစ်ကောင်စီတပ်က ပိတ်ထားပြီး မြို့ပတ်လည်ရှိ အီနိုင်း၊ မိုင်းတင်၊ မန်အိုင်၊ ကုန်းညောင်၊ ရှန်ခိုက် စသည့် ကျေးရွာများတွင် တိုက်ပွဲ ပြင်းထန်နေကြောင်း ဒေသခံများက ပြောသည်။
အလားတူ သီပေါမြို့တွင်လည်း ပြည်ထောင်စုလမ်းမကြီး အဝင်အထွက် လမ်း၊ တံတားများ အားလုံး ဖျက်ဆီးခံထားရသည့်အပြင် မြို့အနီးတစ်ဝိုက်နှင့် ကျောက်မဲ၊ လားရှိုး မြို့နယ်တို့တွင်လည်း တိုက်ပွဲများ ဖြစ်ပွားနေကြောင်း ဒေသခံများက ပြောသည်။
Leave a Comments