သျှမ်းပြည် ဆီဆိုင်မြို့နယ် ထမ်းယံတိုင်ကျေးရွာတွင် ပအိုဝ်း ပြည်သူ့စစ် PNO အဖွဲ့က ဒေသခံ ၁ ဦးကို ရွာလယ်ခေါင်၌ ပစ်သတ်ခဲ့ကြောင်း စုံစမ်းသိရသည်။

ဖြစ်စဉ်မှာ ယမန်နေ့ (ဇူလိုင် ၃) ရက် နံနက် ၇ နာရီခန့်တွင် ထမ်းယံတိုင်ကျေးရွာနေ ခွန်တငွေနှင့် ခွန်မောင်ပေး တို့သည် ရပ်ရွာထဲရှိ အသုဘအိမ်မှပြန်လာစဉ် ပစ်သတ်ခံရခြင်း ဖြစ်ပြီး ခွန်တငွေက သေဆုံးသွားခဲ့သည်ဟု PNLA ကထုတ်ပြန်ထားသည်။

သျှမ်းတောင် စစ်ရေးပဋိပက္ခအတွင်း အရပ်သားထိခိုက်မှု အခြေအနေကို လေ့လာစောင့်ကြည့်နေသည့် ပအိုဝ်းလူငယ်အစည်းအရုံး PYOမှ တာဝန်ခံတစ်ဦးက “ပစ်သတ်လိုက်တယ်ဆိုတာ ဟုတ်ပါတယ်။ ဒါပေမဲ့ ဘာကြောင့်ပစ်သတ်တယ်ဆိုတဲ့ အကြောင်းအရင်းကို မသိရသေးဘူး” ဟု ပြောသည်။

ထို့အပြင် ဒေသခံများကို ဆက်သွယ်မေးမြန်းကြည့်ရာမှာလည်း ဒေသခံများက မပြောရဲကြကြောင်း ၎င်းကဆက်ပြောသည်။

လက်ရှိ ခွန်တငွေနှင့်အတူ လိုက်ပါလာသော ခွန်မောင်ပေးကိုလည်း PNO ကဖမ်းဆီးသွားခဲ့ပြီး လက်ရှိအချိန်ထိ အဆက်အသွယ်မရသေးကြောင်း သိရသည်။

ယင်းကဲ့သို့ ခွန်မောင်ပေးကို ဖမ်းခေါ်သွားနေစဉ် ရွာသားများလိုက်ပါက ထပ်မံပစ်သတ်မည်ဟုလည်း PNO ဘက်က ခြိမ်းခြောက်ခဲ့သေးကြောင်း ဆိုသည်။

ပြီးခဲ့သည့် ဇွန်လ ၂၀ ရက်တွင်လည်း ဆီဆိုင်မြို့နယ် လွယ်ထွဲကျေးရွာအတွင်း ဈေးလာရောင်းချနေသည့် ညောင်ရွှေမြို့နယ် ကျားတွန်ကျေးရွာမှ လူငယ် ၂ ဦးကိုလည်း စစ်ကောင်စီနှင့် လက်အောက်ခံ ပြည်သူ့စစ်တို့က ဖမ်းဆီးသတ်ဖြတ်ခဲ့သည်။