သျှမ်းပြည် လားရှိုးမြို့ကို ညီနောင်မဟာမိတ်တပ်များက ဝိုင်းရံပိတ်ဆို့လိုက်ပြီး စစ်ကောင်စီတပ်က မြို့တွင်းမှ လက်နက်ကြီးဖြင့် ရမ်းသမ်းပစ်ခတ်နေကြောင်း စုံစမ်းသိရသည်။
ယမန်နေ့ (ဇူလိုင်လ ၂ ရက်) ည ၁၀ နာရီခန့်မှ စတင်ပြီး လားရှိုးမြို့နှင့် ၁၄ မိုင်ခန့်သာ ကွာဝေးသည့် ရှန်ခိုက်ကျေးရွာတွင် စစ်ကောင်စီ၏ သေနတ်လေ့ကျင့်ရေးတပ်ကို ကိုးကန့်တပ်ဖွဲ့ MNDAA မှ စတင်တိုက်ခိုက်ခဲ့ရာ ရမခ တိုင်းစစ်ဌာနချုပ်နှင့် မြို့ပတ်လည်ရှိ စစ်ကောင်စီတပ်စခန်းများမှ လက်နက်ကြီးဖြင့် အဆက်မပြတ် ရမ်းသမ်းပစ်ခတ်နေကြောင်း လားရှိုးဒေသခံများက ပြောသည်။
“လားရှိုးမှာတော့ မြို့ထဲကနေ လက်နက်ကြီးနဲ့ ပစ်နေတာပေါ့။ မြို့ပတ်လည်မှာတော့ သေနတ်သံထွက်ပြီ။ သိန္နီအတက်က စစ်ကောင်စီပိတ်ထားတဲ့ လမ်းမှာလည်း တပ်မ အထိုင်စခန်းကိုလည်း မဟာမိတ်တပ်က ဝင်ပစ်တယ်။ မန်အိုင်အထွက်၊ ပန်ဟုန်းဘက်က တပ်မှာလည်း ပစ်နေကြပြီ၊ ။လားရှိုး အဝင်အထွက် နေရာအားလုံးကို တိုက်ပွဲဖြစ်နေပြီ”ဟု လားရှိုးမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိသတင်းရေးသားချိန်အထိ လားရှိုးမြို့ရှိ စစ်ကောင်စီတပ်စခန်းများကို ကိုးကန့်တပ်ဖွဲ့ MNDAA က စတင်တိုက်ခိုက်လာပြီး မြို့ကို ဝိုင်းရံပိတ်ဆို့ထားကာ မြို့အဝင်အထွက် နေရာအားလုံးတွင် တိုက်ပွဲဖြစ်ပွားလျက်ရှိကြောင်း ဒေသခံများက ပြောဆိုသည်။
လားရှိုးမြို့ပေါ်တွင် စစ်ကောင်စီတပ်မှ တိုက်လေယာဉ် ပျံဝဲနေပြီး လားရှိုးတိုက်ပွဲအတွင်း ညီနောင်မဟာမိတ်ဖြစ်သည့် တအာင်း(ပလောင်)တပ်ဖွဲ့ TNLA လည်း ပါဝင်ကြောင်း သိရသည်။
အလားတူ လားရှိုးမြို့နယ်အတွင်းရှိ နောင်မွန်နှင့် နမ့်ပေါင်ကျေးရွာဘက်တွင်လည်း စစ်ကောင်စီတပ်နှင့် ကိုးကန့်တပ်ဖွဲ့ MNDAA တို့ ထိတွေ့တိုက်ပွဲ ဖြစ်ပွားလျက်ရှိပြီး လားရှိုး-မိုင်းရယ် လမ်းမကြီးပေါ်ရှိ နမ့်မပေါတ တံတားလည်း ယနေ့ (ဇူလိုင်လ ၃ ရက်) နံနက် ၈ နာရီခန့်တွင် မိုင်းခွဲဖျက်ဆီးခံလိုက်ရကြောင်း သိရသည်။
“မိုင်းရယ်သွားတဲ့လမ်းက နမ္မတံတား ၂ ခု ရှိတာမှာ နမ့်မပေါတတံတားကြီး ကျိုးသွားတော့ လားရှိုးကို ယာဉ်ကြီး လုံးဝဝင်ထွက်လို့ မရတော့ဘူး။ အခုအနေအထားနဲ့ ထွက်ပြေးဖို့ လမ်းမရှိတော့ဘူး။ မြို့ပေါ်မှာတော့ အသွားအလာ မရှိတော့ဘူး၊ ဆိုင်တွေလည်း ပိတ်ကုန်ပြီ”ဟု လားရှိုးမြို့မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
ယနေ့ (ဇူလိုင်လ ၃ ရက်) နံနက် ၇ နာရီကျော်တွင် လားရှိုးမြို့ ရပ်ကွက် (၁)ရှိ တက္ကသိုလ်နှင့် တိုင်းရုံးအကြား သာယာလမ်းသွယ်တွင် ကိုးကန့်တပ်ဖွဲ့ MNDAA ၏ ဒရုန်းကို စစ်ကောင်စီတပ်မှ ပစ်ချခဲ့ရာ ၎င်းဒရုန်းမှ ဗုံးသီးသည် ပြည်သူနေအိမ်ပေါ် ကျရောက်ပေါက်ကွဲခဲ့ပြီး မိသားစုဝင် ၆ ဦး ပွဲချင်းပြီး သေဆုံးသွားခဲ့သည်။
သေဆုံးသွားသူများတွင် အမျိုးသား ၂ ဦးနှင့် အမျိုးသမီး ၄ ဦးတို့ ဖြစ်ကြပြီး ၎င်းတို့အထဲတွင် ကလေး ၃ ဦး ပါဝင်ကြောင်း လားရှိုးဒေသခံများက ပြောသည်။
ထို့အပြင် လားရှိုးမြို့နယ် နမ့်ပေါင်ကျေးရွာတွင်လည်း ကိုးကန့်တပ်ဖွဲ့ MNDAA ၏ ဒရုန်းဗုံး ကျရောက်ပေါက်ကွဲခြင်းကြောင့် လင်မယားနှစ်ဦးကို ထိမှန်ခဲ့ပြီး အမျိုးသမီးမှာ ပွဲချင်းပြီး သေဆုံးသွား၍ အမျိုးသားမှာ ဒဏ်ရာပြင်းထန်ကြောင်း ဒေသခံများထံမှ သိရသည်။
Leave a Comments