သျှမ်းပြည် ဆီဆိုင်မြို့နယ် ရေဖြူကျေးရွာနှင့် ကယန်းလေးကျေးရွာအတွင်းရှိ ဒေသခံနေအိမ်ပေါင်း ၄၀ ကျော်ကို စစ်ကောင်စီတပ်နှင့် ပအိုဝ်း ပြည်သူ့စစ် PNO တို့က မီးရှို့ဖျက်ဆီးခဲ့ကြောင်း စုံစမ်းသိရသည်။

ဆီဆိုင်မြို့ တောင်ဘက် မိုင် ၂၀ ခန့်သာကွာဝေးသည့် ရေဖြူကျေးရွာနှင့် ကယန်းကျေးရွာရှိ ဒေသခံနေအိမ် ၁၆ လုံးထက်မနည်းကို ပြီးခဲ့သည့် ဇွန်လ ၂၇ ရက်က စစ်ကောင်စီနှင့် PNO တို့ကထပ်မံမီးရှို့ခဲ့သည်ဟု PNLA ပြန်ကြားရေးတာဝန်ခံ ခွန်ရိန်းယံက သျှမ်းသံတော်ဆင့်ကိုပြောသည်။

“ဒုတိယအကြိမ်မှာ သူတို့မီးရှို့သွားတာတော့ နေအိမ် ၁၆ လုံးရှိတယ်။ ဒါပေမဲ့ ဒါကကျနော် လက်လှမ်းသလောက်ပဲ သိရတယ်။ မီးဆိုတဲ့အမျိုးက ကူးတတ်တဲ့အခါကျတော့ မြေပြင်မှာ ဒီထက်မက ဆုံးရှုံးနိုင်တယ်” ဟု ၎င်းကပြောသည်။

ပြီးခဲ့သည့် မေလ ၁၅ ရက်တွင်လည်း ရေဖြူကျေးရွာရှိ ဒေသခံနေအိမ်များကို သုံးရက်ဆက်တိုက် စစ်ကောင်စီနှင့် ပြည်သူ့စစ်တို့က မီးရှို့ဖျက်ဆီးခဲ့ရာ အိမ်ပေါင်း ၂၄ အိမ်ထက်မနည်း မီးလောင်ပျက်စီး ဆုံးရှုံးသွားခဲ့ကြောင်း PNLA ကထုတ်ပြန်ထားသည်။

လက်ရှိ ဆီဆိုင်မြို့နယ်အတွင်းသို့ စစ်ကောင်စီတပ်က စစ်သားနှင့် ပြည်သူ့စစ် အင်အားရာချီသုံးပြီး တန်ပြန်စစ်ကြောင်းထိုးလာပြီးနောက် ကျေးရွာရှိ ဒေသခံနေအိမ်များ မီးရှို့ခံနေရခြင်းဖြစ်သည်။

သျှမ်းပြည်တောင်ပိုင်းတွင် ၅ လကျော်ကြာ တိုက်ပွဲအတွင်း စစ်ကောင်စီ၏ လေကြောင်း၊ လက်နက်ကြီး ပစ်ခတ်တိုက်ခိုက်မှုကြောင့် အဆောက်အအုံ ထိခိုက်ပျက်စီးမှု တစ်ထောင်ကျော်အထိ ရှိလာနေကြောင်း ပအိုဝ်းလူငယ်အစည်းအရုံး PYO ကထုတ်ပြန်ထားသည်။

ထို့အပြင် တိုက်ပွဲကြောင့် ကလေးငယ်နှင့်အမျိုးသမီး အပါအဝင် အရပ်သားသေဆုံးမှု ၈၄ ဦးအထိမြင့်တက်လာနေပြီး ထိခိုက်ဒဏ်ရာရသူ ၁၂၂ ဦးအထိ မြင့်တက်လာနေကြောင်း ပအိုဝ်းလူငယ်အစည်းအရုံး PYO ၏ထုတ်ပြန်ချက်တွင် ဖော်ပြထားသည်။