သျှမ်းပြည် တန့်ယန်းမြို့နယ် မန်ကတ်-မန်နောင်ကြားရှိကားလမ်း ဖြတ်ခံထားရကြောင်းဒေသခံများက ပြောသည်။
ပြီးခဲ့သည့် ရက်ပိုင်းကတည်းက ဖျက်ဆီးခံလိုက်ရပြီး ထိုကားလမ်းကို မြောင်းတူးပြီး လမ်းကြောဖြတ်တောက် ထားကြောင်း မန်ကတ်ကျေးရွာ ဒေသခံတစ်ဦးက သျှမ်းသံတော်ဆင့်ကို ပြောသည်။
“တန့်ယန်း-မိုင်းရယ်ကြား ကားလမ်းမဟုတ်ဘူး။ မိုင်းရယ်-တန့်ယန်းလမ်းပိုင်းက အခုထိသွားလာကြပါတယ်။ အခုပိတ်ထာက မန်ကတ်ကနေ မန်နောင်၊ မိုင်းတွမ်းဘက်သွားတဲ့လမ်းပါ” ဟု ၎င်းကပြောသည်။
![](https://burmese.shannews.org/wp-content/uploads/2024/07/signal-2024-07-03-103738_002-768x1024.jpeg)
လက်ရှိ ဖျက်ဆီးခံရသည့် ကားလမ်းကို မိုင်းရယ်-တန့်ယန်းကြားက ကားလမ်းဖြစ်သည်ဟု အချို့လူမှုကွန်ရက်အသုံးပြုသူက နေရာလွှဲမှားပြီးရေးသားဖော်ပြနေသောကြောင့် ပြည်သူများအကြား အထိတ်အလန့်ဖြစ်နေရကြောင်း ဆိုသည်။
လားရှိုးမြို့ ဒေသခံအမျိုးသားတစ်ဦးက “ အဲ့နားက မန်ကတ်ကျေးရွာအုပ်စု အမှတ် ၈ တပ်မတော်တန်းမြင့် လေ့ကျင့်ရေးကျောင်းရှိတယ်။ အဲ့တပ်နား မလာနိုင်ဖို့ လုပ်တာလည်းဖြစ်နိုင်တယ်။ စစ်ရဲ့ သဘောတရားက ကိုယ့်တပ်ဆီ ရန်သူချက်ချင်း လွယ်လင့်တကူ မရောက်လာနိုင်အောင် တားဆီးတဲ့သဘောထင်ပါတယ်” ဟု ပြောသည်။
ထိုအပြင် မန်ကတ်-မန်နောင်-မိုင်းတွမ်း လမ်းပိုင်းအား လက်နက်ကိုင်တပ်ဖွဲ့များကအသုံးပြုပြီး စစ်ရေးလှုပ်ရှားနေကြောင်းလည်း သိရသည်။