သျှမ်းပြည် ပင်လောင်းမြို့နယ်အတွင်း ဖြစ်ပွားနေသည့် တိုက်ပွဲများတွင် စစ်ကောင်စီတပ်သား ၁၀ ဦးထက်မနည်း သေဆုံးခဲ့သည်ဟု ကရင်နီအမျိုးသားများ ကာကွယ်ရေးတပ် KNDF ကပြောသည်။
ပြီးခဲ့သည့် ဇွန်လ ၂၉ ရက်က ပင်လောင်းမြို့နယ်အတွင်း တိုက်ပွဲတွင် စစ်ကြောင်းထိုးလာသည့် စစ်ကောင်စီဘက်က တပ်သား ၁၀ ဦးထက်မနည်းသေဆုံးခဲ့ပြီး၊ လက်နက်ငယ်တချို့ကိုလည်း သိမ်းဆည်းရမိသည်ဟု ကရင်နီအမျိုးသားများကာကွယ်ရေးတပ် KNDF ပြန်ကြားရေးတာဝန်ခံ တာအယ်စိုးက သျှမ်းသံတော်ဆင့်ကိုပြောသည်။
“ပင်လောင်းမြို့နယ်မှာ ဒီရက်ပိုင်း တိုက်ပွဲပြင်းထန်နေပါတယ်။ စစ်ကောင်စီဘက်ကနေ အင်အား ၃၀၀ နဲ့ စစ်ကြောင်းထိုးနေတယ်။ ပြီးခဲ့တဲ့ရက်ပိုင်းတိုက်ပွဲမှာလည်း စစ်ကောင်စီဘက် ၁၀ ဦးထက်မနည်း သေဆုံးတယ်။ ကျနော်တို့ တော်လှန်ရေးတပ်ဖွဲ့တွေဘက်က လက်နက်ငယ်တချို့ကို သိမ်းဆည်းနိုင်ခဲ့တယ်” ဟု တာအယ်စိုးက ပြောသည်။
ထိုကိန်းကဏာန်းများနှင့် ပတ်သက်ပြီး သျှမ်းသံတော်ဆင့်က သီးခြားအတည်ပြုနိုင်ခြင်းမရှိသေးပေ။
အလားတူ ယမန်နေ့ ပင်လောင်းမြို့နယ် ဆောင်းပြောင်းကျေးရွာတိုက်ပွဲတွင် ပအိုဝ်းပြည်သူ့စစ် PNO ဘက်က ဗိုလ်ကြီးခွန်မောင်မွေးလည်း သေဆုံးသွားခဲ့သည်ဟု Voice Of Pin Laung Facebook စာမျက်နှာပေါ်တွင် ရေးသားဖော်ပြထားသည်။
ပအိုဝ်းပြည်သူ့စစ် PNO ၏ဗိုလ်ကြီးခွန်မောင်မွေး သေဆုံးသွားသည့် ကိစ္စနှင့် ပတ်သက်၍ သျှမ်းသံတော်ဆင့်အနေဖြင့် ဆက်လက်စုံစမ်းနေခြင်းပင် ဖြစ်သည်။
လက်ရှိ ပင်လောင်မြို့ တောင်ဘက်ရှိ မိုင် ၂၀ ခန့်သာဝေးသည့် ဆောင်းပြောင်းကျေးရွာတွင် တိုက်ပွဲပြင်းထန်နေလျက်ရှိသည်ဟု ဒေသခံများ၏ပြောပြချက်အရ သိရသည်။
ပင်လောင်းမြို့နယ်တွင် ဇွန်လ ၁၇ ရက်နေ့ကတည်းက စစ်ကောင်စီတပ်က စစ်သားနှင့် ပြည်သူ့စစ်အင်အား ရာနှင့်သုံးပြီး စစ်ကြောင်းထိုးလာပြီးနောက် ရက်ဆက်တိုက်ပွဲဖြစ်ပွားလာနေခြင်း ဖြစ်သည်။
တိုက်ပွဲအတွင်း စစ်ကောင်စီတပ်က လက်နက်ကြီး၊ ဒရုန်းဖြင့် တန်ပြန်တိုက်ခိုက်ခဲ့သောကြောင့် ပြီးခဲ့သည့် ဇွန်လ ၃၀ ရက် ဆောင်းပြောင်းကျေးရွာတွင် ကလေးငယ် ၁ ဦးနှင့် အမျိုးသမီး ၁ ဦးအပါအဝင် ပြည်သူ ၄ ဦးထိခိုက်ဒဏ်ရာရရှိခဲ့ကြောင်း ဒေသခံများကပြောသည်။
