သျှမ်းပြည် ကျောက်မဲမြို့တွင် စစ်ကောင်စီနှင့် တအာင်း(ပလောင်) အမျိုးသားလွတ်မြောက်ရေးတပ်မတော် TNLA တို့၏ နှစ်ဘက်တိုက်ပွဲအကြား လက်နက်ကြီးကြောင့် မိသားစုလိုက် ထိမှန်သေဆုံးမှု မြှင့်တက်နေကြောင်း စုံစမ်းသိရသည်။
ယမန်နေ့ (ဇွန်လ ၂၉ ရက်) နံနက် ၉ နာရီကျော်တွင် ကျောက်မဲမြို့ ရပ်ကွက်(၈)ရှိ အထက-(၁) ကျောင်းရှေ့တွင် စစ်ကောင်စီတပ်မှ ပစ်ခတ်လိုက်သည့် လက်နက်ကြီးကျည်သည် ဒေါ်နန်းခင်ဖုန်းနှင့် နန်းမွေလင်းစံ တို့၏ နေအိမ်ပေါ်သို့ ကျရောက်ပေါက်ကွဲခဲ့ရာ နေအိမ်အတွင်းရှိနေသည့် သားအမိနှစ်ယောက်စလုံး ပွဲချင်းပြီး သေဆုံးသွားခဲ့ကြောင်း ကျောက်မဲဒေသခံများက ပြောသည်။
“ရွှေကျင်ကျောင်းအဝင်လမ်းက အိမ်ပေါ်ကို လက်နက်ကြီးကျတာ၊ သားအမိ နှစ်ယောက်လုံး ပွဲချင်းပြီးဆုံးသွားတယ်။ သမီးက ကျန်းမာရေးဆရာမလေး။ အခုတိုက်ပွဲက နှစ်ဘက်စလုံး ပြည်သူကို မကြည့်ဘူး၊ ဘယ်ဘက်ကပစ်ပစ် ပြည်သူပဲ စတေးရတာပဲ။ နှစ်ဘက်စလုံးကို ပြောချင်တာကတော့ ပြည်သူတွေ ရှိတဲ့နေရာကို စစ်ရေးပစ်မှတ် မလုပ်ကြပါနဲ့”ဟု ကျောက်မဲမြို့မှ ဖြစ်စဉ်သိရှိသူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
အလားတူ ဇွန်လ ၂၈ ရက် ညနေ ၅ နာရီကျော်တွင် ကျောက်မဲမြို့ အုတ်ကျင်းရပ်ရှိ အရပ်သားနေအိမ်ခြံဝင်းထဲ လက်နက်ကြီးကျည် ကျရောက်ပေါက်ကွဲခဲ့ရာ အိမ်အပြင်ဘက်ရှိ အမျိုးသမီး ၃ ဦး၊ ၃ နှစ်ကျော်အရွယ် ကလေး ၁ ဦးနှင့် အမျိုးသား ၂ ဦးတို့ ပွဲချင်းပြီး သေဆုံးခဲ့ပြီး အခြား ၅ ဦးမှာ ထိခိုက်ဒဏ်ရာ ပြင်းထန်ကြောင်း ဒေသခံများထံမှ သိရသည်။
ပြီးခဲ့သည့် ဇွန်လ ၂၆ ရက်ကလည်း ကျောက်မဲမြို့ ရန်ကင်းရပ်ရှိ နေအိမ်တစ်လုံးပေါ်သို့ လက်နက်ကြီးကျည် ကျရောက်ပေါက်ကွဲခဲ့ရာ မိသားစုဝင် ၄ ဦး ပွဲချင်းပြီးသေဆုံးသွားခဲ့ပြီး တစ်ရပ်ကွက်တည်းရှိ အခြားနေအိမ်တွင် သားအဖနှစ်ဦး လက်နက်ကြီးကျည် ထိမှန်မှုကြောင့် သေဆုံးသွားခဲ့ရကြောင်း ကျောက်မဲဒေသခံများက ပြောသည်။
လက်နက်ကြီးကြောင့်ပျက်စီးသည့်နေအိမ်
“အခုဆုံးတာတွေက လက်နက်ကြီးနဲ့ ဗုံးသီးတွေ မြို့ထဲအိမ်တွေပေါ် ကျကွဲလို့ မိသားစုလိုက် ဆုံးတာ။ ညဆိုရင် သန်းခေါင်ကျော်အချိန် လေယာဉ်နဲ့ ဗုံးလာကြဲချတာလည်း ညတိုင်းပဲ။ ကိုယ့်အိမ်ထဲနေတာတောင် ဘယ်ချိန် လက်နက်ကြီးမှန်မလဲ၊ ဘယ်ချိန်သေမလဲ ပြောလို့မရဘူး။ အခုထိ အပြင်မထွက်နိုင်သေးတာ အများကြီး ရှိသေးတယ်”ဟု ကျောက်မဲမြို့မှ ၎င်းဒေသခံ အမျိုးသမီးက သျှမ်းသံတော်ဆင့်ကို ပြောသည်။
ဇွန်လ ၂၈ ရက် ညပိုင်းတွင် ကျောက်မဲမြို့ ရပ်ကွက်(၈)အနီး ကုန်းမုန်ရွာတွင်လည်း လက်နက်ကြီးကြောင့် နေအိမ် ၂ လုံး ထိမှန်ပျက်စီးပြီး ဦးစိုင်းမော်ဆိုသူ အမျိုးသားတစ်ဦးလည်း သေဆုံးသွားခဲ့ကြောင်း ဖြစ်စဉ်သိရှိသူများက ပြောသည်။
ယမန်နေ့ (ဇွန်လ ၂၉ ရက်) နေ့လယ်ပိုင်းတွင် ကျောက်မဲနှင့် နောင်ချိုအကြားရှိ နောင်ပိန်ဂုတ်တွင်းတွင် စစ်ကောင်စီတပ်နှင့် TNLA ပူးပေါင်းတပ်ဖွဲ့တို့ တိုက်ပွဲပြင်းထန်ခဲ့ပြီး ည ၈ နာရီခွဲခန့်တွင် စစ်ကောင်စီတပ်မှ ကျောက်မဲမြို့ပေါ်သို့ လေကြောင်းဖြင့် ထပ်မံဗုံးကြဲ တိုက်ခိုက်ခဲ့ရာ အရပ်သား ထိခိုက်သေဆုံးဒဏ်ရာရမှု ထပ်ရှိနိုင်ကြောင်း ဒေသခံများ ပြောဆိုနေကြပြီး သျှမ်းသံတော်ဆင့်မှ ဆက်လက်စုံစမ်းနေသည်။
TNLA တပ်ဖွဲ့၏ ကျောက်မဲမြို့သိမ်းတိုက်ပွဲ တစ်ပတ်အတွင်း စစ်ကောင်စီတပ်မှ လေကြောင်းဖြင့် မြို့ပေါ် ဗုံးကြဲတိုက်ခိုက်ခြင်းကြောင့် အရပ်သားပြည်သူ သေဆုံးဒဏ်ရာရမှု အများအပြား ရှိလာပြီး ယနေ့ (ဇွန်လ ၃၀ ရက်)အထိ လက်နက်ကြီးနှင့် လေကြောင်းဗုံး ထိမှန်မှုကြောင့် အရပ်သား စုစုပေါင်း (၃၀) ဦးထက်မနည်း သေဆုံးခဲ့ကြောင်း လူမှုကူညီရေးအသင်းများထံမှ သိရသည်။
ကျောက်မဲမြို့ရှိ စစ်ကောင်စီတပ်၏ လက်ကျန်တပ်စခန်းဖြစ်သည့် စကခ-၁၊ ခမရ-၅၀၁/၅၀၂ တပ်ရင်းတို့ကို TNLA တပ်ဖွဲ့က ဆက်လက်ထိုးစစ်ဆင် တိုက်ခိုက်နေပြီး တိုက်ပွဲပြင်းထန်နေကြောင်း ကျောက်မဲဒေသခံများက ပြောသည်။
လက်ရှိတွင် ကျောက်မဲမြို့မှ ဒေသခံ ပြည်သူများမှာ နားပြိန်း၊ နောင်ပိန်လေး၊ ခိုအုံ၊ ခိုမုန်း၊ ဟဲကွီ၊ ပုံဝိုးနှင့် နောင်ပိန်ကျေးရွာဘက်ရှိ ဆွေမျိုးနှင့် ဘုန်းကြီးကျောင်းများတွင် ထွက်ပြေးတိမ်းရှောင်နေရပြီး စစ်ဘေးရှောင် ၅၀၀၀ ကျော်အတွက် စားနပ်ရိက္ခာ အကူအညီများ လိုအပ်နေကြောင်း စစ်ဘေးရှောင်ကူညီသူများထံမှ သိရသည်။
Leave a Comments