သျှမ်းပြည် ပင်လောင်းမြို့နယ်တွင် တိုက်ပွဲများကြောင့် ဒေသခံများ ရွာလုံးကျွတ် ထွက်ပြေးတိမ်းရှောင် နေရကြောင်း စုံစမ်းသိရသည်။
သျှမ်းပြည် ပင်လောင်း – ဖယ်ခုံမြို့နယ်စပ်တွင် စစ်ကောင်စီနှင့် ၎င်းလက်အောက်ခံ ပအိုဝ်းပြည်သူ့စစ် PNO တို့ ပူးပေါင်းပြီး ဇွန်လ ၁၇ ရက်နေ့မှ စ၍ ကရင်နီအမျိုးသားများ ကာကွယ်ရေးတပ် (KNDF)ကို စစ်ကြောင်းထိုး တိုက်ခိုက်ခဲ့သည်။
ထို့နောက် တိုက်ပွဲများဖြစ်ပွားကာ ပင်လောင်း မြို့နယ်ရှိ ကျေးရွာများမှ ဒေသခံနှင့် စစ်ဘေးရှောင် စုစုပေါင်း ၁သောင်းခွဲကျော်သည် ရွာလုံးကျွတ် ထွက်ပြေး တိမ်းရှောင်နေရကြောင်း စစ်ဘေးရှောင်ကူညီသူ အမျိုးသားတစ်ဦးက သျှမ်းသံတောင်ဆင့်ကို ပြောသည်။
“ကျနော်တို့လည်းစစ်ဘေးရှောင်နေရတာ။ရှောင်နေရတာက ရွာလုံးကျွတ်ပဲ။၄ ရက်လောက်ရှိပြီ။ရွာထဲမှာ ဘယ်သူမှ မနေရဲတော့ဘူး။ရွာထဲကိုလည်း လက်နက်ကြီးတွေကျတယ်။ ဒရုန်းတွေ ဝဲနေကြတော့ ရှောင်ကြတာပေါ့။ခုက တစ်ယောက်တစ်ပေါက်ကိုပြေးနေကြတာ။”ဟု စစ်ဘေးရှောင်ကူညီသူ တစ်ဦးက ပြောသည်။
လက်ရှိတွင် ပင်လောင်းမြို့နယ်ရှိ ဒေသခံနှင့် စစ်ဘေးရှောင်များသည် ပင်လောင်းမြို့ပေါ်၊ ညောင်ရွှေမြို့နယ်၊ ဖယ်ခုံမြို့နယ်အနီး နှင့် တောထဲသို့ ထွက်ပြေးတိမ်းရှောင်နေရကြောင်း ၎င်းကဆက်ပြောသည်။
“သူတို့ကပြေးဖို့ နောင်တရားတစ်လမ်းပဲ သွားကြတာများတယ်။ အဲ့လမ်းတလျောက်ကရွာတွေမှာ ပဲနေနေ ကြတာ။ ထွက်ပြေးနေတာက သောင်းနဲ့ချီတယ်။အဲ့ရွာ၈ ရွာမှာလည်း ရွာတိုင်း စစ်ဘေးရှောင် ရှိတယ်။ လူဦးရေက ၁သောင်း ၆ ထောင်ကျော်တယ်။ကျနော် စာရင်းသွားကောက်တဲ့ ၄ ရွာလောက်မှာတော့ နေရာထိုင်ခင်းအရေးပေါ်လို့နေတယ်။”ဟု စစ်ဘေးရှောင်ကူညီသူ တစ်ဦးကပြောသည်။
လက်ရှိ စစ်ဘေးရှောင်များရောက်ရှိနေသည့် တက်ဦးကျေးရွာ၊ ထီးသာကျေးရွာ၊ ဆိုင်းရေကြည်ကျေးရွာ နှင့် လုံကာ ကျေးရွာတွင် စစ်ရှောင် ထောင်နှင့်ချီရောက်ရှိနေပြီး နေရာထိုင်ခင်း အမိုးအကာ နှင့် စားနပ်ရိက္ခာများအရေးပေါ်လိုအပ်နေကြောင်း သိရသည်။
ထို့အပြင် နမ်းနိန်းကျေးရွာ၊ တောင်စလုံးကျေးရွာ၊ မြောက်စလုံးကျေးရွာ၊ လုံးပျဥ်ကျေးရွာ၊ နမ်းဖာမူကျေးရွာ၊ လင်ခံကျေးရွာ၊ ကုန်ပေါကျေးရွာ ၊မိုးဦးကျေးရွာ နှင့် ဗန်းမောက်ကျေးရွာသို့ရောက်ရှိနေသည့် စစ်ရှောင် တစ်သောင်းခွဲကျော်ရှိကြောင်း စစ်ရှောင်ကူညီနေသူများ၏ စာရင်းပေးချက်အရသိရသည်။
Leave a Comments