သျှမ်းပြည်နှင့် မန္တလေးတိုင်း နယ်စပ်မြို့ဖြစ်သည့် မိုးကုတ်မြို့ အနောက်ပိုင်းရှိ စစ်ကောင်စီ တပ်စွဲထားသည့် ကျပ်ပြင် ရဲစခန်းကို ယနေ့ (ဇွန် ၂၇ ရက်) ညနေပိုင်းက TNLA ပူးပေါင်းတပ်များ တိုက်ခိုက် သိမ်းပိုက်လိုက်ပြီဟု ဒေသခံများက ပြောသည်။
TNLA-PDF ပူးပေါင်းတပ်များ မိုးကုတ်မြို့ အနောက်ဘက်၊ ဒေါ်နန်းကြည်တောင်၊ ဗျူဟာကုန်း၊ ပန်းသပြေ၊ ရွှေသာယာ၊ ဖြူရောင်ကုန်း စသည့် စစ်တပ် စခန်းများကို ယမန်နေ့က သိမ်းပိုက်ခဲ့ပြီးနောက် မြို့အနောက်ပိုင်းရှိ စစ်တပ် စခန်းများကို ယနေ့ နံနက်ပိုင်းက စတင် ထိုးစစ်ဆင် တိုက်ခိုက်နေရာ ရဲစခန်းကို သိမ်းပိုက်နိုင်ခဲ့ခြင်း ဖြစ်သည်။
“ကျပ်ပြင်က မြို့အနောက်ဖက်၊ ခုရဲစခန်းသိမ်းလိုက်ပြီ ကြားတယ်။ မနေ့က မြို့အရှေ့ဘက်ကို သိပ်မပစ်ဘူး။ ဒီနေ့ကတော့ မြို့အရှေ့ဘက်ကော အနောက်ဘက်ကော ဗုံးကြဲတယ်။ လက်နက်ကြီးနဲ့ပစ်တယ်။ တစ်နေကုန်ပဲ။ အရှေ့ဘက်ခြမ်းမှာ အိမ်ပျက်စီးတာတွေရှိတယ်။ လူထိတာတွေလည်းရှိတယ်” ဟု မြို့ခံ တစ်ဦးက ယနေ့ အခြေအနေကို ရှင်းပြသည်။
![](https://burmese.shannews.org/wp-content/uploads/2024/06/449319139_791149069791473_1059473099926569423_n-1024x768.jpg)
TNLA ပူးပေါင်းတပ်များ မြို့တွင်းဝင်ရောက်နေပြီး စစ်ကောင်စီက အဆက်မပြတ် လက်နက်ကြီး ပစ်ခတ်နေသောကြောင့် ရဲစခန်း သိမ်းပိုက်မှုနှင့် ပတ်သက်သည့် အခြေအနေ အသေးစိပ် သိရှိရန် ခက်ခဲနေကြောင်း မြို့ခံများက ဆိုသည်။
“အရှေ့ပိုင်းက အောင်ချမ်းသာဘက် လက်နက်ကြီးကျတာ အိမ်တွေထိတယ်။ အခုလည်း ဂျက်လေယာဥ်သံတွေ ကြားနေတယ်။ ဖုန်းက တယ်လီနော ရသေးတယ်” ဟု ယနေ့ ညနေပိုင်း အခြေအနေကို အခြားမြို့ခံ တစ်ဦးက ရှင်းပြသည်။
လက်ရှိ မြို့ပတ်ဝန်းကျင်တွင် တိုက်ပွဲများ ဖြစ်ပွားနေကာ မိုးကုတ်-မန္တလေး ကားလမ်း ပိတ်နေသောကြောင့် တိမ်းရှောင်ရန် ခက်ခဲသဖြင့် မြို့ခံ အများအပြား မြို့တွင်း ပိတ်မိနေပြီး မြို့တွင်းတိုက်ပွဲများ ဖြစ်ပွားမည်ကို စိုးရိမ်ကြောင်း မြို့ခံများက ပြောသည်။