သျှမ်းပြည် နောင်ချိုမြို့ပေါ်တွင် စစ်ကောင်စီတပ်မှ လေကြောင်းပျံဝဲနေပြီး လက်ကျန်တပ်စခန်းဖြစ်သည့် ခမရ-၁၁၄ နှင့် အမြောက်တပ်-၆၀၆ တပ်ရင်းတို့ကို TNLA နှင့် PDF ပူးပေါင်းတပ်ဖွဲ့များက ဆက်လက်တိုက်ခိုက်နေကြောင်း စုံစမ်းသိရသည်။
ယနေ့ (ဇွန်လ ၂၇ ရက်) နံနက် ၈ နာရီခန့်မှ စတင်ပြီး နောင်ချိုမြို့တွင် နောက်ဆုံးကျန်ရှိသည့် စစ်ကောင်စီ ခြေမြန်တပ်ရင်း ခမရ-၁၁၄ နှင့် မြို့တောင်ဘက်ရှိ အမြောက်တပ်-၆၀၆ တို့ကို တအာင်း(ပလောင်) အမျိုးသားလွတ်မြောက်ရေးတပ်မတော် TNLA နှင့် မန္တလေး-PDF ပူးပေါင်းတပ်တို့က ထိုးစစ်ဆင်တိုက်ခိုက်နေပြီး နံနက် (၁၁) နာရီခန့်တွင် မြို့ပေါ်သို့ လေယာဉ်ပျံဝဲနေကြောင်း နောင်ချိုဒေသခံများက ပြောသည်။
“ရပ်စောက်အထွက်လမ်းဘက်မှာ ရှိတဲ့ ဒုံးတပ်မှာ လက်နက်ကြီး၊ လက်နက်ငယ်နဲ့ အကုန်လုံး တပ်ထဲဝင်တိုက်နေကြပြီ။ ၁၁ ကျော်လောက်ကစပြီးတော့ မြို့ပေါ်ကို ရဟတ်ယာဉ်နဲ့ လာဝဲနေတာ။ ကြည့်ရသလောက် စခန်းကျဖို့ နီးလာရင်တော့ လေယာဉ်နဲ့ စပစ်လောက်တယ်။ ပြည်သူတွေကတော့ အလံဖြူထောင်ပြီး စထွက်နေကြပြီ”ဟု နောင်ချိုဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် ကျောက်မဲနှင့် နောင်ချိုမြို့ကြားရှိ နောင်ပိန်ဂုတ်တွင်း အနီးရှိ စစ်ကောင်စီတပ် စခန်းချနေရာများကို ယနေ့ (ဇွန်လ ၂၇ ရက်) နံနက် ၅ နာရီခန့်မှ စ၍ TNLA နှင့် PDF ပူးပေါင်းတပ်ဖွဲ့များက ထိုးစစ်ဆင် တိုက်ခိုက်နေပြီး တိုက်ပွဲပြင်းထန်လျက်ရှိကြောင်း ဒေသခံများထံမှ သိရသည်။
နောင်ချိုမြို့ရှိ စစ်ကောင်စီလက်အောက်ခံ ခမရ-၁၁၅ တပ်ရင်း၊ ရဲစခန်း၊ ဆေးရုံနှင့် တိုးဂိတ်တို့ကို အပြည့်အဝ သိမ်းပိုက်ထိန်းချုပ်ထားနိုင်ပြီး လက်ကျန်တပ်စခန်းများ ဖြစ်သည့် ခမရ-၁၁၄ နှင့် အမြောက်တပ်-၆၀၆ တို့ကို ဆက်လက်ထိုးစစ်ဆင်နေကြောင်း TNLA နှင့်အတူ စစ်ဆင်ရေး ဖော်ဆောင်နေသည့် မန္တလေး-PDF တပ်ဖွဲ့က ယမန်နေ့ (ဇွန်လ ၂၆ ရက်)တွင် သတင်းထုတ်ပြန်သည်။
အလားတူ နောင်ချိုမြို့နယ် ကျောက်ကြမ်းရွာသို့ စစ်ကောင်စီတပ်မှ Y-12 ထောက်ပို့ယာဉ်ဖြင့် ဗုံး ၂ လုံး ကြဲချခဲ့သည့်အပြင် ညအချိန်တွင်လည်း ဂျက်ဖိုက်တာဖြင့် ထပ်မံဗုံးကြဲတိုက်ခိုက်ခဲ့ကြောင်း TNLA သတင်းနှင့် ပြန်ကြားရေးဌာနက ထုတ်ပြန်ထားသည်။
Leave a Comments