သျှမ်းပြည် သီပေါမြို့တွင် စစ်ကောင်စီနှင့် တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) တို့သည် ယနေ့ (ဇွန် ၂၅)ရက် ညပိုင်းအထိ အပစ်အလှန် ပစ်ခတ်မှုဖြစ်ပွားနေပြီး တိုက်ပွဲပြင်းထန်လာမည်ကို ဒေသခံများ စိုးရိမ်နေကြောင်း စုံစမ်းသိရသည်။
သီပေါမြို့တွင် ယနေ့ (ဇွန် ၂၅)ရက် ညနေ (၅)နာရီမှစတင်ကာ လက်ရှိသတင်းရေးသားနေသည့် အချိန်ထိ စစ်ကောင်စီတပ်နှင့် TNLA တပ်ဖွဲ့တို့ အပြန်အလှန် ပစ်ခတ်နေကြသဖြင့် ဒေသခံများ စိုးရိမ်ထိတ်လန့်မှု ဖြစ်ပွားနေကြောင်း သီပေါမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ညနေ ၅နာရီက စကြားရတာ။ အခုထိပဲ ၁၅မိနစ် တကြိမ် ပစ်နေတာ။ ညပိုင်းကျတော့ စက်သေနတ်ဆွဲတာ တောက်လျှောက်ပဲ ရမ်းပစ်တာ၊ ညဆိုတော့ လန့်တာပေါ့။ တံတားတွေလည်း ကျိုးထားတော့ တိုက်ပွဲပြင်းလာရင် ထွက်ပြေးလို့လည်း အဆင်မပြေဘူး။ ဘယ်ကို ပြေးရမှန်းလည်း မသိဘူး”ဟု ၎င်းဒေသခံအမျိုးသားက ဆိုသည်။
ယနေ့ (ဇွန်လ ၂၅ ရက်) နံနက်အစောပိုင်းက သီပေါမြို့အခြေစိုက် စစ်ကောင်စီတပ် ခလရ-၂၃ တပ်ရင်းအနီးတဝိုက်တွင် TNLA တပ်ဖွဲ့နှင့် နှစ်ဘက်ပစ်ခတ်မှု ဖြစ်ပွားခဲ့ပြီးနောက် ညနေ ၅ နာရီကျော်ခန့်မှ စတင်ပြီး ဒုဋ္ဌဝတီတံတားကြီး ထိပ်မှနေ၍ စစ်ကောင်စီတပ်က တိမ်တောင်ဘက်သို့ လက်နက်ကြီးအပြင် စက်သေနတ်ဖြင့် ရမ်းသမ်းပစ်ခတ်နေကြောင်း သီပေါဒေသခံများက ပြောသည်။
“ညနေပိုင်းတုန်းက တောက်လျှောက် လက်နက်ကြီးကော၊ လက်နက်ငယ်ကော ပစ်နေကြတာ သံတံတားကြီးမှာ။ ဒုဋ္ဌဝတီတံတားကြီးနဲ့ ညနေရှုခင်းကြည့်တဲ့ တိမ်တောင်ကနေ ပစ်ကြတာ။ တံတားကြီးကနေ စစ်တပ်က လက်နက်ကြီးနဲ့ ပစ်နေတာ၊ ၇ နာရီခွဲလောက်မှာ ခဏရပ်သွားပြီး အခုလောလောဆယ် ၁ လုံးချင်း ပစ်နေတယ်။ မြို့ထဲတော့ ငြိမ်နေသေးတယ်”ဟု ၎င်းသီပေါဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
ဒုဋ္ဌဝတီတံတားကြီး ထိပ်မှနေ၍ စစ်ကောင်စီတပ်က ပစ်ခတ်လိုက်သည့် လက်နက်ကြီးကျည်များသည် တိမ်တောင်အထိ မရောက်ဘဲ ပန်စောက်မိန်းနှင့် မြို့ဟောင်းရပ်ကွက်ဘက်ရှိ ဓာတ်ဆီဆိုင်၊ ဝပ်ရှော့ စသည့် ဆိုင်တန်းဘက်သို့ ကျရောက်ခဲ့ရာ ထိခိုက်ပျက်စီးမှု ရှိနေပြီး ပြည်သူများ ထွက်ပြေးတိမ်းရှောင်နေရကြောင်း သိရသည်။
အလားတူ သီပေါ-လားရှိုး ပြည်ထောင်စုလမ်းမပေါ် ဆွတ်လန်းရွာအနီးရှိ တံတားတစ်စင်းလည်း ယနေ့ (ဇွန်လ ၂၅) ရက် နံနက်ပိုင်း ၉ နာရီဝန်းကျင်တွင် မိုင်းခွဲဖျက်ဆီးခံလိုက်ရပြီး ခရီးသည်ကားများလည်း သွားလာ၍မရကာ ပိတ်မိနေကြကြောင်း သိရသည်။
Leave a Comments