သျှမ်းပြည် လားရှိုး-သီပေါပြည်ထောင်စုလမ်းမပေါ်ရှိ ဆွတ်လန်းရွာတံတားတစ်စင်း ယနေ့ (ဇွန်လ ၂၅) ရက် နံနက်ပိုင်း ၉ နာရီဝန်းကျင်တွင် ဖျက်ဆီးခံလိုက်ရကြောင်း စုံစမ်းသိရသည်။
အဆိုပါ တံတားကို မိုင်းခွဲဖျက်ဆီးလိုက်ခြင်းဖြစ်ပြီး လက်ရှိအချိန်ထိ ခရီးသည်ကားများလည်း သွားလာ၍မရကာ ပိတ်မိနေကြကြောင်း သီပေါမြို့ကားဆရာတစ်ဦးက သျှမ်းသံတော်ဆင့်ကို ပြောသည်။
“တံတားကို ပလောင်စစ်သားတွေကလာခွဲတာ။ ခဏကတော့ အလယ်မှာပဲ ပေါက်သွားတာ ကားလေးတွေ သွားလို့ရသေးတယ်။ ၉ ခွဲလောက်က နောက်တစ်လုံးခွဲတာ အကုန်ကျိုးပီနဲ့တူတယ်။ သွားလို့မရတော့ဘူး။ ကားတွေလည်း အကုန်ပြန်လှည့်ကြပြီ။ လွတ်တဲ့ဆိုင်မှာ သွားရပ်ထားကြတယ်” ဟု ၎င်းကပြောသည်။
ဆွတ်လန်းရွာကတံတားကို တအာင်း (ပလောင်) အမျိုးသားလွတ်မြောက်ရေးတပ်မတော် TNLA ဘက်က မိုင်းခွဲဖျက်ဆီးခဲ့ကြောင်း ဒေသခံများကပြောဆိုသော်လည်း သျှမ်းသံတော်ဆင့်က သီခြားအတည်ပြု၍ မရပေ။
လက်ရှိ ဆွန်လန်းကျေးရွာအနီးတဝိုက်တွင်လည်း သေနတ်ပစ်ခတ်သံများ တစ်ချက်ချက် ကြားနေရသည်ဟု ဆွတ်လန်းရွာဒေသခံက ပြောသည်။
“မနေ့ ည ကတည်းက ဆွန်လန်းရွာမှာ ပလောင်စစ်သားတွေရောက်နေတာ။ ရွာသူရွာသားတွေ တရွာလုံးနီးပါး ရှောင်ရတယ်။ အခုလည်း လက်နက်သံတွေ တစ်ချက်ချက်ကြားနေရတယ်။ လက်နက်ကြီးသံတော့ စိပ်တယ်။ ကျနော်တို့လည်း ဘယ်ပြေးရမှန်းမသိတော့ဘူး။ ဒီတံတားဖျက်ရင် ဘယ်လိုမှသွားလို့မရတော့ဘူး” ဟု ၎င်းဒေသခံတစ်ဦးက ပြောသည်။
ပြီးခဲ့သည့် ဇွန်လ ၁၂ ရက် သီပေါမြို့နယ် ကွန်စံလိတ်ရွာအနီးရှိ သီပေါ-နမ္မတူလမ်းမကြီးပေါ်တွင် စစ်ကောင်စီက မြောင်းတူးပြီး လမ်းကြောဖြတ်တောက်ထားသည်။
ထို့အပြင် ကျောက်မဲမြို့နယ်တွင် စစ်ကောင်စီနှင့် TNLA တို့ တိုက်ပွဲ ဖြစ်ပွားနေပြီး၊ လားရှိုးမြို့နယ်တွင်လည်း စစ်ကောင်စီနှင့် MNDAA တို့ တိုက်ပွဲ ဖြစ်ပွားနေလျက်ရှိသည်။
Leave a Comments