စစ်ကောင်စီ၏ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC) နှင့် နိုင်ငံရေးပါတီများ၏ အလုပ်အဖွဲ့တို့ ၂၀၀၈ အခြေခံဥပဒေ ပြင်ဆင်ရေးအတွက် နေပြည်တော်တွင် တွေ့ဆုံဆွေးနွေးခဲ့ကြောင်း စုံစမ်းသိရသည်။

ယမန်နေ့ (ဇွန်လ ၁၉၊ ၂၀ ရက်)တို့တွင် စစ်ကောင်စီထံ ပြန်လည်မှတ်ပုံတင်ထားသည့် နိုင်ငံရေးပါတီများ အစုအဖွဲ့၏ အလုပ်အဖွဲ့နှင့် အမျိုးသားစည်းလုံးညီညွတ်ရေးနှင့် ငြိမ်းချမ်းရေး ဖော်ဆောင်မှုညှိနှိုင်းရေးကော်မတီ (NSPNC) တို့ ၂၀၀၈ ဖွဲ့စည်းပုံအခြေခံဥပဒေ ပြင်ဆင်ဖြည့်စွက်ရေးတို့ကို တွေ့ဆုံဆွေးနွေးခဲ့ကြောင်း စစ်ကောင်စီက သတင်းထုတ်ပြန်သည်။

နေပြည်တော်တွင် ပြုလုပ်ခဲ့သည့် အဆိုပါဆွေးနွေးပွဲသို့ နိုင်ငံရေးပါတီများ အစုအဖွဲ့၏ အလုပ်အဖွဲ့တွင် ခေါင်းဆောင်တာဝန်ယူထားကြသည့် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP)မှ ဒေါက်တာအောင်မြတ်ဦး၊ ရှမ်းနှင့်တိုင်းရင်းသားများ ဒီမိုကရက်တစ်ပါတီ (ကျားဖြူပါတီ-SNDP)) ဥက္ကဋ္ဌ ဦးစိုင်းအိုက်ပေါင်း၊ ပြည်သူ့ပါတီ (PP) မှ ဦးကိုကိုကြီး၊ ရခိုင့်ဦးဆောင်ပါတီ (AFP) မှ ဒေါက်တာအေးမောင် အပါအဝင် နိုင်ငံရေးပါတီ (၁၆)ခုမှ ကိုယ်စားလှယ်များ တက်ရောက်ခဲ့ကြောင်း သိရသည်။

“အဓိကကတော့ ကျနော်တို့အဖွဲ့နဲ့ ဆက်ပြီးတော့သွားမယ့် ဆွေးနွေးမယ့်ပုံစံလေးတွေ ဘယ်လိုဖြစ်ချင်လဲပေါ့ ဒါလေးတွေ ဆွေးနွေးတာ ရှိပါတယ်။ နောက်ပြီးတော့ ၂၀၀၈ ဖွဲ့စည်းပုံအခြေခံဥပဒေထဲက ပြင်ချင်တဲ့ အချက်တွေကို အကြမ်းဖျင်း ဘယ်ဟာတွေ ပြင်သင့်တယ်၊ ဘယ်ဟာတွေ ဖြည့်စွက်သင့်တယ်ဆိုတာ ဆွေးနွေးကြတာပေါ့”ဟု နိုင်ငံရေးပါတီအစုအဖွဲ့၏ အလုပ်အဖွဲ့ခေါင်းဆောင်ဖြစ်သူ ဒေါက်တာအောင်မြတ်ဦးက သျှမ်းသံတော်ဆင့်ကို ပြောသည်။

စစ်ကောင်စီ၏ NSPNC နှင့် တွေ့ဆုံဆွေးနွေးခဲ့သည့် နိုင်ငံရေးပါတီများ အစုအဖွဲ့၏ အလုပ်အဖွဲ့ကို ပြည်ထောင်စုရွေးကောက်ပွဲကော်မရှင် (UEC) ထံ ပြန်လည်မှတ်ပုံတင်ခဲ့သည့် နိုင်ငံရေးပါတီ ၄၇ ပါတီထဲမှ ပါတီ (၁၆) ခု အဆိုပြု၍ ကိုယ်စားလှယ် (၁၆) ယောက်ကို မေလ ၂၅ ရက်နေ့တွင် ရွေးချယ်ခဲ့ကြောင်း သိရသည်။

“အခေါ်အဝေါ်ကတော့ နိုင်ငံရေးပါတီများ အစုအဖွဲ့၏ အလုပ်အဖွဲ့ပေါ့၊ အဲ့လိုခေါ်ပြီး ကိုယ်စားလှယ် ၁၆ ယောက်ရွေးပြီးမှ ဒီမှာလာပြီး ဆွေးနွေးတာပါ။ ကျနော်တို့ မေ ၂၅/၂၆ မှာ ရွေးခဲ့တဲ့ (၁၆) ပါတီက ကိုယ်စားလှယ်တွေပါ။ အဲ့ကိုယ်စားလှယ်တွေနဲ့ NSPNC နဲ့ လာပြီးမှ တွေ့ဆုံဆွေးနွေးတာပါ၊ အလွတ်သဘော တွေ့ဆုံဆွေးနွေးမှု လုပ်တာပါ”ဟု ဒေါက်တာအောင်မြတ်ဦးက သျှမ်းသံတော်ဆင့်ကို ဆက်ပြောသည်။

စစ်ကောင်စီ၏ NSPNC နှင့် နိုင်ငံရေးပါတီများ အစုအဖွဲ့၏ ၂ ရက်တာ တွေ့ဆုံဆွေးနွေးမှုအတွင်း ၂၀၀၈ ဖွဲ့စည်းပုံအခြေခံဥပဒေမှ ပြင်ဆင်သင့်သည်ဟု ယူဆရသော အချက်များ၊ ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စုတည်ဆောက်ရေး ကိစ္စများကို ဆွေးနွေးခဲ့ကြကြောင်း စစ်ကောင်စီထုတ် မြန်မာ့အလင်း သတင်းစာတွင် ဖော်ပြသည်။

အလားတူ ဖွဲ့စည်းပုံအခြေခံဥပဒေ ပြင်ဆင်ရေးနှင့် ပတ်သက်၍ တိုင်းရင်းသားလက်နက်ကိုင် အဖွဲ့အစည်းများလည်း ဆွေးနွေးမှုများ ရှိနေကြောင်း ကြားသိရသော်လည်း မည်သို့ရှေ့ဆက် ဆောင်ရွက်သွားမည်ကို မသိနိုင်သေးကြောင်း နိုင်ငံရေးလေ့လာသုံးသပ်သူများက ပြောဆိုသည်။