သျှမ်းပြည် ရပ်စောက်မြို့နယ်တွင် ရှမ်းပြည်တိုးတက်ရေးပါတီ (SSPP/SSA) နှင့် သျှမ်းပြည် ပြန်လည်ထူထောင်ရေးကောင်စီ (RCSS/SSA) တို့အချင်းချင်း နှစ်ဘက်ထိတွေ့ ပစ်ခတ်မှု ထပ်မံဖြစ်ပွားခဲ့ကြောင်း စုံစမ်းသိရသည်။

ဇွန်လ (၁၉) ရက် နံနက် ၉ နာရီခန့်မှ စတင်ပြီး ရပ်စောက်မြို့နယ် အရှေ့မြောက်ဘက်ရှိ အင်တောမြို့အနီး ကျိုင်းခမ်းကျေးရွာအုပ်စုတွင် SSPP နှင့် RCSS တပ်ဖွဲ့တို့ နှစ်ဘက်ထိတွေ့ ပစ်ခတ်မှု ထပ်မံဖြစ်ပွားခဲ့ရာ ပြောင်းဖူးစိုက်ပျိုးနေသည့် တောင်သူများ စိုးရိမ်ထိတ်လန့်ပြီး နေအိမ်သို့ ပြန်လာခဲ့ကြရကြောင်း အင်တောမြို့ဒေသခံများက ပြောသည်။

“ သျှမ်းတပ်နှစ်တပ် အချင်းချင်း ပစ်ကြတဲ့ သေနတ်သံက ကောင်းကောင်းကြားရတယ်။ ဝမ်ဟွေနဲ့ နားလင်းဘက်က ပြောင်းစိုက်ဖို့ ခြံမှာ သွားအိပ်တဲ့လူတွေ သေနတ်ပစ်သံ ကြားတော့ ရွာထဲအပြေးပြန်လာကြတယ်”ဟု အင်တောဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ရပ်စောက်မြို့နယ်တွင် SSPP နှင့် RCSS တပ်ဖွဲ့တို့၏ ထိတွေ့ပစ်ခတ်မှု ပတ်သက်ပြီး SSPP ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်နှင့် RCSS ပြောရေးဆိုခွင့်ရှိသူ ဗိုလ်မှူးစိုင်းခမ်းစံ တို့ထံ သျှမ်းသံတော်ဆင့်မှ ဖုန်းဖြင့် ဆက်သွယ်မေးမြန်းရန် ကြိုးစားခဲ့သော်လည်း ဖုန်းလက်ခံဖြေကြားခြင်း မရှိခဲ့ပေ။

အလားတူ ဇွန်လ (၁၆) ရက် နံနက် ၈ နာရီကျော်တွင် ရပ်စောက်မြို့နယ် ကျောက်ဂူတိုက်နယ်ရှိ တောင်ထိပ်ကျေးရွာအနီးတွင် ထိပ်တိုက်ထိတွေ့မှုဖြစ်ကာ အချင်းချင်း ပစ်ခတ်မှုဖြစ်ပွားခဲ့ပြီး နှစ်ဘက်တပ်သားများ ထိခိုက်ဒဏ်ရာရရှိခဲ့ကြောင်း ရပ်စောက်မြို့နယ် ကျောက်ဂူဒေသခံများက ပြောသည်။

“သျှမ်းတပ်အချင်းချင်း ပစ်ကြတာ တကယ်ကို မဖြစ်သင့်တဲ့ ကိစ္စလေ၊ သျှမ်းလူထုက သူတို့ကို စိတ်နာတာမျိုးပဲ ဖြစ်မှာလေ။ ပြည်သူတွေဆီ စစ်သားကောက်ပြီးတော့ ကိုယ့်လူမျိုးအချင်းချင်း ပြန်တိုက်ရတာ ရှင်းရှင်းပြောရရင် ဘယ်အဖွဲ့မှ အသုံးမကျဘူး။ ဒီလထဲပဲ ပစ်ကြတာ ၃/၄ ခေါက် မနည်းတော့ဘူး ရှိပြီ”ဟု အင်တောမြို့မှ ၎င်းဒေသခံအမျိုးသားက သျှမ်းသံတော်ဆင့်ကို ဆက်ပြောသည်။

လက်ရှိတွင် SSPP နှင့် RCSS တပ်ဖွဲ့တို့သည် ရပ်စောက်မြို့နယ်အတွင်းရှိ အင်တောမြို့၊ ကျိုင်းခမ်း၊ နောင်လုံ၊ ကျောက်ဂူကျေးရွာအုပ်စု အနီးတဝိုက်တွင် နှစ်ဘက်တင်းမာမှု ဖြစ်ပေါ်လျက်ရှိပြီး မကြာခဏ မိုင်းဆွဲတိုက်ခိုက်ခြင်းများ (၅) ကြိမ်ထက်မနည်း ဖြစ်ပွားခဲ့ကြောင်းလည်း ဒေသခံများက ပြောသည်။

ဇွန်လ ပထမပတ်အတွင်းကလည်း ရပ်စောက်မြို့နယ် တောင်ထိပ်ကျေးရွာ ကျောက်အိုးတံတားအနီးတွင် လှုပ်ရှားသွားလာနေသည့် SSPP စစ်ကြောင်းကို RCSS တပ်ဖွဲ့မှ ပဒေသာမိုင်းထောင် ဖောက်ခွဲခဲ့စဉ်အတွင်း အမျိုးသမီးတစ်ဦး အပါအဝင် နှစ်ဦးဒဏ်ရာရရှိခဲ့ပြီး ကျောက်ဂူဆေးရုံနှင့် တောင်ကြီးဆေးရုံတွင် ဆေးကုသမှု ခံယူနေကြောင်း ဒေသခံများထံမှ သိရသည်။

ရပ်စောက်မြို့နယ်အတွင်း မိုင်းထောင်တိုက်ခိုက်ခံရမှုများ ဖြစ်ပွားလာခြင်းကြောင့် တောင်ထိပ်၊ လွယ်ကန်၊ ဆီဆုံဂနိုင်၊ ကုန်ဟန်း၊ ဝမ်ဟွေနှင့် နားလင်း စသည့် ကျေးရွာများမှ ပြည်သူများမှာ တောင်ယာသွားရောက် လုပ်ကိုင်ရန် စိုးရိမ်ထိတ်လန့်နေကြကြောင်း ဒေသခံများက ပြောသည်။