သျှမ်းပြည် လားရှိုးမြို့နှင့် ကျောက်မဲမြို့တို့တွင် စစ်ကောင်စီလက်အောက်ခံ ရဲအဖွဲ့အစည်းများမှ VPN အက်ပလီကေးရှင်းများကို စစ်ဆေးကာ ငွေညှစ်နေကြောင်း သတင်းရရှိသည်။
ဇွန်လ ဒုတိယပတ်မှစတင်ပြီး လားရှိုးမြို့နှင့် ကျောက်မဲမြို့တို့တွင် သွားလာနေသူများ၏ ဖုန်းထဲရှိ VPN အက်ပလီကေးရှင်းများကို စစ်ကောင်စီလက်အောက်ခံ ရဲအဖွဲ့အစည်းများမှ စစ်ဆေးပြီး ငွေညှစ်တောင်းခံမှုများ ပြုလုပ်နေကြောင်း လားရှိုးမြို့ဒေသခံ အသက် ၄၀ ဝန်းကျင် အမျိုးသားတစ်ဦးက သျှမ်းသံတော်ဆင့်ကို ပြောသည်။
“လားရှိုးမှာတော့ အခုက အခြေအနေ မကောင်းဘူး။ ဆိုင်ကယ်တွေ ကားတွေစစ်တယ်၊ VPN တွေစစ်တယ် အဲ့လိုပေါ့။ အခုမြင်နေရသလိုဆို သူတို့က လုပ်စားနေတာလေ စစ်ပြီးပိုက်ဆံတောင်း နေကြတာလေ။ နေပြည်တော်က VPN ဉပဒေကို မပြဋ္ဌာန်းသေးဘူး။ သူတို့အောက်က လူတွေလုပ်စားနေတာ။ သူတို့လည်း သတင်းကြည့်ဖို့ VPN သုံးနေရတာ”ဟု အသက် ၄၀ ဝန်းကျင် လားရှိုးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အလားတူ ကျောက်မဲမြို့တွင်လည်း စစ်ကောင်စီ ရဲတပ်ဖွဲ့က ပြည်သူများ၏ ဖုန်းထဲရှိ VPN အက်ပလီကေးရှင်းများကို စစ်ဆေးကာ ငွေညစ်တောင်းခံမှုများ ပြုလုပ်နေပြီး လမ်းပြတ်တောက်မှုများကြောင့် မြို့တွင်းတွင်လည်း ဒီဇယ်ဆီများ ပြတ်လတ်နေကြောင်း ကျောက်မဲမြို့ ဒေသခံ အမျိုးသမီးတစ်ဦးက ပြောသည်။
“ဒီမှာ VPN စစ်တယ်လို့တော့ သိရတယ်။ ဒီဘက် ရဲတွေ စစ်သားတွေက မြို့ထဲမှာဆို အရပ်သားလိုပဲ ဝတ်တယ်လေ သေနတ်ကိုင်ပြီးတော့။ အခုဆို မြို့ထဲသွားရင် ဖုန်းမပါရဲဘူး။ ဒီဇယ်ဆီလည်း ဝယ်မရတော့ဘူး လမ်းကြောပိတ်တာတွေကြောင့် ဆီပြတ်နေတာ”ဟု ကျောက်မဲမြို့ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
အလားတူ သျှမ်းပြည် တောင်ကြီးမြို့ရှိ လမ်းမကြီးများပေါ်တွင် စစ်ကောင်စီလက်အောက်ခံ ရဲတပ်ဖွဲ့မှ ဖုန်းထဲထည့်ထားသည့် VPN အက်ပလီကေးရှင်းများကို စစ်ဆေးနေကာ ငွေညှစ်တောင်းခံနေကြောင်း သိရသည်။
