ယခုရက်ပိုင်း မိုးသည်းထန်စွာ ရွာသွန်းမှုကြောင့် သျှမ်းပြည်မြောက်ပိုင်း သိန္နီမြို့နယ် မိုင်းလီလမ်း ပျက်စီး၍ ကားများနွံနစ်ကာ ကားသမားများ အခက်အခဲများစွာ ကြုံတွေ့နေကြောင်း သတင်းရရှိသည်။
သျှမ်းပြည်မြောက်ပိုင်း လားရှိုး-မူဆယ်သွားလမ်း မိုင်းလီရွာအနီးတွင် မိုးသည်းထန်စွာ ရွာသွန်းမှုကြောင့် လမ်းများ ပျက်စီးကာ ကားနွံနစ်မှု၊ ကားပျက်စီးမှု ကြုံတွေ့နေကြောင်း ကားသမားတစ်ဦးက သျှမ်းသံတော်ဆင့်ကို ပြောသည်။
“အဲ့မှာ မိုးရွာတော့ မိုင်းလီနားက ချောင်းကို ကျော်ပြီးသွားရင် ကားတွေ တော်တော်များများ ပိတ်နေတာ။ မိုးလီရွာမှာ အတက်ကားတွေကော အဆင်းကားတွေကော တယောက်မှကို ဖုန်းဆက်လို့ကို မရတာ ပိတ်မိနေကြလို့။ လမ်းတွေက အရမ်းကြမ်းတယ် အခြေအနေ တော်တော်ဆိုးတယ်”ဟု ၎င်းကားဆရာက ပြောသည်။
ယမန်နေ့တွင် ကားလမ်းများ ရွှံ့နွံများဖြစ်ကာ ပျက်စီးနေပြီး၊ အချို့ကားများလည်း အောက်ပိုင်းနိမ့်မှုကြောင့် နွံနစ်၍ ရုန်းနေရသည့် အခြေအနေဖြစ်ကြောင်း၊ ထိုလမ်းကြောတလျှောက်တွင် ကားများရာနှင့်ချီ ပိတ်မိနေကြောင်း သိရသည်။
ထို့အပြင် စစ်ကောင်စီမှ သီပေါမြို့နယ် ကွန်စံလိတ်ရွာအနီးရှိ သီပေါ-နမ္မတူ ကားလမ်းမကြီးပေါ်တွင် မြောင်းတူးပြီး လမ်းကြောဖြတ်တောက်ထားလိုက်ကြောင်း သီပေါဒေသခံများက ပြောဆိုသည်။
အလားတူ ဇွန်လ ၁၂ ရက်ကလည်း လားရှိုးမြို့နယ်အတွင်း မိုင်းယော်တိုက်နယ်ရှိ ကောင်းဟုန်းကျေးရွာတွင် လမ်းမကြီးပေါ် စစ်ကောင်စီတပ်က မြောင်းတူးဖော်ကာ လမ်းကြောပိတ်ဆို့လိုက်ခြင်းကြောင့် ကားအများအပြား ပိတ်မိနေကြောင်း လားရှိုးဒေသခံများက ပြောသည်။
Leave a Comments