Sunday, July 14, 2024

မူဆယ် ကလေးငယ်တစ်ဦးကို ၁ နှစ်ကျော်ကြာ မုဒိမ်းကျင့်ခဲ့သည့်အမျိုးသား ဖမ်းဆီးခံရ

Must read

သျှမ်းပြည် မူဆယ်မြို့နယ်တွင် နေထိုင်သည့် ကလေးငယ်တစ်ဦးအပေါ် ၁ နှစ်ကျော်ကြာ မုဒိမ်းကျင့်ခဲ့သည့် အမျိုးသားကို ရဲများက ဝင်ရောက်ဖမ်းဆီးခဲ့ကြောင်း စုံစမ်းသိရသည်။

ယနေ့ (ဇွန်လ ၁၃ ရက်) နေ့လည် ၁၁ နာရီခွဲခန့်တွင် မူဆယ်မြို့နယ်ရှိ အသက် ၃ နှစ်အရွယ် ကလေးငယ်တစ်ဦးကို ၁ နှစ်ကျော်ကာလအတွင်း မကြာခဏ မုဒိမ်းကျင့်ကျူးလွန်ခဲ့သည့် အသက် ၄၄ နှစ်အရွယ် အမျိုးသားကို ရဲတပ်ဖွဲ့မှ ဟိုမွန်ရပ်ကွက်တွင် ဝင်ရောက်ဖမ်းဆီးခဲ့ကြောင်း မူဆယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ကလေးက ငယ်တော့ ယောကျ်ားလေးမြင်ရင်တောင် ကြောက်နေပြီး စိတ်ဒဏ်ရာရတယ်လို့ ပြောလို့ရတာပေါ့။ ကလေးမလေးက အသက် ၁ နှစ်နဲ့ ၇လကတည်းက မုဒိမ်းကျင့်ခံခဲ့ရတာ။ သူ့အဖွားကို တိုင်ပြီး သူအဖွားကလည်း ဆေးခန်းတွေ သွားပြတာပေါ့။ အဲ့တာနဲ့ တိုင်ပင်ပြီး သက်ဆိုင်ရာတွေအထိ ရောက်သွားတာ။ ရဲကတော့ ဖမ်းပြီး အမှုစစ်နေတယ်”ဟု မူဆယ်မြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

ကလေးငယ်အား မုဒိမ်းမှု ကျူးလွန်ခဲ့သည့် ၎င်းအမျိုးသားသည် အဖွားဖြစ်သူ၏ နောက်အိမ်ထောင်ဖြစ်ပြီး အတင်းအဓမ္မပြုကျင့်ခဲ့သည့် ၎င်းအမျိုးသားကို သက်ဆိုင်ရာအဖွဲ့အစည်းမှ စစ်ဆေး၍ အမှုဖွင့်အရေးယူ ဆောင်ရွက်သွားမည်ဖြစ်ကြောင်း သိရသည်။

လက်ရှိတွင် မုဒိမ်းမှုကျူးလွန်ခံခဲ့ရသည့် ကလေးငယ်ကို ကျန်းမာရေး စစ်ဆေးထားသော်လည်း ဆေးစစ်ချက် အဖြေမသိရသေးကြောင်း ၎င်းဒေသခံ အမျိုးသားက ဆက်ပြောသည်။

စစ်တပ်အာဏာသိမ်းပြီးနောက်ပိုင်းတွင် သျှမ်းပြည်တဝှမ်း သက်ငယ်မုဒိမ်းမှု ၁၀ ရာခိုင်နှုန်းခန့် မြင့်တက်လာခဲ့ကြောင်း သိရပြီး မြန်မာနိုင်ငံတွင် သက်ငယ်မုဒိမ်းမှု ပပျောက်ရန်အတွက် လူမှုကူညီရေးအဖွဲ့အစည်းများနှင့် လူ့အသိုင်းအဝိုင်းမှ ကြိုးစားဆောင်ရွက်နေသော်လည်း ပိုမို မြင့်တက်လာကြောင်း သိရသည်။

မူဆယ်မြို့သည် တရုတ်နယ်စပ် မြို့တစ်မြို့ဖြစ်သည့်အလျောက် လက်နက်ကိုင်ပေါများကာ လူသတ်မှု မကြာခဏ ဖြစ်ပွားပြီး ဓားပြတိုက်မှုလည်း နေ့စဉ်နှင့်အမျှ ကြားရပြီး သက်ဆိုင်ရာမှ တာဝန်ယူဖြေရှင်းဖော်ထုတ်မှု အားနည်းနေသေးကြောင်း မူဆယ်ဒေသခံများ ပြောပြချက်အရ သိရသည်။

Leave a Comments

- Advertisement -spot_img

Latest article