သျှမ်းပြည် ဆီဆိုင်မြို့နယ် ရေဖြူကျေးရွာ ဒေသခံ ၆၀ ခန့်ကို စစ်ကောင်စီနှင့် ပြည်သူ့စစ် PNO တို့ဖမ်းဆီးထိန်းသိမ်းထားပြီး ယနေ့အချိန်ထိ ၃ ရက်ကြာပြီဖြစ်သော်လည်း ပြန်မလွတ်ပေးသေးကြောင်း စုံစမ်းသိရသည်။

ဖြစ်စဉ်မှာ တောတောင်ထဲအတွင်း စစ်ဘေးရှောင်နေရသည့် ဒေသခံများကို နေရပ်မပြန်ပါက နေအိမ်များ မီးရှို့မည်ဟု စစ်ကောင်စီနှင့် ပြည်သူ့စစ် PNO တို့ကခြိမ်းခြောက်ခဲ့ပြီး၊ ပြန်လာသည့် ဒေသခံ ၅၉ ဦးကို ဇွန်လ ၁၀ ရက်တွင် ဖမ်းဆီးလိုက်ကြောင်း ပအိုဝ်းအမျိုးသား လွတ်မြောက်ရေးတပ်မတော် PNLA က တာဝန်ခံ ခွန်ရိန်းယံက သျှမ်းသံတော်ဆင့်ကိုပြောသည်။

“ဒေသခံတွေကို စစ်ကောင်စီနဲ့ လက်အောက်ခံ ပြည်သူ့စစ်တွေက အစုလိုက်အပြုံလိုက် ရွာခန်းမထဲမှာ ဖမ်းထားတယ်ဆိုတာကို ကျနော်တို့သိရပါတယ်။ ရှင်းရှင်းပြောရရင် ဒေသခံတွေကို စစ်ကောင်စီတပ်ဖွဲ့ဝင်တွေက အစုလိုက်အပြုံလိုက် သတ်ဖြတ်မှာကို အစိုးရိမ်ဆုံးပဲ။ ဘာဖြစ်လို့ဒီလိုစိုးရိမ်ရတာလဲဆိုတော့ တစ်နိုင်ငံလုံးမှာ ဒေသခံတွေကို စစ်ကောင်စီက အစုလိုကအပြုံလိုက် ခဏခဏကျူးလွန်နေတယ်” ဟု ခွန်ရိန်းယံက ပြောသည်။

ဖမ်းဆီးခံရသူ ၅၉ ဦးအနက် ဦးရေတစ်ဝက်မှာ အမျိုးသမီးများဖြစ်ကြပြီး အသက် ၄၀ နှစ်အထက် ပြည်သူများ ဖြစ်ကာ ၎င်းတို့ကို ဓားစာခံအဖြစ် စစ်ကောင်စီက ဖမ်းဆီးထားကြောင်း ဆိုထားသည်။

လက်ရှိတွင် ဖမ်းဆီးထားသည့် ပြည်သူများကို ကျေးရွာခန်းမ၌ ထိန်းသိမ်းထားကြောင်း သိရသည်။

ဇန်နဝါရီလ ၂၃ ရက်မှစ၍ ဆီဆိုင်မြို့နယ်တွင် တိုက်ပွဲဖြစ်ပွားလာပြီးနောက် ပြည်သူ ၃၀ ကျော် ဖမ်းဆီးခံနေရကြောင်း ပအိုဝ်းလူငယ်အစည်းအရုံး PYO က တာဝန်ခံတစ်ဦးက သျှမ်းသံတော်ဆင့်ကိုပြောသည်။

“အခုစာရင်းရထားသလောက်က ၃၀ ကျော်ရှိတယ်။ မေလအတွင်း အဖမ်းခံရတဲ့သူတွေက စစ်ကောင်စီနဲ့ ပြည်သူ့စစ်တွေက အဓိကဖမ်းဆီးမှုလုပ်တာကို တွေ့ရတယ်။ အခုနောက်ပိုင်း ဖမ်းဆီးမှုက တော်လှန်ရေး အုပ်စုနဲ့ ပတ်သက်ဆက်နွယ်တယ်ဆိုတဲ့ ခေါင်းစဉ်ကဖမ်းတာများတယ်” ဟု ၎င်းကပြောသည်။

ပြီးခဲ့သည့် မေလ ၆ ရက်တွင်လည်း ရေဖြူရွာက အမျိုးသမီးအပါအဝင် ဒေသခံ ၉ ဦးကို လက်နက်ကိုင် တော်လှန်ရေးတပ်ဖွဲ့များကို ထောက်ပံ့ပေးသည်ဟု စွပ်စွဲပြီး စစ်ကောင်စီက ဖမ်းဆီးစစ်ဆေးမှု ပြုလုပ်ခဲ့သည်။

အလားတူ ဇွန်လ ၂ ရက်တွင် ဆီဆိုင်မြို့နယ် ကယန်းလေးကျေးရွာနေ အသက် ၅၀ နှစ်အရွယ် ဦးဂျော့လောင် (ခ) ဖြူးစွူးကိုလည်း စစ်ကောင်စီလက်အောက်ခံ ပြည်သူ့စစ် PNO တို့က ဖမ်းဆီးသွားပြီး ပန်တိုင်းကျေးရွာအနီး၌ ညှင်းဆဲနှိပ်စက်သတ်ဖြတ်ခဲ့သည်။

“ဆီဆိုင်မြို့မှာက တိုက်ပွဲငြိမ်ပေမဲ့ မြေမြုပ်မိုင်းနင်းမိတဲ့သူ၊ ဖမ်းခံရတဲ့သူတွေ မကြာခဏ ကြားနေရတာပဲ။ အိမ်ပြန်လို့ရပေမဲ့ လုံခြုံရေးကတော့ မရှိဘူး” ဟု ဆီဆိုင်မြို့ဒေသခံ အမျိုးသားတစ်ဦးက ပြောသည်။

စစ်ကောင်စီနှင့်လက်အောက်ခံ ပြည်သူ့စစ် PNO တို့သည် ဆီဆိုင်မြို့နယ်အတွင်း ပြည်သူများကို ဖမ်းဆီးခြင်း၊ သတ်ဖြတ်ခြင်း၊ ပြန်ပေးဆွဲ ငွေညှစ်ခြင်းများ မကြာခဏကျူးလွန်နေလျက်ရှိသည်ဟု PNLA ကပြောသည်။

ဆီဆိုင်မြို့နယ်တွင် ဇန်နဝါရီလ ၂၄ ရက်မှစ၍ တိုက်ပွဲဖြစ်ပွားလာနေချိန် ကာလအတွင်း ပြည်သူစုစုပေါင်း ၃၀ ကျော် ဖမ်းဆီးထိန်းသိမ်းခံထားရကြောင်း၊ ၎င်းတို့ကို စစ်ကောင်စီနှင့် ပြည်သူ့စစ် PNO တို့က ဖမ်းဆီးထား ကြောင်း ပအိုဝ်းလူငယ်အစည်းအရုံး PYO က သျှမ်းသံတော်ဆင့်ကိုပြောသည်။