သျှမ်းပြည် ဟိုပုံးမြို့နယ် ၊မဲနယ်တောင်ဒေသ နေထိုင်သူများသည် ထပ်ဆင့်စစ်ဘေးရှောင်ရမည်စိုး၍ စိုက်ပျိုးရေးလုပ်ကိုင်သူများ လျော့နည်းလာကြောင်း သတင်းရရှိသည်။
သျှမ်းပြည် တောင်ပိုင်း၊ ဟိုပုံးမြို့နယ် မဲနယ်တောင် ဒေသ ဇန်နဝါရီ ၂၁ရက်နေ့တွင် စစ်ကောင်စီနှင့် ပူးပေါင်းတပ် ပအိုဝ်းပြည်သူ့စစ်တပ်မတော်(PNO) နှင့် ပအိုဝ်းအမျိုးသားလွတ်မြောက်ရေးတပ်မတော်(PNLO) တို့ တိုက်ပွဲဖြစ်ပွားခဲ့သောကြောင့် ဒေသခံပြည်သူများ စစ်ဘေးရှောင်ခဲ့ရပြီး စိုက်ခင်းများပျက်စီးခဲ့ရသည်။
ယခုကာလတွင် တိုက်ပွဲများ ရပ်တန့်နေသော်လည်း ထပ်မံဖြစ်လာမည်စိုး၍ စီးပွားဖြစ်စိုက်ပျိုးနေကြဖြစ်သည့် ကော်ဖီ၊ သနပ်ဖက်၊ပန်း၊ ကြက်သွန်ဖြူနှင့် ဘိန်း များကို ယခင်လထက် ထက်ဝက်မျှလျော့ချစိုက်ပျိုးနေကြောင်း မဲနယ်ဒေသခံ တစ်ဦးက သျှမ်းသံတော်ဆင့်ကိုပြောသည်။
“ ဒီနှစ်က ထပ်ဖြစ်မှာ စိုးရိမ်နေသေးတယ်။ အရင်က ဘိန်းတွေဆို စစ်ရှောင်နေရတော့ ဒီတိုင်းထားခဲ့ရတာ အကုန်ရင့်သွားတယ်။ကြက်သွန်ဖြူဆိုလဲ ရေမလောင်းနိုင်တော့ အကုန်သေကုန်တယ်။ အရင်းတောင်မရလိုက်ဘူး”ဟု ၎င်းက ဆိုသည်။
ထို့အပြင် ထပ်မံစစ်ရှောင်ရမှာစိုး၍ နှစ်ရှည်ပင်များကို မစိုက်ပျိုးတော့ဘဲ(၃)လဖြင့် စားသုံးနိုင်ရသည့် သီးနှံပင်များကို တပိုင်တနိုင် စိုက်ပျိုးကြကာ မိသားစုစားဝတ်နေရေး ကိုဖြေရှင်းနေရကြောင်း သိရသည်။
ဆက်လက်ပြီး ပအိုဝ်းပြည်သူစစ်(PNO) နှင့် စစ်ကောင်စီတပ်ဖွဲ့များက မဲနယ်တောင်ဒေသတွင် ဂိတ်များချထားပြီး စစ်ဆေးမှုများလုပ်နေကြောင်းသိရသည်။
“ကျေးရွာထဲမာ တခါတလေး ပြည်သူစစ်တွေက သွားလာလုပ်တယ်။ ဂိတ်တွေထားထားတယ်။ အဝင်အထွက်တွေစစ်တယ်။ ပြည်သူစစ်တွေ ရှိနေသေးတော့ တိုက်ပွဲ ထပ်မံဖိမာကို စိုးရိမ်မူတော့ ရှိနေသေးတာပေါ့”ဟုဒေသခံအမျိုးသားတစ်ဦးကဆိုသည်။
ပြီးခဲ့သည့် တိုက်ပွဲကြောင့်ဒေသခံအများအပြား စစ်ရှောင်နေခဲ့ရပြီး ယခုလက်ရှိတွင် တိုက်ပွဲငြိမ်နေတာကြောင့် နေရပ်ဒေသတွင် ပြည်လည်နေထိုင်နေကြကာ ပျက်စီးသွားသည့် နေအိမ်များကိုလည်း ကိုယ်ထူကိုယ်ထ စနစ်ဖြင့်ဆောက်လုပ်နေကြကြောင်း သိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments