တအာင်းဒေသအတွင်း မြေရှားသတ္တုတူးဖော်ခြင်း၊ သတ္တုလုပ်ငန်းနှင့် အခြားပုဂ္ဂလိကလုပ်ငန်းများကို လုပ်ကိုင်ခွင့်မပြုတော့ကြောင်း ပလောင်ပြည်နယ်လွတ်မြောက်ရေးတပ်ဦး PSLF/TNLA မှ မေလ ၃၁ ရက်စွဲဖြင့် ကြေညာချက်ထုတ်ပြန်လာသည်။
အဆိုပါ ထုတ်ပြန်ချက်တွင် မြန်မာအစိုးရအဆက်ဆက်လက်ထက် သက်ဆိုင်ရာ ဌာနအသီးသီးတွင် ခွင့်ပြုခဲ့သည့် ခွင့်ပြုမိန့်၊ လိုင်စင်၊ အမိန့်စာများကို အသိအမှတ်မပြုတော့ကြောင်း ဖော်ပြထားသည်။
ထို့ကြောင့် ခွင့်ပြုခဲ့သည့် လုပ်ငန်းများကိုလည်း ယာယီရပ်ဆိုင်းရန် နှင့် လုပ်ငန်းများဆက်လက်လုပ်ကိုင်လိုပါက ခွင့်ပြုချက်များကို ၂၀၂၄ ခုနှစ် နိုဝင်ဘာလ ၃၀ ရက်နေ့အတိုင်မီ နောက်ဆုံးထား လျှောက်ထားရန်လည်း ဖော်ပြထားသည်။
သတ်မှတ်ထားသည့်ကာလအတွင်း ခွင့်ပြုချက်ရယူခြင်းမရှိဘဲ လုပ်ငန်းများကို ဆက်လက်ဆောင်ရွက်ပါက လုပ်ငန်းများနှင့် လုပ်ငန်းနှင့် ဆက်စပ်သော အဆောက်အအုံ၊ ပစ္စည်းများကို တအာင်းပြည်သူပိုင်အဖြစ် သိမ်းဆည်းပြီး အရေယူသွားမည်ဖြစ်ကြောင်း ထုတ်ပြန်ချက်တွင် ရေးသားထားသည်။
ထို့အပြင် မြေရှားသတ္တုရှာဖွေတူးဖော်ခြင်းလုပ်ငန်းများကိုလည်း လုပ်ဆောင်ရန်ခွင့်မပြုထားကြောင်းနှင့် လိုက်နာဆောင်ရွက်ခြင်း မရှိပါက PSLF/TNLA ၏တည်ဆဲ ဥပဒေများအရ အရေးယူသွားမည် ဖြစ်ကြောင်းကိုလည်း ထုတ်ပြန်ထားသည်။
သျှမ်းပြည် မြောက်ပိုင်း “၁၀၂၇ စစ်ဆင်ရေး” ပြီးနောက် TNLA မှ နမ္မတူ၊ ကွတ်ခိုင်၊ နမ့်ခမ်း၊ မိုင်းငေါ့၊ မိုင်းလုံမြို့ တို့ကို သိမ်းပိုက်နေရာယူထားသသည်။
မြန်မာနိုင်ငံတွင် မြေရှားသတ္တုကို ကချင်ပြည်နယ်နှင့် တရုတ်နယ်စပ်ဒေသများတွင် အဓိကထုတ်လုပ်နေသည်။
တရုတ်နိုင်ငံမှ လိုအပ်နေသော မြေရှားသတ္တု ၄၀ ရာခိုင်နှုန်းကို မြန်မာနိုင်ငံမှ အဓိက ထောက်ပံ့ပေးနေခြင်း ဖြစ်ကြောင်း ကနေဒါအခြေစိုက် ဓာတ်သတ္တုရှာဖွေရေးဆိုင်ရာ သုတေသနအဖွဲ့ (Adamas Intelligence) ၏ အချက်အလက်တွေများတွင် ဖော်ပြထားကြောင်း သိရသည်။
၂၀၂၂ တွင် မြေရှားသတ္တု မက်ထရစ်တန်ချိန် ၁၂၀၀၀ ကို မြန်မာနိုင်ငံမှာ ထုတ်လုပ်ခဲ့ပြီး ကမ္ဘာ့စတုတ္ထမြောက် မြေရှားသတ္တု အများဆုံးထုတ်လုပ်သည့် နိုင်ငံဖြစ်ကြောင်း ဂျာမနီအခြေစိုက် Statista ကမ္ဘာ့အချက်အလက်စုဆောင်းသည့် သုတေသနဌာနမှ ဖော်ပြထားသည်။
အလုပ်သင် သတင်းထောက် ယူဂျင်း ရေးသားသည်။
