သျှမ်းပြည်တောင်ပိုင်း ဆီဆိုင်တွင် အသက်၇၀ အရွယ် အမျိုးသမီးတစ်ဦး ယနေ့ ( ဇွန် ၆)ရက် နံနက် ၈နာရီတွင် မြေမြုပ်မိုင်းနင်းမိပြီးထိခိုက်ဒဏ်ရာရရှိခဲ့ကြောင်း စုံစမ်းသိရသည်။
ဆီဆိုင်မြို့ ၊ မြကန်သာရပ်ကွက်တွင် ယနေ့ မနက် ၈နာရီ၌ အသက် ၇၀ အရွယ်အမျိူးသမီးတစ်ဦးသည် မိသားစုနှင့် စစ်ဘေးရှောင်ရာမှ အိမ်ပြန်လာပြီး နေအိမ်သန့်ရှင်းရေးလုပ်နေစဥ် မြေမြုပ်မိုင်း နင်းမိပြီး ပြင်းထန်စွာ ထိခိုက်ဒဏ်ရာရရှိခဲ့ကြောင်း သတင်းရင်းမြစ်မှ သိရပါသည်။
” ဒဏ်ရာတော့ အတော်ပြင်းထန်တယ်။ သူက စစ်ရှောင်ကပြန်လာပြီး သူ့အိမ်သန့်ရှင်းရေးလုပ်နေတာ။ပြီးတော့ အိမ်နားလေးပဲ ရှင်းရင်း နင်းမိသွားတာ။ မြေမြုပ်မိုင်းတွေက တောက်လျောက်ထောင်ထားတာ ခုထိမရှငိးပေးသေးဘူး။”ဟု ဖြစ်စဥ်ကို သိရှိသူတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် ၎င်းအမျိူးသမီးကို အောင်ပန်း ကုတင်၇၀၀ ဆေးရုံတွင် ကုသမှုခံယူရန်ပို့ထားကြောင်းသိရသည်။
ဆီဆိုင်မြို့တွင် စစ်ကောင်စီမှ ဖိအားပေးခြိမ်းခြောက်တာကြောင့် နေအိမ်ပြန်လာကြပြီး စိုက်ပျိုးရေးများလုပ်ကိုင်နေကာ မြေမြုပ်မိုင်းနင်းမိသူများ ပိုမိုများပြားလာကာ စစ်ကောင်စီဖက်မှလာရောက်ရှင်းလင်းပေးမှု မရှိသေးကြောင်းသိရပါသည်။
အလုပ်သင် သတင်းထောက် နန်းလရောင် ရေးသားသည်။
