ပင်လောင်းမြို့နှင့် မိုင် ၂၀ ခန့်သာကွာဝေးသည့် ဆောင်းပြောင်းကျေးရွာအနီးတွင် တိုက်ပွဲပြင်းထန်နေပြီး ဒေသခံများကို လူသားဒိုင်းကာအဖြစ် စစ်ကောင်စီကဖမ်းဆီးထားသည်ဟု ဒေသခံများကပြောသည်။
ယမန်နေ့ (ဇွန်လ ၃၀) ရက်က ပင်လောင်းမြို့နယ် ဆောင်းပြောင်းကျေးရွာအနီးတွင် ကရင်နီတော်လှန်ရေး အင်အားစုတပ်ဖွဲ့များနှင့် စစ်ကောင်စီတပ်တို့အကြား တိုက်ပွဲဖြစ်ပွားပြီးနောက် ဒေသခံ ၃၀၀ ကျော်ကို လူသားဒိုင်းအဖြစ် စစ်ကောင်စီတပ်က ဖမ်းဆီးထားသည်ဟု ပင်လောင်းမြို့ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။
“အခုဘုန်းကြီးကျောင်းက လူတွေလည်း စစ်ကောင်စီဖမ်းထားတယ်။ ရွာအပြင် ပေးမထွက်ဘူး။ လမ်းတွေလည်း ပိတ်ထားတယ်။ အခုဖမ်းထားတာ အယောက် ၃၀၀ ကျော်ရှိတယ်။ သူတို့က တော်လှန်ရေးအဖွဲ့ မလာရဲအောင်၊ မတိုက်ရဲအောင် ဖမ်းထားတာ။ ရွာသားတွေကို ကာဗာထားတဲ့သဘောပေါ့” ဟု ၎င်းကပြောသည်။
တိုက်ပွဲကြောင့် ဒေသခံများ ထွက်ပြေးတိမ်းရန်ကြံနေစဉ် အဝင်အထွက်လမ်းများအားလုံးကို စစ်ကောင်စီက ပိတ်ချလိုက်ပြီး ဘုန်ကြီးကျောင်းအတွင်းစုခိုင်းကာ လူသားဒိုင်းကာအဖြစ် ဖမ်းဆီးထားခြင်းဖြစ်သည်။
ယင်းကဲ့သို့ တိုက်ပွဲကြားပိတ်ခံရသောကြောင့် ဒရုန်းကြဲခံရမည်ကို စိုးရိမ်နေကြသည်ဟု တိုက်ပွဲကြောင့် ထွက်ပြေးလာရသည့် ဆောင်းပြောင်းကျေးရွာဒေသခံတစ်ဦးကပြောသည်။
“ဒရုန်းတွေလည်းလာဗုံးလာချတော့ တစ်ခုခုဆိုထိခိုက်မှုများနိုင်တယ်” ဟု ပြောသည်။
ထို့အပြင် ယမန်နေ့တိုက်ပွဲကြောင့် ဆောင်းပြောင်းကျေးရွာမှ ဒေသခံကလေးငယ်အပါအဝင် ပြည်သူ ၄ ဦး ပြင်းထန်စွာ ဒဏ်ရာရရှိခဲ့ကြောင်း သိရသည်။
စစ်ကောင်စီတပ်က ကျေးရွာကိုထဲ လက်နက်ကြီးဖြင့် ပစ်ခတ်ခဲ့သောကြောင့် အသက် ၁၀ နှစ်အောက် ကလေးငယ်တစ်ဦးကို ကျည်ထိမှန်ခဲ့ပြီး၊ ကျေးရွာဘုန်းကြီးကျောင်းကို ဒရုန်းဖြင့်ထပ်မံဗုံးကြဲခဲ့သောကြောင့် အမျိုသမီး ၁ ဦးနှင့် အမျိုးသား ၂ ဦး ကျည်စထိမှန် ဒဏ်ရာရရှိခဲ့ကြောင်း ဒေသခံများကပြောသည်။
ထိခိုက်ဒဏ်ရာရသူများမှာ အသက် ၁၀ နှစ်အောက် ကလေးငယ်တစ်ဦးအပြင် နန်းမနု၊ ခွန်ကျော်လွန်နှင့် ခွန်တီးမားတို့ဖြစ်ကြောင်း သိရသည်။
သျှမ်းတောင်တိုက်ပွဲအတွင်း စစ်ကောင်စီက လက်နက်ကြီး၊ ဒရုန်းဖြင့် ဗုံးကြဲတိုက်ခိုက်ခဲ့သောကြောင့် ဇွန်လအတွင်း ဦးဇင်းတစ်ပါးနှင့် ကလေးငယ်အပါအဝင် အရပ်သားသေဆုံးမှု ၅ ဦးရှိပြီး ကလေးငယ် ၅ ဦးအပါအဝင် အရပ်သားထိခိုက်ဒဏ်ရာရမှု ၁၃ ဦးအထိ ရှိကြောင်း ပအိုဝ်းလူငယ်အစည်းအရုံးက ဇွန်လ ၂၇ ရက်တွင် ထုတ်ပြန်ထားသည်။
Leave a Comments