သျှမ်းပြည်တောင်ပိုင်း ဟိုပုံး ၊ ဆီဆိုင် ၊ ပင်လောင်း ၊ ဉောင်ရွှေ မြို့နယ်တွင် (၄) လအတွင်းအရပ်သား သေဆုံးမှုမှာ (၇၅) ဦးထိလာသည်ဟု လူငယ်အစည်းအရုံး (PYO) မှ မေလ ၂၈ရက်တွင် ထုတ်ပြန်ထားသည်။

သျှမ်းတောင်တိုက်ပွဲ အတွင်းတွင် ၁၈နှစ်အောက်(၁၃)ဦးသေဆုံး ပြီး လသားအရွယ်မှ ၁၅နှစ်အသက်အရွယ်ရှိသော ကလေးငယ်( ၁၁)ဦး ရှိကြောင်း သိရသည်။

‌သေဆုံးသူ စာရင်းတွင် စစ်ရှောင်နေရင်း ပစ်ခတ်ခံရခြင်း ၊ စစ်ကောင်စီ၏ စစ်ဆေးရေးဂိတ်များတွင် သတ်ဖြတ်ခံရခြင်းနှင့် ကြောက်လန့်ထွက်ပြေးသွားသည့်အတွက် စစ်သားများမှ လိုက်လံပစ်ခတ်ရာမှ သေဆုံးခြင်းတို့ ပါဝင်သည်။

တိုက်ပွဲ(၄)လအတွင်း  ထိခိုက်ဒဏ်ရာရသူ (၁၀၀)ဝန်းကျင်ရှိပြီး  ထိုအထဲမှ (၁၇)ဦးသည် နေရပ်ပြန်ရင်း စစ်အကြွင်းကျန်လက်နက်များထိမှန်ခြင်းဖြစ်ကြောင်း ထိ ထိခိုက်ဒဏ်ရာရသည့်အထဲတွင် ကလေးငယ်(၁၇)ဦးပါကြောင်း သိရသည်။

သျှမ်းတောင်တိုက်ပွဲအတွင်း စစ်ရှောင်ဦးရေ (၆)သောင်းဝန်းကျင်အထိရှိလာပြီး စစ်ရှောင်နေရာမှ နေရပ်သို့ အကြောင်းအမျိုးမျိုးကြောင့် ပြန်လာကြသည့် အရပ်သားများ နည်းအမျိုးမျိုးသတ်ဖြတ်ခံရသည့်အပြင် ဒေသအတွင်း သွားလာခွင့်များ ကန့်သတ်မှုများ ၊ လူသားဒိုင်း အဖြစ်အသုံးပြုခံရပြီး နယ်မြေအနေထားမလုံခြုံမှုများကြုံနေရကြောင်း ဖော်ပြထားသည်။

“အိမ်ပြန်ဖို့ စစ်ကောင်စီနဲ့ PNA တို့ က တောက်လျှောက်ဖိအားပေးတဲ့အပိုင်းရှိတယ် ၊ မြေပြင်တိုက်ပွဲငြိမ်လို့ ပြန်လာနေထိုင်ကြတဲ့ ဒေသခံပြည်သူတွေလည်းရှိတယ်။ နောက်တစ်ခုက စိုက်ပျိုးရာသီရောက် ရှိလာပြီဖြစ်တဲ့ အတွက်ကြောင့် စိုက်ပျိုးရေးလုပ်လို့ရနိုင်လားဆိုတဲ့ မျှော်လင့်ချက်နဲ့နေရပ်ကိုပြန်ကြတာ ဖြစ်တယ် အကြောင်းရင်း အမျိုးမျိုးနဲ့ အိမ်ပြန်ကြတာကို တွေ့ရပါတယ်”ဟု ပအိုဝ်းလူငယ်အစည်းအရုံးတာဝန်ရှိသူတစ်ဦး ကဆိုသည်။

သျှမ်းတောင်တိုက်ပွဲအတွင်းစစ်ကောင်စီတပ်နှင့်  ပအိုဝ်းပြည်သူစစ် (PNO)ပူးပေါင်းအဖွဲ့နှင့် ပအိုဝ်းအမျိူးသား လွတ်မြောက်ရေးတပ်မတော်(PNLA) တိုက်ပွဲ(၃)ထောင်ကျော် ဖြစ်ခဲ့ပြီးလေကြောင်း အကြိမ် ၄၀၀ကျော် ရှိကြောင်း PYO ထုတ်ပြန်ချက်တွင်ဖော်ပြထားသည်။

အလုပ်သင် သတင်းထောက် နန်းလောဝ်ငင်း ရေးသားသည်။