သျှမ်းမြောက်တွင် “၁၀၂၇ စစ်ဆင်ရေး” တိုက်ပွဲဖြစ်ပွားပြီးသည့်နောက် တိုင်းရင်းသားလက်နက်ကိုင်တပ်ဖွဲ့များက နယ်မြေများကြောင့် အချင်းချင်းကြားအငြင်းပွားနေစဉ် စစ်တပ်ဝါဒဖြန့်ချယ်နယ်များအပါအဝင် Page အတုများက ထိုလက်နက်ကိုင်တပ်ဖွဲ့များအကြား ပဋိက္ခကြီးထွားလာစေရန် နည်းမျိုးစုံဖြင့် သွေးထိုးလှုံ့ဆော်နေ လျက်ရှိသည်။

ယခုရက်ပိုင်းအတွင်း လှုမှုကွန်စာမျက်နှာပေါ်မှာ SSPP Info ပုံစံတူ Page အတုဖြင့် နမ့်ခမ်းမြို့တွင် ဖြစ်ပွားခဲ့သည့် TNLA က SSPP တပ်သားများကို ကားတင်ပြီးမူဆယ်ဘက်ပို့ဆောင်သည့် သတင်းကိုအခြေခံ၍ “ TNLA ကို ညှိနှိုင်း၍မရဘဲ လက်နက်ကိုင်နှစ်ဖွဲ့ကြား စစ်ရေးပဋိက္ခဖြစ်ပေါ်လာပါက SSPP/SSA အနေဖြင့် လက်နက်ကိုင် တိုက်ပွဲဖော်ဆောင်ရန် တွန့်ဆုတ်နေမည်မဟုတ်..” ဆိုကာ လုပ်ကြံဖန်းတီးရေးသားပြီး ထုတ်ပြန်ချက်အတု ဖြန့်ချိနေသည်။

ထိုထုတ်ပြန်ချက်အတုကို ကြည့်ရှု့သူပေါင်း ၂၀၀ နီးပါးရှိသည်။ အချို့သျှမ်းသတင်းဌာနနှင့် Youtuber များကလည်း စစ်ဆေးမှုမရှိပဲ ထိုထုတ်ပြန်ချက်အတုကို ပြန်လည်ကူးယူ ဖော်ပြခြင်း၊ ကိုးကားဖော်ပြခြင်းများ ပြလုပ်နေသည်ကို တွေ့ရသည်။

မူရင်းလင့် – https://shorturl.at/0EHhr

သျှမ်းသံတော်ဆင့် အချက်အလက်စစ်ဆေးသူများအနေဖြင့် အဆိုပါအကြောင်းအရာကို စစ်ဆေးမှုပြုလုပ်ခဲ့သည်။

SSPP Info ပုံစံတူ Page အတုက မေလ ၈ ရက်မှစ၍ ၎င်း Page ကိုစတင်ထူထောင်လာပြီး ၎င်းစာမျက်နှာပေါ်မှာ “ ဗမာဘာသာသတင်းထုတ်ပြန်ရေး” ဟုလည်း ကြေညာထားသည်။

ထို့အပြင် SSPP Info တရားဝင် Page မှ ရေးသားခဲ့သာ သတင်းများကိုလည်း Page အတုစတင်ထူထောင်လာချိန်က တောက်လျှောက်ပြန်လည်ကူးယူဖော်ပြခဲ့ပြီး လက်ရှိအချိန်ထိ ပိုစ့်စုစုပေါင်း ၇ ခုရှိဖော်ပြထားသည်ကို တွေ့ရသည်။

အဆိုပါ SSPP Info ပုံစံတူ Page အတုထွက်ပေါ်လာခြင်းနှင့်ပတ်သက်၍ တရားဝင်ဖြစ်သည့် SSPP Info ကလည်း အခုလိုပြန်လည်ဖြေရှင်းထားပါသည်။

ဒီလင့်ခ်ကိုနှိပ်ပါ – https://shorturl.at/sR9GB

SSPP Info ပုံစံတူ Page အတုမှ ဖော်ပြထားသော သတင်းမှန်သမျှကို အချို့သတင်းဌနမှ စစ်ဆေးမှုမရှိပဲ ပြန်လည်ကူးယူဖော်ပြခြင်း၊ ကိုးကားဖော်ပြခြင်းများ ပြုလုပ်နေသည့်အပေါ် SSPP/SSA နှင့် လုံးဝမသက်ဆိုင်ကြောင်းလည်း အသိပေးထားသည်။

ထိုကဲ့သို့ တိုင်းရင်းသားလက်နက်ကိုင်တပ်ဖွဲ့ အချင်းချင်းကြား ဖြစ်ပွားနေလျက်ရှိသည့် ပဋိက္ခများကို သက်ဆိုင်ရာတပ်ဖွဲ့များက ကောင်းကောင်းသာ မကိုင်တွယ်နိုင်ပါက ဒီထက်ပဋိက္ခကြီးထားလာနိုင်သကဲ့သို့ စစ်ကောင်စီလိုချင်သော “အိမ်ကြက်ချင်းအိုးမည်းသုတ်” ကစားကွက်ထဲရောက်သွားနိုင်သည်ဟု တိုင်းရင်းသားအရေး လေ့လာသုံးသပ်သူတစ်ဦး ပြောသည်။

“ စစ်ကောင်စီကတော့ အိမ်ကြက်ချင်းအိုးမည်းသုတ်ပြီးတော့မှ တိုက်ခိုင်းတာက သူတို့ဓလေ့ပဲ။ အခုတကယ်တမ်း ဒီစစ်ကောင်စီကို တော်လှန်တိုက်ခိုက်နေတဲ့ကာလမှာ မဖြစ်သင့်တဲ့ တိုင်းရင်းလက်နက်ကိုင်အဖွဲ့ချင်းကြား တိုက်ခိုက်မှုဖြစ်လာရင် စစ်ကောင်စီအတွက် တကယ့်မဟာထွက်ပေါက်ပဲ။ တကယ့်အခွင့်အရေးကို ရသွားနိုင်တယ်။ ဒီအချိန်မှာတော့ ဘုံရန်သူကဘယ်သူဆိုတာ သေချာစဉ်းစားသင့်ပြီ” ဟု ၎င်းကပြောသည်။

ထို့ကြောင့် မည်သည့် တိုင်းရင်းသားလက်နက်ကိုင်တပ်ဖွဲ့များက အချင်းချင်းကြားပဋိက္ခများ၊ တိုက်ပွဲများ ဖြစ်ပွားစေကာမှု စစ်ကောင်စီလိုချင်သော “အိမ်ကြက်ချင်းအိုးမည်သုတ်” ကစားကွက်ထဲ့သို့ မရောက်သွားစေရန် သတိချပ်ရန်လိုအပ်သည်။

အလားတူ ဇန်နဝါရီလက ဆီဆိုင်မြို့နယ်အတွင်း ဖြစ်ပွားနေသည့် အကြောင်းနှင့်ပတ်သက်၍ ပအိုဝ်းအမျိုးသား လွတ်မြောက်ရေးတပ်မတော် PNLA ၏ နာမည်ကိုအသုံးပြုပြီး Page အတုထူထောင်ပြီး လူမှုကွန်ရက်စာမျက်နှာပေါ်၌ မဟုတ်မမှန်သတင်းရေးသားဖြန့်ဝေခြင်းအပေါ် PNLA ဘက်က အသိပေးခဲ့သည်။

မူရင်းလင့် – https://shorturl.at/l4JGO

သျှမ်းသံတော်ဆင့် စာဖတ်ပရိသတ်များအနေဖြင့် လူမှုကွန်ရက် စာမျက်နှာများတွင် ဖော်ပြနေသည့် သတင်းများကို ချက်ချင်းမယုံကြည်ဘဲစိတ်ချရသော သတင်းမီဒီများတွင် သွားရောက်ဖတ်ရှု့ကြရန် တိုက်တွန်းပါသည်။

သတင်းတု၊ သတင်းမှားဟု ယူဆရသည့် သတင်းများကိုလည်း သျှမ်းသံတော်ဆင့် လူမှုကွန်ရက်စာမျက်နှာ (SHAN Burmese Vision ) Facebook Chat Boxမှဆစ်ဆင့် သတင်း၏ လင့်ခ် (သို့မဟုတ်) Screen Short ပုံပေးပို့ခြင်းဖြင့် စစ်ဆေးနိုင်သည်။