သျှမ်းပြည်နယ် စစ်အစိုးရ အတွင်းရေးမှူး ဦးစိုင်းသော်ဝင်း ကို ယမန်နေ့ (မေလ ၂၉ ရက်) ညပိုင်းက တောင်ကြီးမြို့ နေအိမ်တွင် စစ်ကောင်စီ လာရောက် ဖမ်းဆီးသွားကြောင်း ခိုင်မာသည့် သတင်းရင်းမြစ်က သျှမ်းသံတော်ဆင့်ကို ပြောသည်။
ပင်စင်ယူရန် လပိုင်းသာ လိုတော့သည့် ဦးစိုင်းသော်ဝင်း ကို ကျားဖြန့် ကိစ္စ ပတ်သက် ဆက်နွယ်မှုဖြင့် ဖမ်းဆီးခြင်းဖြစ်သည်ဟု သတင်းများ ထွက်ပေါ်နေသော်လည်း မည်သည့် အကြောင်းကြောင့် ဖမ်းဆီးသည်ကို အတည်မပြုနိုင်သေးကြောင်း သတင်းရင်းမြစ်က ဆိုသည်။
“မနေ့ညပိုင်းက ဖမ်းသွားတယ်။ မိသားစုနဲ့ အဆက်အသွယ် မရသေးဘူး။ ဘာကြောင့် ဖမ်းတာလဲ ဆိုတာ မသိရသေးဘူး” ဟု သတင်းရင်းမြစ်က ယနေ့ နေ့လယ်ပိုင်းတွင် ရှင်းပြသည်။
ကလောမြို့ ဇာတိဖွားဖြစ်သူ ဦးစိုင်းသော်ဝင်း သည် လဘ်စားမှုနှင့် လူမှုရေး ကိစ္စများဖြင့် နာမည်ကြီးသည်ဟု သျှမ်းပြည်နယ် ထွေအုပ် အသိုင်းအဝိုင်းက ဆိုသော်လည်း သျှမ်းသံတော်ဆင့် အနေဖြင့် သီးခြား အတည်ပြုနိုင်ခြင်း မရှိသေးပေ။
နယ်စပ်ဒေသများတွင် ဖမ်းဆီးမှုများကြောင့် နာမည်ကျော် ကျားဖြန့် ငွေလိမ်ဂိုဏ်များ တောင်ကြီးမြို့တွင် အခြေစိုက် လှုပ်ရှားမှုများ ရှိနေကြောင်း သတင်းများ ထွက်ပေါ်နေချိန်တွင် ယခုကဲ့သို့ သျှမ်းစစ်အစိုးရအဖွဲ့ အတွင်းရေးမှူး ဖမ်းဆီးခံခဲ့ရခြင်း ဖြစ်သည်။
ဗိုလ်မှူးဟောင်း ဖြစ်သူ ဦးစိုင်းသော်ဝင်း သည် စစ်တပ်အာဏာသိမ်းပြီးနောက် ရခိုင်ပြည်နယ် စစ်အစိုးရ အတွင်းရေးမှူး တာဝန် ထမ်းဆောင်ခဲ့ပြီး ယင်းနောက် သျှမ်းပြည်နယ် သို့ ပြောင်းရွှေ့ခဲ့ခြင်း ဖြစ်သည်။
Leave a Comments