သျှမ်းပြည်တောင်ပိုင်း၊ နမ့်စန်မြို့နယ်၊ ကာလေကျေးရွာရှိ ပြောင်းစိုက်သူများသည် ယခုနှစ်တွင် ပြောင်းအစား ပဲစင်းငုံများ အစားထိုးစိုက်ပျိုးမည်ဖြစ်ကြောင်း ပြောင်းစိုက်တောင်သူများထံမှ သိရသည်။
ပြောင်းစိုက်ရာသီတွင် မျိုးစေ့၊ ပိုးသတ်ဆေး နှင့် ဓာတ်မြေဩဇာဈေးနှုန်း မြင့်တက်မှု ကြားမှ စိုက်ပျိုးရသော်လည်း ပြောင်းဈေး တစ်ပိဿလျှင် မြန်မာကျပ်ငွေ ၆၀၀ကျော် သာရသည့် အတွက် နှစ်နှစ်ဆက်တိုက်အရှုံးပေါ်လာသဖြင့် ပြောင်းအစား ပဲစင်းငုံကို ပြောင်းစိုက်နေရကြောင်း ပြောင်းစိုက်တောင်သူများက ပြောသည်။
“ဒီနှစ်တော့ ပြောင်းမစိုက်ကြတော့ဘူး ပဲစင်းငုံတို့ မြေပဲတို့ စိုက်ကြတော့တာ အရင်နှစ်ပြောင်းက အိမ်တိုင်းရှုံးတယ်။ ပြောင်းမျိုးစေ့တွေကို ဝယ်ရတာဈေးကြီးပြီး ပြောင်းပြန်ရောင်းတဲ့ အချိန်ကျတော့ ပြောင်းဈေးကျ ဘယ်သူမှ မခံနိုင်တော့ဘူး ၂နှစ်ရှိပြီ” ဟု ပြောင်းစိုက်တောင်သူ အမျိုးသမီး တစ်ဦးက သျှမ်းသံတော်ဆင့်ကိုပြောသည်၊
ထိုပြောင်းစိုက်တောင်သူသည် တစ်နှစ်လျှင်မြန်မာငွေ သိန်း၁၅၀ခန့် ရင်းနှီးထားရသော်လည်း ပြောင်းထွက်ချိန်တွင် လုပ်အားခနှင့် အချိန် ၊ ကုန်ကျစရိတ် မကာမိသဖြင့် ပြောင်းပြန်လည်စိုက်ပျိုးရန် အခက်ကြုံလာရကြောင်း တောင်သူက ဆိုသည်။
ဆက်လက်ပြီး ကုန်းမုန့်ကျေးရွာ ပြောင်းစိုက်တောင်သူတစ်ဦးကလည်း “အရင်နှစ်ကလည်း မမြတ်ဘူး။ ဒီနှစ်က ရှုံးတောင်ရှုံးတယ်။ ဒီနှစ်တော့ ပဲစင်းငုံပဲပြောင်းစိုက်တော့မယ် သူက တစ်ပိသာ ၅၅၀၀ ရတယ်” ဟု ပြောသည်။
ပြောင်းစိုက်တောင်သူများအနေဖြင့် ပြောင်းတစ်ပိဿလျှင် မြန်မာကျပ်ငွေ ၁၅၀၀ ကျပ်ရမှသာ အဆင်ပြေသောကြောင့် ပြောင်းအစား ပဲစင်းငုံ ပြောင်းစိုက်လာရခြင်းဖြစ်သည်။
သို့သော် ပဲစင်းငုံသည် အချိန်ပေး ၊ ဂရုစိုက်မှသာ အဆင်ပြေသည် အမျိုးအစားဖြစ်သဖြင့် အချိန်ပိုကုန်ကြောင်း သိရသည်။
ပြောင်းများရောင်းချိန်တွင် ပြောင်းဈေးများ ကျသောကြောင့် ပြောင်းစိုက်တောင်သူများအရှုံးပေါ်သော်လည်း ယခု ပြောင်းများပြန်လည်စိုက်ပျိုးချိန်တွင် ပြောင်းဈေး မြန်မာကျပ်ငွေ တစ်ထောင်ကျော်ထိ ပြန်တက်လာကြောင်း ပြောင်းပွဲစား အမျိုးသား တစ်ဦးမှဆိုသည်။
“ရွာကလူတွေပြောင်းမျိုးစေ့ကိုအရင်ကလောက်မဝယ်တော့ဘူး ခါတိုင်း ၁၀ထုတ်စိုက်တဲ့ သူတွေ ဒီနှစ် ၃/၄လောက်ပဲ စိုက်တော့တာ စိုက်ရုံလေး စိုက်တော့တာ ကံစမ်းမဲနှိုက်နေရသလိုပဲ သူများတွေ မစိုက်ရဲတော့ဘူး” ဟု ၎င်း ပြောင်းပွဲစားက ထပ်လောင်းပြောသည်။
သျှမ်းပြည်နယ်တောင်ပိုင်းမှ ထွက်သောပြောင်းများကို ထိုင်းနိုင်ငံနှင့် တရုတ်နိုင်ငံသို့ တင်ပို့လျက်ရှိပြီး လက်ရှိမှာ ထိုင်းဘတ်ငွေနှင့် တရုတ်ယွမ်ငွေစျေးတက်သော်လည်း ပြောင်းစျေးကွက်က ကမောက်ကမ ဖြစ်နေသေးကြောင်း ပြောင်းတောင်သူများက ပြောဆိုလိုက်သည်။
အလုပ်သင် သတင်းထောက် နန်းလောဝ်ငင်း ရေးသားသည်။
