သျှမ်းပြည် အောင်ပန်းမြို့တွင် မီးလုံးပြုလုပ်ရန် ယမ်းထောင်စဥ် မတော်မဆ ပေါက်ကွဲမှုဖြစ်ပွားခဲ့ပြီး ၁၉နှစ်အရွယ်ရှိ လူငယ်အမျိုးသားတစ်ဦး ထပ်မံသေဆုံးသွားကြောင်း သတင်းရရှိသည်။
သျှမ်းပြည် အောင်ပန်းမြို့တွင် ပြီးခဲ့သည့် မေလ ၂၅ ရက် ညနေပိုင်း၌ မီးလုံးပြုလုပ်ရန် ယမ်ထောင်းစဉ်မတော်တဆ ပေါက်ကွဲဖြစ်ပွားခဲ့ပြီး အသက် ၁၉နှစ်အရွယ် လူငယ်အမျိုးသားနှင့် အသက် ၅၄နှစ်အရွယ်ရှိ အမျိုးသားတို့ မီးလောင်ဒဏ်ရာရရှိခဲ့သည်။
ထို့နောက် အသက် ၅၄နှစ်အရွယ်ရှိ အမျိုးသားသည် မေ ၂၆ရက်တွင် သေဆုံးခဲ့ပြီး၊ ယမန်နေ့ (မေ ၂၇ရက်)ရက်တွင် အသက် ၁၉နှစ်အရွယ်ရှိ လူငယ်အမျိုးသား သေဆုံးသွားကြောင်း အောင်ပန်းမြို့ ဒေသခံ အမျိုးသားတစ်ဦးကသျှမ်းသံတော်ဆင့်ကိုပြောသည်။
“မနေ့ကပဲ တောင်ကြီး မှာဆုံးသွားတာ။မနေ့ကပဲ ချက်ချင်ယူလာလိုက်တယ်။ယမ်းပြီးဆိုတော့ တော်တော် ဆိုးဆိုးဝါးဝါးဖြစ်တာပေါ့။ဖြစ်တုန်းက တကိုယ်လုံးကို မီးလောင်သွားတာလေ။ မနေ့က ဆုံးသွားတဲ့လူက ၁၉ နှစ်နဲ့ တစ်ယောက်။ဒီတစ်ယောက်နဲ့ဆိုရင် ဒီလမှာ ၄ ယောက်ဆုံးသွားပြီ။”ဟု အောင်ပန်းမြို့ ဒေသခံ အမျိုးသားတစ်ဦးက ပြောသည်။
လက်ရှိတွင် သက်ဆိုင်ရာများမှ ယမ်းထောင်းခြင်းကို မြို့ထဲတွင် မထောင်းရန် ပြောဆိုထားပြီး မြို့ပြင်တွင် ပြုလုပ်ရန် ပြောဆိုမှုများရှိနေကြောင်း ၎င်းက ဆက်ပြောသည်။
ယင်း မီးလုံးခေါ် ပအိုဝ်းဘာသာ နှင့် လုဖုဲင် ဒုံးပြိုင်ပွဲသည် တောင်ကြီးမြို့ ဝန်းကျင်ရှိ ရွာတိုင်းလိုလိုပင် ကျင်းပသည့် ရိုးရာပြိုင်ပွဲတစ်ခုဖြစ်ပြီး တောင်ကြီးမြို့မြောက်ဘက် ပေါမူရွာပြိုင်ပွဲသည် အကြီးဆုံးဖြစ်ကြောင်း သိရသည်။
ပြီးခဲ့သည့် မေလ ၁၃ ရက်တွင်လည်း အောင်ပန်းမြို့ မင်္ဂလာရပ်ကွက်တွင် ရိုးရာပွဲ အတွက် မီးလုံးပြုလုပ်ရန် ယမ်းထောင်ရာမှ မတော်တဆ ပေါက်ကွဲမှုကြောင့် အမျိုးသား ၂ ဦးသေဆုံးခဲ့ပြီး ၁ ဦးအပြင်းအထန်ဒဏ်ရာရရှိခဲ့ကြောင်းသိရသည်။
Leave a Comments