သျှမ်းပြည်တောင်ပိုင်း၊ အောင်ပန်းမြို့ လမ်းမပေါ်တွင် “(၁၉ ) ရက်နေ့ လူသတ်ပွဲ လုံးဝမမေ့နဲ့ “ စာသားပါ စာရွက်များကို လမ်းမပေါ်တွင် ဖြန့်ကြဲထားကြောင်း စုံစမ်းသိရှိရသည်။
အာဏာသိမ်းပြီး (၂၀၂၁ ခုနှစ် မတ်လ ၁၉ ရက်)နေ့ တွင် စစ်အာဏာသိမ်းမှုကို ဆန့်ကျင် ဆန္ဒပြသော အောင်ပန်း လူငယ်များအား စစ်ကောင်စီတပ်မှ သေဆုံးသည်အထိ ဖြိုခွင်းဖမ်းဆီးသတ်ဖြတ်မှုကြောင့် လူငယ် (၂၀) ဦးခန့် သေဆုံးခဲ့ရသည်ဟု သတင်းရင်းမြစ်များထံမှ သိရသည်။
ထို့ကြောင့် ယမန်နေ့ ( မတ်၁၈)ရက် ညတွင် လမ်းမပေါ်ရှိ စာရွက်ဖြူများ ပြန့်ကြဲနေပြီး ထိုစာသားသည် ယခင် အတိတ်ကာလ နေ့ရက်များကို ပြန်မြင်ယောင်လာစေသည်ဟု မြို့ခံ တစ်ဦးက သျှမ်းသံတော်ဆင့်ကို ပြောသည်။
“အရင် လွန်ခဲ့တဲ့ (၄)နှစ်က လူငယ်တွေ တော်တော်များများ ဆန္ဒပြရင်း အသက်ပေးသွားခဲ့တာ။ ဒီအကြောင်းတွေ ကျနော်တို့ မေ့တော့မလို့ ဖြစ်နေတာ ဒီစာရွက်တွေကောက်ရမှ ပြန်ပြီးသတိရလာစေတယ်” ဟု မြို့ခံ အမျိုးသားတစ်ဦးက ပြောသည်။
လွန်ခဲ့သည့် လေးနှစ်သာ ကာလ ယနေ့အချိန်တွင် စစ်ကောင်စီမှ ဆန္ဒပြလူငယ် (၂၀)ကို သတ်ဖြတ်ခဲ့ပြီး ထိုလူငယ်များသည် အောင်ပန်းမြို့တွင် မီးသဂြိုဟ်ခွင့်မရရှိခဲ့ကာ ကလောမြို့ဘက်သို့ သယ်ဆောင်သွားခဲ့ ရကြောင်း ၎င်းကဆိုသည်။
ယခုကဲ့သို့ “(၁၉)ရက်နေ့ လူသတ်ပွဲ လုံးဝမမေနဲ့ “ စာသားကို မည်သည့်အဖွဲ့မှ ဖြန့်ကြဲခဲ့သည်ကို ထုတ်ပြန်လာခြင်းမရှိသေးဘဲ ပြည်သူများကို ယခင်က ဆန္ဒပြရင်း သေဆုံးသွားခဲ့ရသည့် အောင်ပန်းလူငယ်များကို မမေ့စေလိုသော ရည်ရွက်ချက်ဖြင့် ဖြန့်ကြဲခဲ့ခြင်းဖြစ်နိုင်သည်ဟု အသက် (၃၀) ဝန်းကျင် အမျိုးသမီးတစ်ဦးက ပြောသည်။
ထို့အပြင် ယနေ့ မတ်လ (၁၉) ရက်နေ့တွင် အောင်ပန်းမြို့ ဗထူးကျောက်တိုင်နားတွင် ရဲနှင့် စစ်သားများ ကင်းစောင့်နေပြီး စစ်ဆေးနေမှုများပြုလုပ်နေကြောင်း အောင်ပန်းမြို့ခံ အမျိုးသားတစ်ဦးက ပြောသည်။
“ ဗထူးကျောက်တိုင်နားမှာ ရဲနဲ့ စစ်သား (၃၀)လောက်ရှိမယ် စစ်ဆေးတာလုပ်နေတယ်။ ဒါ့မှ မဟုတ် ကလေး စာမေးပွဲကြောင့် ဒီလောက်များနေလား မသိဘူး”ဟု ၎င်းအမျိုးသားက ပြောသည်။
၂၀၂၁ ဖေဖော်ဝါရီလ ၁ရက်နေ့မှ ၂၀၂၅ မတ်လ ၁၈ ရက်အတွင်း စစ်ကောင်စီ လက်ချက်ကြောင့် အတည်ပြုပြီး သေဆုံးသူ (၆၄၁၀)ဉီးရှိပြီး၊ အတည်မပြုနိုင်ဘဲ သေဆုံးသူ (၃၁၀၀) ဉီးရှိကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)မှ ၂၀၂၅ ခုနှစ် မတ်လ ၁၈ရက်နေ့တွင် သတင်းထုတ်ပြန်ခဲ့သည်။
Leave a Comments