သျှမ်းပြည် တောင်ကြီးခရိုင် ညောင်ရွှေမြို့နယ်အတွင်း တိုက်ပွဲဖြစ်ပွားပြီးနောက် အောင်ပန်းမြို့ အဝင်အထွက်မှာ စစ်ဆေးရေး တင်းကြပ်နေလျက်ရှိကြောင်း စုံစမ်းသိရှိရသည်။
အောင်ပန်းမြို့ အဝင်အထွက်တွင် စစ်ကောင်စီက စစ်ဆေးရေး တင်းကြပ်နေပြီး တောင်ကြီးမြို့ နှင့် ညောင်ရွှေမြို့ မှ လာသည့်သူများကို ပိုပြီးစစ်ဆေးနေကြောင်း သိရသည်။
“ မြို့ထဲမှာ စစ်ဆေးတာတော့ မရှိဘူး။ အဓိကတော့ မြို့ဝင်မြို့ထွက် ပိုစစ်ဆေးတာပေါ့။ တောင်ကြီး ၊ ညောင်ရွှေဘက်က လာတဲ့သူကို ပိုပြီးစစ်ဆေးတယ်။ အခုလည်း လူတိုင်းယောက်တိုင်းကို စစ်ဆေးတာ။ ဒီတိုင်းပေးမသွားတော့ဘူး” ဟု အောင်ပန်းမြို့ ဒေသခံ အမျိုးသားတစ်ဦးက ပြောသည်။
ထို့အပြင် PNO/PNA တပ်သားများလည်း စစ်ကောင်စီ နှင့် ပူးပေါင်းပြီး လှုပ်ရှားနေကြောင်း သိရသည်။
လက်ရှိ အောင်ပန်းမြို့ ဒေသခံများကလည်း တိုက်ပွဲဖြစ်ပွားလာမှုကို စိုးရိမ်နေလျက်ရှိကြောင်း ဒေသခံများက ပြောသည်။
“ နိုင်ငံရေး သိတဲ့သူကလည်း စိုးရိမ်ထားကြတာပေါ့။ မသိတဲ့သူတစ်ချို့တော့လည်း အေးဆေးပါပဲ။ မြို့ထဲတော့ တိုက်ပွဲမဖြစ်လောက်ပါဘူး။ ကျေးရွာတွေ ဘက်မှာတော့ ဖြစ်လာမှာကို စိုးရိမ်ရတာပေါ့” ဟု ဒေသခံက ပြောသည်။
ပြီးခဲ့သည့် ဇန်နဝါရီ ၃ ရက်တွင် ညောင်ရွှေမြို့နယ် အင်းလေးအနောက်ဘက်ခြမ်း ဘုရားနီကျေးရွာ နှင့် သန်းထောင်ကျေးရွာ ကြားတွင် IPDF နှင့် စစ်ကောင်စီတို့ တိုက်ပွဲဖြစ်ပွားခဲ့ပြီး နှစ်ဦးနှစ်ဖက် ထိခိုက်သေဆုံးမှု ရှိခဲ့သည်။
