သျှပြည်တောင်ပိုင်း၊ ကလေမြို့နယ်၊ စစ်ကောင်စီ ရွေးကောက်ပွဲတွင် PNO ပအိုဝ်း ပြည်သူ့စစ်ပါတီ အနိုင်ရပါက ဆက်ကြေးနှင့် စစ်သား ကောက်မည်ကို စိုးရိမ်ကြောင်း ကျေးရွာနေ ဒေသခံများက သျှမ်းသံတော်ဆင့်ကို ယနေ့ ဇန်နဝါရီလ ၁၀ ရက်တွင် ပြောသည်။
မနက်ဖြန် (ဇန်နဝါရီ ၁၁ )ရက်တွင် ကျင်းပမည့် စစ်ကောင်စီ ရွေးကောက်ပွဲ အပိုင်း (၂) တွင် ပါဝင်သည့် ကလောမြို့နယ် တွင် အဓိက အားဖြင့် ဓနုပါတီ၊ PNO ပြည်သူ့စစ် ပါတီနှင့် ကြံ့ခိုင်ရေးပါတီတို့ ယှဉ်ပြိုင်ရမည် ဖြစ်သည်။
“ဓနုပါတီက PNO ကို မဲပေးဖို့ ပြောနေတယ်လည်း ကြားတယ်။ အဲလိုဆို PNO နိုင်ရင် စစ်ကြေး (ဆက်ကြေး) ကောက်မှာ၊ စစ်သား ကောက်မှာပေါ့။ အရင်က တခါနှစ်ခါ လာကောက်ဖူးတာရှိတယ်။ အရင်လကတေ့ နောင်ကား ဘောလုံးပွဲကြေး ဆိုပြီး လာကောက်တာရှိတယ်” ဟု လမိုင်းကျေးရွာနေ ဒေသခံ ပအိုဝ်း အမျိုးသား တဉီးက ဆိုသည်။
ကလော လမ်းခွဲမှ ပင်လောင်းမြို့ဘက် သွားရာ လမ်းဘက်တွင် ပအိုဝ်းကျေးရွာ အများအပြားရှိ သဖြင့် PNO သည် ပအိုဝ်းအမျိုးသားရေး ကိုယ်စားပြုသယောင် မဲဆွယ် စည်းရုံးနေသဖြင့် ဒေသခံများ နားယာင်မည်ကို စိုးရိမ်ကြောင်း အောင်ပန်းမြို့ ဒေသခံ နိုင်ငံရေးနှင့် နီးစပ်သည့် ပအိုဝ်း အမျိုးသား တဥ◌ီးက ဆိုသည်။
“အမျိုးသားရေး ဆိုပြီး မဲဆွယ်နေတာ။ ပအမဖ (ပြည်ထောင်စု ပအိုဝ်းအမျိုးသား အဖွဲ့ချုပ်ပါတီ) က ဝင်မပြိုင်တော့ သူတို့ (PNO) က ပအိုဝ်း လူမျိုးတွေကို ကိုယ်စားပြုသလို ပြောနေတာ။ ကျနော်လည်း ပအိုဝ်းပဲ။ ဒါပေမဲ့ PNO လုပ်တာတွေကို ရွံတယ်။ ဒီ အောင်ပန်းမြို့ပေါ်မှာတောင် လူတွေကို အနိုင်ကျင့်တယ်၊ ဆေးရောင်းတယ်၊ လောင်းကစားဝိုင်း ထောင်တယ်။ ငွေရမယ်ဆို အကုန်လုပ်တယ်။ အဲလို အဖွဲ့အစည်းက အမျိုးသားရေး လုပ်တယ် ပြောတော့ လူမျိုး အတွက် ရှက်တယ်” ဟု ၎င်းက ရှင်းပြသည်။
လက်ရှိ စစ်ကောင်စီတပ်နှင့် ပူးပေါင်းနေသည့် PNO သည် ရပ်စောက်၊ တောင်ကြီး၊ ကလော၊ ညောင်ရွှေ စသည့် သျှမ်းတောင် ဒေသတွင် မူးယစ်ဆေး ရောင်းချခြင်း၊ ဆက်ကြေး ကောက်ခံခြင်း၊ မြေယာများ အဓမ္မ သိမ်းစည်းခြင်း စသည်တို့ဖြင့် နာမည်ဆိုးဖြင့် ကျော်ကြားနေသည့် အဖွဲ့ ဖြစ်သည်။
ညောင်ရွှေမြို့နယ်၊ အင်းလေးဒေသတွင် စစ်ကောင်စီနှင့် PNO ပြည်သူ့စစ်က ပြီးခဲ့သည့် ၂၀၂၅ ခုနှစ် အတွင်း ပြည်သူ ၅၀ ထက်မနည်းကို သတ်ဖြတ်ခဲ့ကြောင်း ပြီးခဲ့သည့် ရက်ပိုင်းက အင်းလေး အမျိုးသမီးသမဂ္ဂက ထုတ်ပြန်ထားသည်။
သျှမ်းတောင် စစ်ကောင်စီ ရွေးကောက်ပွဲ ပထမပိုင်းတွင် PNO ပြည်သူ့စစ်ပါတီက တောင်ကြီး၊ လွိုင်လင်၊ ဟိုပုန်း တို့တွင် အနိုင်ရရှိထားရာ လွိုင်လင်မြို့နယ် ကျေးရွာများတွင် PNO ပြည်သူ့စစ်က ဒေသခံများကို ခြိမ်းခြောက် မဲထည့်ခိုင်းခဲ့သည်ဟု သတင်းများလည်း ထွက်ပေါ်နေသည်။
Leave a Comments