သျှမ်းပြည် တာချီလိတ်မြို့ရှိ စစ်ကောင်စီ၏ ပြည်ထဲရေးဝန်ကြီးဌာန လက်အောက်ခံ ရေကြောင်းရဲတပ်ဖွဲ့ခွဲ ဝမ်ပုံစခန်းသို့ တရုတ်သံအမတ်ကြီး သွားရောက်ခဲ့ကြောင်း သတင်းသိရသည်။

မေလ ၂၅ ရက်တွင် မြန်မာ-ထိုင်း-လာအိုနယ်စပ် ရွှေတြိဂံဒေသရှိ တာချီလိတ်မြို့သို့ စစ်ကောင်စီ၏ ဌာနဆိုင်ရာများနှင့်အတူ တရုတ်သံအမတ်ကြီး မစ္စတာ ချန်းဟိုင် အဖွဲ့တို့ သွားရောက်ပြီး လန်ချန်း-မဲခေါင် ပူးပေါင်းဆောင်ရွက်မှု (LMC) ရန်ပုံငွေဖြင့် ဆောင်လုပ်ထားသည့် သျှမ်းပြည်နယ် ရေကြောင်းရဲတပ်ဖွဲ့ခွဲ ဝမ်ပုံစခန်း အဆောက်အအုံကို ကွင်းဆင်းလေ့လာခဲ့ကြောင်း မြန်မာနိုင်ငံဆိုင်ရာ တရုတ်သံရုံးက ယမန်နေ့ (မေလ ၂၇ ရက်)တွင် သတင်းထုတ်ပြန်ထားသည်။

ထို့အပြင် တရုတ်သံအမတ်ကြီး မစ္စတာ Chen Hai နှင့် စစ်ကောင်စီတို့က ကင်းလှည့်ရေး ယန္တရားကို အသုံးပြုပြီး နယ်စပ်ဖြတ်ကျော် ပြစ်မှုကျူးလွန်မှု တိုက်ဖျက်ရေးနှင့် အွန်လိုင်းငွေလိမ် လောင်းကစားပြစ်မှု ကျူးလွန်ခြင်းများကိုလည်း ပူးတွဲတိုက်ဖျက်နိုင်ရန်အတွက် ဆွေးနွေးခဲ့ကြောင်း ထုတ်ပြန်ချက်တွင် ရေးသားထားသည်။

တရုတ်သံအမတ်ကြီး အဖွဲ့တို့သည် တရုတ်နိုင်ငံမှ လှူဒါန်းထားသည့် ရေပေါ်ကင်းလှည့်ယာဉ်ဖြင့် ထိုင်း-မြန်မာ-လာအို နယ်စပ် ရွှေတြိဂံရေပြင်သို့ သွားရောက်ကာ လေးနိုင်ငံ ပူးပေါင်းကင်းလှည့်မှု အခြေအနေကို ကွင်းဆင်းလေ့လာပြီး တရုတ်နိုင်ငံဘက်မှ အခြေစိုက်သည့် ရဲတပ်ဖွဲ့ဝင်များနှင့်လည်း တွေ့ဆုံခဲ့ကြောင်း သိရသည်။

၂၀၁၁ ခုနှစ်တွင် တရုတ်၊ မြန်မာ၊ လာအိုနှင့် ထိုင်း ၄ နိုင်ငံတို့က မဲခေါင်မြစ်ဝှမ်း တရားဥပဒေစိုးမိုးရေးနှင့် လုံခြုံမှု ပူးပေါင်းဆောင်ရွက်ရေးစနစ်ကို ထူထောင်ပြီး လေးနိုင်ငံ ပူးတွဲကင်းလှည့်ရေး လှုပ်ရှားမှုကို ဆောင်ရွက်ခဲ့သည်။

ထိုစဉ်က မဲခေါင်မြစ်ကြောင်းတွင် ကုန်တင်သင်္ဘောများကို ပြန်ပေးဆွဲမှု၊ တရားမဝင် ခိုးဝင်မှုနှင့် မူးယစ်ဆေးဝါးနှင့် လက်နက် မှောင်ခိုရောင်းဝယ်မှု၊ လူကုန်ကူးမှု၊ ပြန်ပေးဆွဲမှုနှင့် ငွေညှစ်မှု စသည့် ပြစ်မှုများ မကြာခဏ ဖြစ်ပွားခဲ့ရာ လက်ရှိအချိန်ထိ မဲခေါင်မြစ်အတွင်း လေးနိုင်ငံ ပူးတွဲကင်းလှည့် လှုပ်ရှားမှုအဖြစ် အကြိမ် ၂၀၀ ကျော် ဆောင်ရွက်ခဲ့ကြောင်း သိရသည်။