သျှမ်းပြည် နမ့်ခမ်းမြို့တွင် အွန်လိုင်းဈေးရောင်းသည့် လင်မယားနှစ်ဦးသည် မြို့တွင်းသို့ ပစ္စည်းသွားပို့စဉ် အမည်မသိ လက်နက်ကိုင်ဆောင်သည့် အဖွဲ့၏ သေနတ်ပစ်ခတ်ခြင်းကို ခံခဲ့ရကြောင်း စုံစမ်းသိရသည်။
ယမန်နေ့ (မေလ ၂၆ ရက်) ည ၈ နာရီခွဲခန့်တွင် နမ့်ခမ်းမြို့၊ ကောင်းနောင်မိုရပ်ကွက်သို့ အွန်လိုင်းဈေးရောင်းသည့် လင်မယားနှစ်ဦး ပစ္စည်းပို့ရန် သွားရောက်စဉ် အမည်မသိ လက်နက်ကိုင်အဖွဲ့မှ ကားမောင်းနှင်လာပြီး သေနတ်ပစ်ခတ်ခဲ့ရာ အမျိုးသမီးကို ကျည်ဆံ ၂ ချက်ထိမှန်ပြီး အသက်အန္တရာယ် စိုးရိမ်ရကြောင်း နမ့်ခမ်းဒေသခံများက ပြောသည်။
“လင်မယားနှစ်ယောက် လမ်းကူးဖို့လုပ်တဲ့အချိန် မိန်းမဖြစ်သူ သေနတ် ၅ ချက်ပစ်ခံရတာ၊ ခါးနဲ့ ခြေထောက်ကို ၂ ချက်ထိတယ်။ ဒီလင်မယားက ဈေးထဲမှာလည်း ဆိုင်ဖွင့်တယ်၊ အွန်လိုင်းမှာလည်း ရောင်းတယ်။ သားသမီးက ၃ ယောက်ရှိတာ၊ အခုတော့ နမ့်ခမ်းဆေးရုံကို ပို့ထားတယ်”ဟု ဖြစ်စဉ်သိရှိသူ နမ့်ခမ်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
နမ့်ခမ်းမြို့မှ ၎င်းလင်မယားနှစ်ဦးသည် Wechat မှတဆင့် မှာယူထားသည့် ပစ္စည်းကို ဆိုင်ကယ်ဖြင့် သွားရောက်ပို့ဆောင်ရာ ကောင်းနောင်မိုရပ်ကွက် အရောက်တွင် ကားတစ်စီးထဲမှ သေနတ်ပစ်ခတ်ပြီး မောင်းနှင်ထွက်ပြေးသွားခဲ့ကြောင်း ဖြစ်စဉ်သိရှိသူများက ပြောသည်။
သေနတ်ပစ်ခံရပြီး ထိခိုက်ဒဏ်ရာရသူမှာ အသက် (၃၆)နှစ် အရွယ်ရှိ အားမွေ (ခေါ်) ယန်ဖုန်းဆိုင် ဆိုသူ အမျိုးသမီးဖြစ်ပြီး မူဆယ်မြို့သို့ ဆေးကုသရန် သယ်ဆောင်သွားလိုသော်လည်း လမ်းခရီးအခြေအနေ မလုံခြုံမှုကြောင့် မသွားရောက်နိုင်ကြောင်း မိသားစုနှင့် နီးစပ်သူများထံမှ သိရသည်။
တအာင်း(ပလောင်) အမျိုးသားလွတ်မြောက်ရေး တပ်မတော် TNLA ထိန်းချုပ်ထားသည့် နမ့်ခမ်းမြို့တွင် ယခုကဲ့သို့ သေနတ်ပစ်ခတ်ခံရမှုသည် ပထမဆုံးအကြိမ် ဖြစ်ပြီး မြို့ပေါ်ရပ်ကွက်များတွင် TNLA တပ်သားများ ကင်းစောင့်ကြပ်နေသော်လည်း ပြည်သူများမှာ လုံခြုံရေးစိုးရိမ်နေကြောင်း ဒေသခံများက ပြောသည်။
“လုံခြုံရေး မရှိဘူးလို့ ပြောရအောင်လည်း ပလောင်စစ်သားတွေက မြို့အဝင်အထွက်နဲ့ ရွာထိပ်တွေမှာ စောင့်နေတာပဲ။ တိုက်ပွဲငြိမ်လာတဲ့နောက်ပိုင်းလည်း မျက်နှာစိမ်းတွေ နမ့်ခမ်းကို ဝင်ထွက်ကြတာ များတယ်။ အများအားဖြင့် တရုတ်တွေ၊ ကိုးကန့်ဘက်ကလား တရုတ်ပြည်မကြီးကလား သေချာမသိရဘူး”ဟု နမ့်ခမ်းမြို့မှ ၎င်းဒေသခံအမျိုးသားက သျှမ်းသံတော်ဆင့်ကို ဆက်ပြောသည်။
ပြီးခဲ့သည့် ဧပြီလ ၁၅ ရက် သင်္ကြန်ကာလအတွင်းကလည်း နမ့်ခမ်းမြို့ TNLA တပ်ဖွဲ့ ဦးဆောင်ပြီး မြို့လယ်ဘုရားကြီး ပွဲတော်ဝင်း(ပန်ပွဲ)ရှိ ဗဟိုမဏ္ဍာပ်စင်အနီးတွင် ပေါက်ကွဲမှုဖြစ်ပွားပြီး လူထိခိုက်မှု မရှိကြောင်း နမ့်ခမ်းဒေသခံများထံမှ သိရသည်။
Leave a Comments