ပင်လောင်းမြို့နယ်တွင် မိုးကြီးလေးပြင်းတိုက်ခက်ခဲ့မှုကြောင့် စစ်ဘေးရှောင်စခန်းမှ အမိုးအကာများပျက်စီးသဖြင့် အကူအညီလိုအပ်နေကြောင်း သိရသည်။

သျှမ်းပြည် ပင်လောင်းမြို့နယ်တွင် စစ်ဘေးရှောင်စခန်းရှိသည့် နောင်တရား၊နောင်ခါ၊ ဆောင်းခါး၊ ပင်ခွန် စသည့်နေရာအချို့တွင် ပြီးခဲ့သည့် မေလ ၁၇ ရက်နှင့် ၁၉ ရက်က မိုးကြီးပြင်းတိုက်ခက်မှကြောင့် အမိုးအကာများပျက်စီးသွားသဖြင့် အမိုးအကာလိုအပ်နေကြောင်း စစ်ဘေးရှောင် ကူညီသူ အမျိုးသားတစ်ဦးက သျှမ်းသံတော်ဆင့်ကို ပြောသည်။

“မိုးတွင်းလည်း ရောက်နေပြီးဆိုတော့ သူတို့နေနေတဲ့ဟာတွေကလည်း မနှစ်ကတည်းကလုပ်ထားတဲ့ဟာလေ အဲ့မိုးကြီးတုန်းက သည်းကြီးတွေလည်း အမိုးတွေက လုံးဝပျက်တယ်။ပျက်စီးတာများတဲ့ဟာကလည်း နောင်တရားကပေ့ါ။ သူတို့တွေကတော့ ရှိတာလေးနဲ့ ပြန်ပြင်ပြီး နေနေရတာပေ့ါ။”ဟု စစ်ဘေးရှောင် ကူညီသူ တစ်ဦးက ပြောသည်။

ပင်လောင်းမြို့နယ်ရှိ နောင်တရားတွင် စစ်ဘေးရှောင်စခန်း နှစ်ခုရှိနေပြီး သပေါင်းကွင်း ၊နောင်တရားဈေးသစ် တို့တွင် စစ်ဘေးရှောင်နေထိုင်ကြကာ စုစုပေါင်းစစ်ရှောင်ဦးရေ ၅၀၀ ဝန်းကျင်ထိ ရှိနေကြောင်း ၎င်းက ဆက်ပြောသည်။

ပင်လောင်းမြို့နယ်ရှိ စစ်ပြေးရှောင်စခန်းများတွင် လက်ရှိစစ်ရှောင်ဦးရေ ခုနစ်ထောင်ကျော် (၇၀၀၀ကျော်) ရှိပြီး စစ်ဘေးရှောင်များအတွက် အလှူရှင်များမရှိသည့်အတွက် ကြုံရာကျပန်းအလုပ်များကို လုပ်ကိုင်နေရပြီး စားနပ်ရိက္ခာများ လိုအပ်နေကြောင်းသိရသည်။