သျှမ်းပြည် သီပေါမြို့နယ်တွင် ဒေသခံတစ်ဦး မြေမြှုပ်မိုင်း နင်းမိပြီး ညာခြေထောက်ပြတ် ဒဏ်ရာရရှိခဲ့ကြောင်း စုံစမ်းသိရသည်။
ယမန်နေ့ (မေလ ၂၂ ရက်) နေ့လယ် ၁၂ နာရီခန့်တွင် သီပေါမြို့ ပန်းတိမ်တောင်ရပ်ကွက်မှ အသက်(၅၀)နှစ် ဝန်းကျင် ရှိ ဦးသန်းဝင်းဆိုသူသည် အလုပ်သွားလုပ်ရန် တုံစင့်ကျေးရွာနှင့် ကုံးစုံကျေးရွာအကြားတွင် ရောက်ရှိစဉ် မြေမြှုပ်မိုင်းနင်းမိပြီး ညာခြေထောက်ပြတ် ဒဏ်ရာနှင့် ဘယ်ဘက်ခြေထောက်တွင်လည်း ဒဏ်ရာရရှိခဲ့ကြောင်း သီပေါဒေသခံများက ပြောသည်။
“အလုပ်သွားလုပ်ဖို့ သွားနေရင်း မိုင်းနင်းမိတာ၊ သူ့ညာဘက်ခြေထောက်ကတော့ ဒူးခေါင်းအောက်ကနေ ပြတ်သွားတာ။ ဘယ်ဘက်ခြေထောက်လည်း မိုင်းစမှန်တာရှိတယ်။ အခုကတော့ လားရှိုးဆေးရုံ ဆက်ပို့ထားတယ်။ ဦးလေးက အသက်လည်းကြီးတော့ ဆေးဖိုးဝါးခ အကူအညီလည်း လိုနေတယ်”ဟု ဖြစ်စဉ်သိရှိသူ သီပေါဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
သီပေါမြို့နယ်တွင် မိုင်းနင်းမိသည့် နေရာသည် သီပေါမြို့ ကုံးစုံရွာအနီးရှိ စစ်ကောင်စီ ခြေလျင်တပ်ရင်း ခလရ-၂၃ အနီးဖြစ်ပြီး တောင်ယာလုပ်ရန်သွားသည့် ဒေသခံများမှာ မကြာခဏ မိုင်းနင်းမိကြောင်း သီပေါဒေသခံများထံမှ သိရသည်။
“ကုံးစုံရွာနားမှာက ခလရ-၂၃ ရှိတယ်။ လမ်းမကြီးဘေးနားတောင် သူတို့မြေမြှုပ်မိုင်း ထောင်ထားတာရှိတယ်။ ကုံးစုံရွာနားလည်း မကြာခဏ မိုင်းနင်းမိတာဆိုရင်လည်း လမ်းသွားရင်း နင်းမိတာပဲ။ အများစုက တောင်ယာလုပ်ဖို့ သွားတဲ့အချိန် နင်းမိတာ။ အခုက သီပေါမှာ ရဲစခန်းပတ်လည်တောင် မိုင်းထောင်ထားတယ်လို့ စာရေးပြီး ကပ်ထားတာ”ဟု သီပေါမြို့မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
အလားတူ ပြီးခဲ့သည့် ဇန်နဝါရီလအတွင်းကလည်း သီပေါမြို့နယ် တုံစင့်ကျေးရွာနှင့် ကုံးစုံရွာအကြားရှိ တောလမ်းတွင် အရပ်သား ၂ ဦး မြေမြှုပ်မိုင်း နင်းမိပြီး ခြေထောက်တစ်ဘက် ဖြတ်လိုက်ရပြီး သီပေါ-နမ္မတူအကြားရှိ မိုးတေတံတား အနီးတွင်လည်း ပစ္စည်းတင်ဆောင်လာသည့် ထော်လဂျီတစ်စီး မိုင်းတက်နင်းမိပြီး ပေါက်ကွဲရာ ယာဉ်မောင်းအမျိုးသားတစ်ဦး ဒဏ်ရာရရှိခဲ့သည်။
သီပေါမြို့နယ်တွင် ၂၀၂၄ နှစ်ဆန်းပိုင်းမှ စ၍ ၅ လအတွင်း မြေမြှုပ်မိုင်းနင်းမိပြီး ထိခိုက်ဒဏ်ရာရရှိသူ (၇) ဦးထက်မနည်း ရှိပြီး အများစုမှာ တောင်ယာနှင့် လမ်းဘေးများတွင် နင်းမိခြင်းဖြစ်ပြီး သက်ဆိုင်ရာလက်နက်ကိုင် အဖွဲ့များအနေဖြင့် လာရောက်ရှင်းလင်းပေးစေလိုကြောင်း ဒေသခံများက ပြောဆိုသည်။
