စစ်ကောင်စီ၏ လေကြောင်းတိုက်ခိုက်မှုကြောင့် ကချင်လွတ်လပ်ရေးအဖွဲ့အစည်း (KIO/ KIA) ၏ဌာနာချုပ်ရှိရာ လိုင်ဇာမြို့သည် ပြာကျသွားပြီဟု ဖြန့်ချိနေလျက်ရှိသည်။

စစ်ကောင်စီဝါဒဖြန့် တယ်လီဂရမ်ချယ်နယ်တစ်ခုဖြစ်သည့် နေပြည်တော်အကောင့်မှ “ လိုင်ဇာပြာကျ ပြီပြောတယ်။ ဒီအချိန်ကတော့တစ်လမ်းဘဲရှိတော့တာ။ မပခနဲ့နယ်မြေအားလုံးသေဆုံး၊ ကျရှုံးတဲ့အထိ အဖြစ်ခံမလား၊ မြစ်ကြီးနား-ရွှေဘိုထိပြာကျခံမလား..”ဟု ရုပ်သံတစ်ခုဖြင့် ဖြန့်ချိထားသည်။

ထိုဝါဒဖြန့်ချိပိုစ့်ကို ကြည့်ရှူ့သူပေါင်း ၉ ထောင်ကျော်ရှိသည်။ အခြားလူမှုကွန်ရက်စာမျက်နှာပေါ်တွင်လည်း ထိုဝါဒဖြန့်ကို ထပ်မံဖြန့်ချိထားသည်ကို တွေ့ရသည်။

မူရင်းလင်ခ့် – https://archive.ph/H9hwA

သျှမ်းသံတော်ဆင့် အချက်အလက်စစ်ဆေးသူများအနေဖြင့် အဆိုပါအကြောင်းအရာကို စစ်ဆေးမှုပြုလုပ်ခဲ့သည်။ ယင်းမှာ မှားယွင်းနေကြောင်း တွေ့ရသည်။

ကချင်ဒေသအတွင်း သတင်းဌာနများနှင့် လွတ်လပ်သည့် သတင်းဌာနများ၏ ဖော်ပြချက်အရ စစ်ကောင်စီအနေဖြင့် ဝိုင်းမော်-လိုင်ဇာလမ်းမပေါ်က တပ်စခန်းများကို လက်လွှတ်ရပြီးသည့်နောက် ကချင်လွတ်လပ်ရေးအဖွဲ့အစည်း (KIO/ KIA) ဌာနာချုပ် လိုင်ဇာအနီးတဝိုက်ကို လေကြောင်းက ဗုံးကြဲတိုက်ခိုက်မှုများ ပြုလုပ်ခဲ့သည်ဟု Myitkyina News Journal တွင် သတင်းတစ်ပုဒ်ဖော်ပြထားသည်။

ဒီလင့်ခ်မှာကြည့်ပါ – https://shorturl.at/6kohA

သို့သော် စစ်ကောင်စီတပ်က အတွဲလိုက်ဒုံးများ၊ လက်နက်ကြီးများအပြင် တရုတ်နယ်စပ်အနီးရှိသော KIA ဌာနချုပ် လိုင်ဇာမြို့ကို လေတပ်ဖြင့် ဗုံးကြဲခဲ့သော်လည်း အထိအခိုက်မရှိခဲ့ကြောင်း Myanmar Now တွင် သတင်းတစ်ပုဒ်ဖော်ပြထားသည်။

ဆက်လက်ဖတ်ရှု့ရန် လင့်ခ်ကိုနှိပ်ပါ – https://shorturl.at/2BdM3

ထို့အပြင် ဖော်ပြထားသည့် ရုပ်သံသည်လည်း စစ်ကောင်စီတပ်က မြစ်ကြီးနားမြောက်ပိုင်းတိုင်းမှ ဝိုင်းမော်ဘက်ကို လက်နက်ကြီးအပြင်းအထန် ပစ်ခတ်သည့်အပြင် ဒရုန်း၊ ဂျက်လေယာဉ်များဖြင့်ပါ ဗုံးကြဲတိုက်ခိုက်နေခြင်း ဖြစ်ကြောင်း ဒေသခံများကိုကိုးကား၍ Kachin News Group သတင်းတစ်ပုဒ်တွင် ဖော်ပြထားသည်။

မူရင်းလင့်ခ်ကိုကြည့်ရန် – https://shorturl.at/iZW8a

စစ်ကောင်စီ၏ လေကြောင်းတိုက်ခိုက်မှုကြောင့် လိုင်ဇာမြို့ပြာကျသွားပြီဆိုသည့်သတင်းနှင့် ပတ်သက်၍ လိုင်ဇာမြို့ဒေသခံ အမျိုးသမီးတစ်ဦးက “မဟုတ်ပါဘူး။ လိုင်ဇာမြို့ပြာမကျပါဘူး။ အဲ့ဒါသတင်းမှားတွေပါ” ဟု သျှမ်းသံတော်ဆင့်ကို အတည်ပြုဖြေကြားထားသည်။

ထို့ကြောင့် စစ်ကောင်စီတပ်၏ တိုက်ခိုက်မှုကြောင့် လိုင်ဇာပြာကျသွားပြီဟု ဖြန့်ချိမှုသည် မှားယွင်းနေသည်။

သျှမ်းသံတော်ဆင့် စာဖတ်ပရိသတ်များအနေဖြင့် လူမှုကွန်ရက် စာမျက်နှာများတွင် ဖော်ပြနေသည့် သတင်းများကို ချက်ချင်းမယုံကြည်ဘဲစိတ်ချရသော သတင်းမီဒီများတွင် သွားရောက်ဖတ်ရှု့ကြရန် တိုက်တွန်းပါသည်။

သတင်းတု၊ သတင်းမှားဟု ယူဆရသည့် သတင်းများကိုလည်း သျှမ်းသံတော်ဆင့် လူမှုကွန်ရက်စာမျက်နှာ (SHAN Burmese Vision ) Facebook Chat Boxမှဆစ်ဆင့် သတင်း၏ လင့်ခ် (သို့မဟုတ်) Screen Short ပုံပေးပို့ခြင်းဖြင့် စစ်ဆေးနိုင်သည်။