Friday, June 14, 2024

နမ့်ဆန် TLEC ဆရာ/မ စွမ်းရည်မြှင့်သင်တန်းဆင်းပွဲသို့ AA ဒုစစ်ဦးစီးချုပ် တက်ရောက်

Must read

သျှမ်းပြည် နမ့်ဆန်မြို့တွင် တအာင်းပြည်ပညာရေးကောင်စီ (TLEC) ၏ ဆရာ/မများ စွမ်းရည်မြှင့်တင်ရေး သင်တန်းဆင်းပွဲသို့ AA ဒုစစ်ဦးစီးချုပ် ဒေါက်တာညိုထွန်းအောင် တက်ရောက်ခဲ့ကြောင်း သတင်းသိရသည်။

ယမန်နေ့ (မေလ ၂၂ ရက်) တွင် နမ့်ဆန်မြို့၌ ကျင်းပပြုလုပ်ခဲ့သည့် တအာင်းပြည်ပညာရေးကောင်စီ (TLEC)၏ တစ်လကြာ ဆရာ/မ စွမ်းရည်မြှင့်တင်ရေး သင်တန်းဆင်းပွဲ အခမ်းအနားသို့ TNLA အထွေထွေအတွင်းရေးမှူး ဗိုလ်ချုပ် တာဘုန်းကျော်နှင့်အတူ AA ဒုစစ်ဦးစီးချုပ် ဒေါက်တာညိုထွန်းအောင်လည်း တက်ရောက်ပြီး အမှာစကား ပြောကြားခဲ့ကြောင်း TNLA သတင်းနှင့်ပြန်ကြားရေးဌာနက ထုတ်ပြန်သည်။

TLEC မှ ဦးစီးကျင်းပသည့် ဆရာ/မ စွမ်းရည်မြှင့်တင်ရေးသင်တန်းကို ပြီးခဲ့သည့် ဧပြီလ ၂၂ ရက်တွင် စတင်ဖွင့်လှစ်ခဲ့၍ တစ်လကြာ သင်တန်းပို့ချပေးခဲ့ကာ အပတ်စဉ် (၃) အထိ နမ့်ဆန်၊ မန်တုံ၊ ကွတ်ခိုင်၊ နမ့်ခမ်း၊ မိုင်းဝီး၊ မိုင်းငေါ့နှင့် မိုင်းလုံ သင်တန်းတည်နေရာ (၇)နေရာဖြင့် ကျင်းပပြုလုပ်ခဲ့ပြီး ဆရာ/မ (၁၃၀၀)ကျော် တက်ရောက်ခဲ့ကြောင်း TLEC ကလည်း သတင်းထုတ်ပြန်ထားသည်။

အဆိုပါ စွမ်းရည်မြှင့်တင်ရေးသင်တန်းသို့ တက်ရောက်ကြသည့် ဆရာ/မ များသည် TLEC စာသင်ကျောင်းတွင် တာဝန်ထမ်းဆောင်နေသူများ အပါအဝင် တာဝန်မထမ်းဆောင်ရသေးသည့် ဆရာ/မ အသစ်များလည်း တက်ရောက်သင်ယူခဲ့ကြောင်း သိရသည်။

အလားတူ “၁၀၂၇ စစ်ဆင်ရေး”အတွင်း TNLA တပ်ဖွဲ့က သိမ်းပိုက်ထားနိုင်သည့် မြို့များတွင် ၂၀၂၄-၂၀၂၅ ပညာသင်နှစ်အတွက် အခြေခံပညာကျောင်းများကို ဇွန်လ (၁၀) ရက်တွင် စတင်ဖွင့်လှစ်သွားမည်ဖြစ်ကြောင်း ဒေသခံများက ပြောသည်။

ကျောင်းအပ်နှံရာတွင် ပညာသင်နှစ် တစ်ခုစာအတွက် ကျောင်းသားတစ်ဦးလျှင် မူလတန်းအဆင့် တစ်သိန်းကျပ်၊ အလယ်တန်းအဆင့် တစ်သိန်းခွဲကျပ်နှင့် အထက်တန်းအဆင့်ကို နှစ်သိန်းကျပ် အဖြစ် ပညာရေးရန်ပုံငွေ ပေးသွင်းရမည်ဖြစ်ကြောင်း TLEC က မေလ ၁၉ ရက်တွင် ထုတ်ပြန်ထားသည်။

TLEC သည် ၂၀၂၃-၂၀၂၄ ပညာသင်နှစ်တွင် စာသင်ကျောင်းပေါင်း (၃၈၁) ကျောင်းကို ဆရာ/မ ဦးရေ (၁၆၀၀) ဖြင့် ဖွင့်လှစ်ခဲ့ပြီး လာမည့် ၂၀၂၄-၂၀၂၅ ပညာသင်နှစ်တွင် ယခင်ပညာသင်နှစ် ကျောင်းအပါအဝင် စာသင်ကျောင်းပေါင်း (၅၀၀) ကျော် ထပ်မံတိုးချဲ့ ဖွင့်လှစ်သွားမည်ဖြစ်ကြောင်း သိရသည်။

Leave a Comments

- Advertisement -spot_img

Latest article