သျှမ်းပြည် မူဆယ်မြို့တွင် ရှေ့နေ အမျိုးသမီး နှစ်ဦးကို အမျိုးသား ၄ဦးက သေနတ်ဖြင့်ချိန်ပြီး ဓားပြတိုက်သွားကြောင်း စုံစမ်းသိရသည်။

သျှမ်းပြည် မူဆယ်မြို့ ယမနေ့ မေလ ၁၈ ရက်နေ့ နေ့လည် ၁ နာရီဝန်းကျင် ဟိုမွန် ၄၅ ကုန်း လမ်းသွယ် ၅ တွင် ကားမောင်းနှင်လာသော အမျိုးသမီးရှေ့နေနှစ်ဦးကို ဓားပြအဖွဲ့ အမျိုးသား လေးဦးက ဓားပြတိုက် လုယက်ခဲ့ကြောင်း မူဆယ်မြို့ ဒေသခံအမျိုးသားတစ်ဦးက သျှမ်သံတော်ဆင့်ကို ပြောသည်။

“ကားအဖြူတစ်စီး သူတို့ရှေ့ကို ပိတ်ရပ်ပြီး အဲ့လူလေး ကားကိုရပ်ခိုင်းတာ။ပြီးတော့ ကားနားလာပြီး မှန်ကို သေနတ်နဲ့ ထုတာ မကွဲဘူး။အဲ့မှ အမျိုးသမီးနှစ်ယောက်က ကြောက်ပြီးမှန်ကိုဖွင့်ပေးလိုက်တော့ သူတို့က ကားပေါ်မှာပါလာတာအကုန် လုယူသွားတာ။ကားပါယူမလို့ပဲ တံခါးက ဖွင့်မရတော့ ထွက်ပြေးသွားတာ။”ဟု မူဆယ်မြို့ ဒေသခံ အမျိုးသားတစ်ဦးက ပြောသည်။

ထိုဓားပြတိုက်လုယက်မှုကြောင့် အမျိုးသမီနှစ်ဦး၏ ရွှေလက်စွပ်၊ ဆွဲကြိုးနှင့် မြန်မာငွေ သိန်း ၃၀တန် ဖုန်း ပါသွားကြောင်း သိရသည်။

မူဆယ်မြို့သည် မြန်မာ – တရုတ် နယ်စပ်ကုန်သွယ်ရေးမြို့ ဖြစ်သည့်အပြင် လက်နက်ကိုင် အဖွဲ့အစည်းများ နှင့် တရားမဝင် လုပ်ငန်းများ စုံလင်ပေါများသည့် ဒေသဖြစ်ပြီး၊ သေနတ်ပစ်ခတ်မှု၊ ဓားပြတိုက်မှုနှင့် ပြန်ပေးဆွဲမှုများလည်း မကြာခဏ ဖြစ်ပွားလေ့ရှိသည်။

လက်ရှိတွင် မူဆယ်မြို့နယ်အတွင်း သွားလာလှုပ်ရှားနေသည့် စစ်ကောင်စီလက်အောက်ခံ ပြည်သူ့စစ်အဖွဲ့များမှာ ကောင်းခါး၊ မြို့မ၊ ပန်းဆေး၊ လုံထန်၊ ပိန်းဆာ၊ မန်ဂျယ်၊ စိန်ကျော့၊ မန်ပြိန်း၊ ရှောက်ဟော်၊ တာမိုးညဲ၊ မုံးပေါ် စသည်ဖြင့် ၁၅ ဖွဲ့ထက်မနည်း ရှိနေသည်။

မတ်လဆန်းမှ စတင်ပြီး မူဆယ်မြို့ရှိ ၎င်းလက်နက်ကိုင် အယောင်ဆောင်အဖွဲ့များက မြို့ပြပျောက်ကြားအဖွဲ့၊ မြို့တွင်းတော်လှန်သော အုပ်စုအဖွဲ့ (MRTTD) နှင့် မူဆယ် PDF အယောင်ဆောင်အဖွဲ့ (MSPDF) စသည့် နာမည်အမျိုးမျိုးဖြင့် မြို့နေလူထုကို အွန်လိုင်းမှ စာပို့ခြိမ်းခြောက် ငွေညှစ်တောင်းခံပြီး လူပြန်ပေးဆွဲမှုများ နေ့စဉ်နီးပါး ဆက်ရှိနေသေးကြောင်း သိရသည်။