သျှမ်းပြည်နယ်တောင်ပိုင်း၊ညောင်ရွှေမြို့နယ်၊စံကားမြို့ရှိ စစ်ရှောင်များအတွက် သယ်လာသည့် ဆန်အိတ်၉၀၀ကို နန်းပန်မြို့ ဂိတ်ရှိ စစ်ကောင်စီတပ်သားများက သိမ်းယူသွားခဲ့ကြောင်း စစ်ရှောင်ကူညီသူများထံမှ သိရသည်။

မေလ၅ရက်နေ့တွင် သိမ်းယူသွားခြင်းဖြစ်ပြီး ယင်းဆန်အိတ်များကို ကမ္ဘာစားနပ်ရိက္ခာ ထောက်ပံ့ရေးအဖွဲ့ (WFP)က စံကားမြို့ရှိ စစ်ရှောင်များအတွက် ကူညီထားကြောင်း သိရသည်။

” လုံးကန်အုပ်စု ကWFP လှူတဲ့ဆန်က ညောင်ရွှေကနေတင်လာတာ နန်းပန်ဂိတ်ကဖမ်းထားတယ်။ကားသမားတော့မဖမ်းဘူး။ သူများလှူတဲ့ဟာ မတရားလုယူတာ “ဟု စစ်ရှောင်အရေး ကူညီပေးနေသူ တစ်ဦးက သျှမ်းသံတောင်ဆင့်ကိုပြောသည်။

စံကားမြို့ဟောင်းဖက် စစ်ရှောင်အများစုသည် ဖယ်ခုံ၊ညောင်ရွှေ၊ပင်လောင်း သုံးမြို့နယ်နယ်စပ်ရှိ ကျေးရွာများမှ ဒေသခံများ ဖြစ်ကြပြီး စုစုပေါင်း လှုဦးရေ တစ်သောင်းနီးပါးရှိကြောင်း သိရသည်။

“ခုက မိုးကျခါစဆိုတော့ ဖျားနာသူများတယ်။ဆေးဝါးလည်း အလုံလောက်မရှိဘူး ဆေးဝါးအရေးပေါ်လိုတယ်။ပြီးရင် စားနပ်ရိက္ခာနဲ့ မိုးကာတွေလည်း လိုအပ်တယ်”ဟု စစ်ရှောင်အမျိုးသမီးတစ်ဦးကပြောသည်။

အဆိုပါ ကိစ္စနှင့်ပတ်သက်ပြီး WFP ကို သျှမ်းသံတော်ဆင့်မှ ကြိုးစားဆက်သွယ်ခဲ့သော်လည်း ဆက်သွယ်မရသေးပေ။

သျှမ်းတောင်တိုက်ပွဲဖြစ်ပွားသည့် သုံးလကျော်အတွင်းတွင်စစ်ဘေးတိမ်းရှောင်ရသူတစ်သိန်းနှင့်အထက်ရှိပြီး ယင်းစစ်ရှောင်များသည် လူသားချင်းစာနာထောက်ထားမှုအကူအညီများ လိုအပ်လျက်ရှိကြောင်း စစ်ရှောင်အရေးအကူအညီ ပေးနေသူများထံမှ သိရသည်။