သျှမ်းပြည် တောင်ပိုင်း ပင်လောင်းမြို့နယ်၊ နန်းတုတ်ကျေးရွာတွင် စစ်ကောင်စီ လက်နက်ကြီးဖြင့်ပစ်ခတ်တိုက်ခိုက်ခြင်းကြောင့် လူနေအိမ်သုံးလုံးနှင့် ကျေးရွာရှိ မီးတိုင်များ ထိမှန်ပျက်စီးခဲ့ရကြောင်း သတင်းရရှိသည်။
မေလ၁၀ရက် နေ့လည် ၂နာရီအချိန်တွင် တိုက်ပွဲဖြစ်ပွားခြင်းမရှိဘဲ ထီရီးလက်နက်ကြီးတပ်မှ ပစ်ခတ်တိုက်ခတ်လာခဲ့ပြီး လူနေအိမ် များကို ထိခိုက်ပျက်စီးပြီးနောက် ရွာသားလည်း ဘေးလွှတ်ရာ ထွက်ပြေးခဲ့ရကြောင်း သိရသည်။
“လူထိခိုက်တာတော့မရှိဘူး။ အိမ်သုံးလုံးနဲ့ မီးတိုင်ထိတယ်။မနေ့က လက်နက်ကြီးအားလုံးပေါင်း ၈ကြိမ် ပစ်ခတ်လာတယ်”ဟု ရွာခံအမျိုးသားတစ်ဦးက သျှမ်းသံတော်ဆင့်ကိုပြောသည်။
စစ်ကောင်စီလက်နက်ကြီး ပစ်ခတ်တိုက်ခိုက်လာခြင်းကြောင်း ရွာသားများ ရွာထဲမနေရဲတော့ဘဲ လုံးကန်ဖက်၊စံကားမြို့ဟောင်းဖက်သို့ ထွက်ပြေး တိမ်းရှောင်ခဲ့ရကြောင်း သိရသည်။
ပြီးခဲ့သည့် မတ်လ၂၂ရက်နေ့တွင်လည်း နန်းတုတ်ရွာကို စစ်ကောင်စီလက်နက်ကြီး၊လေကြောင်းဖြင့် ပစ်ခတ်တိုက်ခိုက်လာခြင်းကြောင့် လူနေအိမ်၅လုံးနှင့် ဆေးပေးခန်းတစ်ခုလည်း ထိခိုက်ပျက်စီးခဲ့ရကြောင်း သိရသည်။
Leave a Comments