သျှမ်းပြည် ကွန်ဟိန်းမြို့နယ် ရှိကျေးရွာတစ်ရွာတွင် မိုးသက်လေပြင်း တိုက်ခက်မှုကြောင့် နေအိမ် ၁၁ လုံးခန့်ပျက်စီးခဲ့ပြီး စေတီ၏ထီးတော် ၃ ဆူ မြေခသွားကြောင်း စုံစမ်းသိရသည်၊
သျှမ်းပြည် ကွန်ဟိန်းမြို့နယ်ရှိ လိုင်းကမ် ကျေးရွာသည် ယမန်နေ့ (ဧပြီလ ၂၃ ရက်) နေ့လည်း ၂ နာရီခွဲ ဝန်းကျင်တွင် မိုးသက်လေပြင်းကျရောက် တိုက်ခက်မှုကြောင့် နာရီဝက်အတွင်း နေအိမ် ၁၁ လုံးပျက်စီးခဲ့ပြီး စေတီ ၃ ဆူ၏ ထီးတော်မြေခ သွားကြောင်း အသက် ၃၀ ဝန်းကျင် ဒေသခံ အမျိုးသားတစ်က သျှမ်းသံတော်ဆင့် ကို ပြောသည်။
“ထီးတော်ကတော့ ၃ ဆူ ပြုတ်ကျ ပျက်စီးသွားတာပေါ့။ ရှိတာကတော့ ၄ ဆူရှိတာ။ပျက်စီးတဲ့ အိမ်းက ၁၁ အိမ် အဲ့ဒါက အမိုးတွေ ဘာတွေ လွှင့်သွားတယ်။ တချို့အိမ်ဆို တခြမ်းလောက်ပါသွားတယ်။ တစ်အိမ်ကတော့ လုံးဝ ပျက်စီးသွားတာ။စပါးကျီ တွေပျက်စီးပြီး ဆန်တွေရေစိုတာတွေလည်း ရှိတာပေ့ါ။ဆန်တွေရေစိုတာက ၈ အိမ်လောက်ရှိတယ်။”ဟု ၎င်းက ပြောသည်။
မိုးသက်လေပြင်းတိုက်ခက်မှုကြောင့် နေအိမ်များ အပြင် လယ်ယာထဲရှိ စိုက်ပျိုးသီနှံအချို့လည်း ပျက်စီးမှု အနည်းငယ်ရှိပြီး မိုးရေစိုသွားသော ဆန်များအတွက်ပါစိုးရိမ်နေရကြောင်း ၎င်းက ဆက်ပြောသည်။
“ရွာက ဆန်ပဲအဓိကလုပ်တာလေ။ စားပါးကျီတွေက အိမ်တိုင်းလိုရှိတယ်။ ရေစိုတဲ့အတိုင်းထားရတော့ မှိုတက်မှာ စိုးရိမ်ရတာ။ ရွာကလူတွေတောင် လန့်တယ်။ခုက ပဲပုတ်လုပ်တဲ့ အချိန်လေ တချို့ ပျက်စီးမှုတွေလည်း ရှိပါတယ်”ဟု ၎င်းက ဆက်ပြောသည်။
ထို လိုင်းကမ်ကျေးရွာသည် ကွန်ဟိန်းမြို့နှင့် ၇ မိုင် ခန့်သာ ဝေးကြောင်းသိရသည်။
ပြီးခဲ့သည့် ( ဧပြီလ ၁၀ )ရက်တွင်လည်း မိုင်းတုံမြို့တွင် မိုးသည်းထန်ရွာပြီး လေပြင်းတိုက်ခတ်မှုများကြောင့် မိုင်းတုံမြို့ရှိမိုင်းစေတီ၊ ဝမ်မိုင် နှင့် စသည့် ဘုန်းကြီးကျောင်း စေတီထီးတော်များ ပြုတ်ကျ ပျက်စီးခဲ့ကာ ပြည်သူနေအိမ်အချို့လည်း ပျက်စီးခဲ့ကြောင်း သိရသည်။
Leave a Comments