သျှမ်းပြည် ကွန်ဟိန်းမြို့နယ် ရွေးကောက်ပွဲအတွက် မဲနံပါတ် (တုံကင်ကတ်) သွားမယူသည့် ဒေသခံများကို စစ်ကော်မရှင် လက်အောက်ခံ အုပ်ချုပ်ရေးမှူးများက အိမ်တိုင်ရာရောက် လိုက်ပေးနေကြောင်း စုံစမ်းသိရသည်။
လာမည့် ဇန်နဝါရီလ (၁၁) ရက်တွင် ပြုလုပ်ကျင်းပမည့် ရွေးကောက်ပွဲ ဒုတိယပိုင်းတွင် သျှမ်းပြည် တောင်ပိုင်း ကွန်းဟိန်းမြို့နယ်လည်း ပါဝင်သည်။
၂၀၂၆ ဇန်နဝါရီလဆန်းပိုင်မှ စပြီး ကွန်းဟိန်းမြို့ နယ် နှင့် ကာလိမြို့တွင် ရွေးကောက်ပွဲအတွက် ကြိုတင်မဲများကို စတင်ထည့်ခိုင်းနေပြီး၊ လာမည့် ဇန်နဝါရီလ (၁၁) ရက်အတွက်ကိုပါ မဲနံပါတ် တုံကင်ကတ်များကို ရပ်ကွက် အုပ်ချုပ်ရေးမှူးများက ရုံးသို့ သွားယူခိုင်းနေကြောင်း သိရသည်။
အဆိုပါ မဲနံပါတ် တုံကင်ကတ်များ သွားမယူသည့် ဒေသခံများကိုလည်း စစ်ကော်မရှင်လက်အောက်ခံ တာဝန်ရှိသူများက အိမ်အထိ လိုက်ပေးပြီး၊ မဲလာပေးရန် အတင်းအဓမ္မ ပြောဆိုသွားကြောင်း ကွန်းဟိန်းမြို့နယ် ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
“မဲပေးရမယ့် အမှတ်နံပါတ် တုံကင်ကတ်ကသွား ယူရတယ်။ကာလိမှာတော့ လာမဲ့ ၁၁ ရက် မဲပေးဖို့ တိုကင်ကတ် သွားမယူရသေးတဲ့ လူကို အိမ်ထိလိုက်ပေးနေတယ်။ ဒီလိုမျိုးတွေ ဆန္ဒမဲနဲ့ မတူတော့ဘူး ဖိအားပေးတာနဲ့ တူသွားပြီ။ အနည်းနဲ့အများတော့ ခြိမ်းခြောက်မှုတွေရှိတာပေါ့။”ဟု ကွန်ဟိန်းမြို့နယ် ဒေသခံအမျိုးသမီးတစ်ဦးက ပြောသည်။
အချို့သောရပ်ကွက်များတွင် မဲရုံစောင့်တာဝန်းကျသူများ၊ သက်ကြီးရွယ်အို နှင့် အတခြားသော မြို့နယ်သို့ ကျောင်းသွားတက်ရမည့် ကျောင်း သူ/သားများက ကြိုတင် မဲများပေးရကြောင်း ၎င်းကပြောသည်။
လက်ရှိ စစ်ကော်မရှင်ကျင်းပသည့် အတုယောင်ရွေးကောက်ပွဲတွင် မဲပေးရန်အသုံးပြုထားသည့် အီလက်ထရောနစ် မဲပေးစက်ကို ကွန်းဟိန်းမြို့နယ်နေ ဒေသခံအချို့ အသုံပြုပုံများကို နာမလည်သေးကြောင်း ကွန်ဟိန်းမြို့နယ် ဒေသခံအမျိုးသမီးတစ်ဦးက ဆက်ပြောသည်။
“ရွာတွေ၊ ကျေးရွာတွေ တောင်မပြောနဲ့ မြို့ပေါ်က လူတွေလည်း အဲ့စက်ကို ဘယ်လိုသုံး ရမလည်းဆိုတာ နားမလည်တာရှိသေးတယ်။ သူတို့ သင်ပြ၊ လုပ်ပြတုန်းကလည်း သွားကြည့်တဲ့လူက အနည်းစုလောက်ပဲရှိတာ။ပြီးခဲ့တဲ့ ရွေးကောက်ပွဲကလို လူတွေက စိတ်မဝင်မှုမရှိဘူး”ဟု ၎င်းက ပြောသည်။
မြန်မာနိုင်ငံတွင် ယခင်က ကျင်းပခဲ့သည့် ရွေးကောက်ပွဲ အဆက်ဆက်တွင် စာရွက်ဖြင့် သမားရိုးကျ မဲပေးနည်းကို အသုံးပြုခဲ့သော်လည်း စစ်ကော်မရှင် ကျင်းပနေသည့် ၂၀၂၅ ရွေးကောက်ပွဲတွင် ပထမဆုံးအကြိမ် အီလက်ထရောနစ် မဲပေးစက်ကို အသုံးပြုလာခြင်း ဖြစ်သည်။
ကွန်ဟိန်းမြို့နယ် မဲဆန္ဒနယ်တွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) နှင့် ရှမ်းနှင့်တိုင်းရင်းသားများ ဒီမိုကရက်တစ်ပါတီ (SNDP ကျားဖြူပါတီ) တို့ ဝင်ရောက်ယှဉ်ပြိုင်ပြီး စုစုပေါင်း မဲရုံ(၄၇)ရုံ ရှိကြောင်း သိရသည်။
Leave a Comments