သျှမ်းပြည် မူဆယ်မြို့တွင် ယနေ့ (ဧပြီ ၂၃)ရက် နေ့လယ်ပိုင်း၌ အမည်မသိလက်နက်ကိုင် အဖွဲ့ ပစ်ခတ်မှုကြောင့် အမျိုးသားတစ်ဦး ကျည်ထိမှန်ကာ သေဆုံးကြောင်း စုံစမ်းသိရသည်။
သျှမ်းပြည် မူဆယ်မြို့ တောင်ရပ်ကွက် ယနေ့ (ဧပြီလ ၂၃ ရက်နေ့) နေ့လည် တွင် အမည်မသိလက်နက်ကိုင် အဖွဲ့မှ ပစ်ခတ်လိုက်သည့် ကျည်သည် လမ်းဘေးတွင် ထမင်းစားနားနေသည့် ကျပန်းအလုပ်သမား အမျိုးသားတစ်ဦးကို ထိမှန်ကာ သေဆုံးသွားပြီး ၎င်း၏
အလောင်းကို ယူဆောင်သွားခဲ့ကြောင်း အကြောင်းသိသည့် မူဆယ်ဒေသခံ အသက် ၄၀ ဝန်းကျင် အမျိုးသာတစ်ဦးက သျှမ်းသံတော်ဆင့်ကို ပြောသည်။
“ကြည့်ရတာ စစ်ကောင်စီနဲ့ စစ်တပ်လက်အောက်ခံတွေက ဓားပြ လုယက်မှုအဖွဲ့ကို လိုက်ဖမ်းကြတာ။ ကားပေါ်ကနေအချင်းချင်း ပစ်ခတ်ကြတာ။ကားနဲ့ လိုက်ဖမ်းပြီးပစ်တာကို ကားမထိပဲ အဲ့လူကို သွားထိတာ။ အဲ့လူကတော့ ကြုံရာကျပန်းလုပ်တဲ့ လူပါ။ ပရဟိတ အဖွဲ့က ဆေးရုံပို့ပြီးတဲ့နောက်မှာ သူ့ အလောင်းက ပစ်ခတ်ခဲ့တဲ့ အဖွဲ့က ဆေးရုံမှာ ပြန်လာယူသွားတယ်။”ဟု ၎င်းအမျိုးသားတစ်ဦးက ပြောသည်။
ထိုသေဆုံးသွားသည့် အမျိုးသားသည် အသက် ၃၀ ဝန်းကျင် ဦးမျိုးဖြစ်ပြီး တောင်ရပ်ကွက်တွင် အိမ်ငှားနေထိုင်သည့်သူဖြစ်ကာ အမျိုးသမီးနှင့် ကလေး ၂ ယောက် ရှိကြောင်းသိရသည်။
မတ်လဆန်းမှ စတင်ပြီး မူဆယ်မြို့တွင် လက်နက်ကိုင် အယောင်ဆောင်အဖွဲ့များက မြို့ပြပျောက်ကြားအဖွဲ့၊ မြို့တွင်းတော်လှန်သော အုပ်စုအဖွဲ့ (MRTTD) နှင့် မူဆယ် PDF အယောင်ဆောင်အဖွဲ့ (MSPDF) စသည့် နာမည်အမျိုးမျိုးဖြင့် မြို့နေလူထုကို အွန်လိုင်းမှ စာပို့ခြိမ်းခြောက် ငွေညှစ်တောင်းခံပြီး လူပြန်ပေးဆွဲမှုများ နေ့စဉ်နီးပါး ဆက်ရှိနေသည်။
