သျှမ်းပြည် မူဆယ်မြို့တွင် UID ခေါ် စမတ်ကတ်များ ပြုလုပ်ရန် ဒေသခံပြည်သူ ထောင်နှင့်ချီ တုံကင်အလုအယက် စောင့်ဆိုင်း၍ ပြုလုပ်နေရကြောင်း စုံစမ်းသိရသည်။

ပြီးခဲ့သည့် ဧပြီလ ၄ ရက်နေ့က စစ်ကောင်စီလက်အောက်ခံ လူဝင်မှုကြီးကြပ်ရေး လဝက မှ အိမ်နီးချင်းနိုင်ငံ တရုတ်၊ အိန္ဒိယနှင့် ထိုင်းနိုင်ငံသို့ နယ်စပ်ဖြတ်ကျော် ဝင်ထွက်သွားလာခွင့်အတွက် UID ခေါ် စမတ်ကတ်ပါမှသာ ယာယီနယ်စပ်ဖြတ်ကျော်ခွင့် (TBP/BP) လက်မှတ်များကို ထုတ်ပေးမည်ဟု ကြေညာခဲ့သည်။

၎င်းနောက်တွင် မူဆယ်ခရိုင် လူဝင်မှုကြီးကြပ်ရေး လဝက မှ မူဆယ်နှင့် နမ့်ခမ်းမြို့နယ်ရှိ ပြည်သူများကို မူဆယ်မြို့ ငွေဆင်အိမ်ယာတွင် UID ခေါ် စမတ်ကတ် ပြုလုပ်ပေးလျက်ရှိရာ တုံကင်ရရှိရန် လူထောင်နှင့်ချီ အလုအယက် စောင့်ဆိုင်း၍ ပြုလုပ်နေရကြောင်း မူဆယ်ဒေသခံများက ပြောသည်။

“သင်္ကြန်နောက်ပိုင်း တရုတ်ပြည်ထဲ ပြန်ဝင်ဖို့ဆိုတော့ စမတ်ကတ် မပါရင်လည်း မရတော့ဘူးလေ။ မူဆယ်၊ နမ့်ခမ်းအပြင် တခြားမြို့နယ်က လူတွေကိုလည်း တစ်နေရာတည်း လုပ်ပေးတော့ အခက်အခဲ ဖြစ်တယ်။ မူဆယ်ကတော့ စာအုပ်အနီလုပ်လည်း တန်းစီရ၊ အခု စမတ်ကတ်လုပ်တော့လည်း တန်းစီရနဲ့ လဝက တွေ ဂွင်ဖန်လုပ်စားနေပြီးတော့ စီမံခန့်ခွဲမှု လုံးဝကို ညံ့တယ်”ဟု မူဆယ်မြို့မှ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

မူဆယ်မြို့တွင် ယမန်နှစ် စက်တင်ဘာလမှ စတင်ပြီး စစ်ကောင်စီ လဝက မှ ရှေ့ပြေး လူဦးရေစာရင်း ကောက်ယူခြင်းနှင့် UID ခေါ် စမတ်ကတ်ကို စတင်လုပ်ဆောင်ပေးခဲ့ပြီး “၁၀၂၇ စစ်ဆင်ရေး”ကာလအတွင်း ရပ်နားထားခဲ့ရကာ ပြီးခဲ့သည့် မတ်လ လယ်ခန့်မှ စတင်ပြီး မူဆယ်နှင့်နမ့်ခမ်း လဝက ဝန်ထမ်းများ စုပေါင်းပြီး ပြန်လည်လုပ်ဆောင်လာကြောင်း ဒေသခံများထံမှ သိရသည်။

“အရင်တုန်းကတော့ A4 စက္ကူဖြတ်ပိုင်းနဲ့ ရတာပေါ့၊ အခုကျတော့ ကတ်ထူနဲ့ ထုတ်ပေးတာ ၁ ခုကို တစ်သောင်းခွဲ ပေးရတယ်။ သွားလုပ်ရတာလည်း တုံကင်ယူထားတုန်းပဲ ရှိသေးတယ်။ တချို့တွေဆို တုံကင်နံပါတ်က ဝါဆိုလလောက်အထိ ချိန်းတာတွေ ရှိတယ်။ ဒီလိုပုံစံနဲ့ဆို နယ်စပ်မှာ ရှာစားရတာလည်း တဖြည်းဖြည်း ခက်လာပြီ”ဟု မူဆယ်မြို့မှ ၎င်းအမျိုးသားက သျှမ်းသံတော်ဆင့်ကို ဆက်ပြောသည်။

စစ်ကောင်စီကလည်း မေလ ၁ ရက်နေ့မှ စတင်ပြီး UID ခေါ် စမတ်ကတ်ပါမှသာ နယ်စပ်ပေးဖြတ်မည်ဟု ထုတ်ပြန်ထားခြင်းကြောင့် သင်္ကြန်ကာလနောက်ပိုင်း တရုတ်ပြည်သို့ အလုပ်သွားရောက် လုပ်ကိုင်ရန် မဖြစ်မနေ လိုအပ်လာခြင်းဖြစ်ကြောင်း မူဆယ်ဒေသခံများက ပြောသည်။

နယ်စပ်ရှိ လူအဝင်အထွက်ကို ထိန်းချုပ်လိုသည့် စစ်ကောင်စီ၏ ဧပြီလ ၄ ရက် ထုတ်ပြန်ချက်အရ တစ်ဘက်နိုင်ငံသို့ သွားရောက်လိုသူများအနေဖြင့် ယာယီနယ်စပ်ဖြတ်သန်းခွင့် (TBP/BP) လက်မှတ်များ လျှောက်ထားရာတွင် မိမိမှတ်ပုံတင် မူရင်းနဲ့အတူ UID ခေါ် စမတ်ကတ် စာရွက်ပါ တစ်ပါတည်း ယူဆောင်သွားရမည်ဖြစ်သည်။
အလားတူ နိုင်ငံကူးလက်မှတ် ပက်စ်ပို့ ပြုလုပ်ရာတွင်လည်း UID ခေါ် စမတ်ကတ် စာရွက်ပါရှိမှသာ ပြုလုပ်ပေးတော့ကြောင်း သိရပြီး တာချီလိတ်မြို့တွင် လေဆိပ်၌ ခရီးသွားမည့်သူများကို မှတ်ပုံတင်မိတ္တူများ တောင်းယူ၍ စမတ်ကတ် မလုပ်ရသေးသူများကို တစ်ခါတည်း လုပ်ဆောင်ပေးနေကြောင်း ဒေသခံများက ပြောဆိုသည်။

စစ်ကောင်စီလက်အောက်ခံ လူဝင်မှုကြီးကြပ်ရေး လဝက မှ လက်ရှိပြုလုပ်ပေးနေသည့် UID (Unique Identity Number) ခေါ် စမတ်ကတ် သည် နိုင်ငံအတွင်း နေထိုင်သည့် အသက် (၁၀)နှစ်အထက် ရှိသူများကို အီလက်ထရောနစ် စနစ်ဖြင့် ဇီဝအချက်အလက် အပါအဝင် ကိုယ်ရေးအချက်အလက်များကို ကောက်ယူမှတ်ပုံတင်ပြီး ဂဏန်း (၁၀)လုံး ပါရှိသည်။