သျှမ်းပြည် လားရှိုးမြို့ရှိ စစ်ဘေးရှောင် လူဦးရေ ရှစ်ရာ (၈၀၀) ကျော် အတွက် စားနပ်ရိက္ခာ လိုအပ်နေကြောင်း စုံစမ်းသိရသည်။
သျှမ်းပြည် သိန္နီမြို့မှ လားရှိုးမြို့ ဘုန်းကြီးကျောင်းများသို့ ၂၀၂၃ နိုဝင်ဘာလ မှစ၍ ယခုအချိန် ၅ လ အတွင်း စစ်ဘေးတိမ်းရှောင်လာသူ ရှစ်ရာကျော်အတွက် အလှူရှင်နည်းပါးလာသဖြင့် စားနပ်ရိက္ခာလိုအပ်နေကြောင်း စစ်ဘေးရှောင်ကူညီသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
“တစ်ရက်ကို ဆန်က ၄ အိတ်လောက်ကုန်တယ်။ဟင်းဖိုးကျတော့ ကုန်ကျစာရိတ်က ၇ သိန်းကျော်လောက်ပေါ့။ ၃ နပ်ဆိုရင် ၃၁ သိန်းလောက်ပေါ့။လူ ထောင်ချီတုန်းကဆိုရင် တရက်ကို ဆန် ၁၈ အိတ်။ ၃ နပ်စာ ဆိုရင် သိန်း ၅၀ ကျော်တယ်။အခုကျတော့ ရေရှည်ဆိုတော့ အလှူရှင်တွေကလည်း သိပ်မရှိတော့ဘူး။ စားနပ် ရိက္ခာတွေ လည်းလိုနေတာပေါ့ ” ဟု စစ်ဘေးရှောင်ကူညီသူတစ်ဦးက ပြောသည်။
စစ်ဘေးရှောင် ရှစ်ရာကျော်သည် လားရှိုးမြို့ ကန်မိန်းကျောင်းတွင် စစ်ဘေးရှောင် လူဦးရေ ၃၀၀ ကျော် ၊ မန်ဆူရှမ်းကျောင်းတွင် စစ်ဘေးရှောင်လူဦးရေ ၅၀၀ ကျော် အထိ ကျန်ရှိနေကြာင်းသိရသည်။
ထိုပြင် တိုက်ပွဲများ ငြိမ်းသွားသော်လည်း စစ်ဘေးရှောင်များသည် ဘုန်းကြီးကျောင်းများတွင် ခိုလှုံနေကြကာ အများစုသည် နေရပ်ပြန်ရန် ခက်ခဲနေခြင်း၊ နေအိမ်များ မီးလောင်ပျက်စီး ဆုံးရှုံးမှုကြောင့် နေရပ်ကို မပြန်နိုင်ကြကြောင်း သိရသည်။
၂၀၂၃ အောက်တိုဘာ နောက်ဆုံးပတ်မှ စတင်ခဲ့သည် စစ်ကောင်စီ နှင့် ညီနောင်မဟာမိတ်တို့၏ “၁၀၂၇ စစ်ဆင်ရေး”အတွင်း သိန္နီမြို့ပေါ်နှင့်ကျေးရွာ ၁၀ရွာကျော်မှ ဘာသာရေးအဆောက်အဦးနှင့် နေအိမ် ၆၀၀ ထပ်မနည်း ပျက်စီးခဲ့သည်။
နေအိမ်များသည် မီးလောင်ခြင်း၊လက်နက်ကြီး၊ငယ်နှင့် လေယာဉ် ဖြင့် ဗုံးကြဲတိုက်ခိုက် မှုများကြောင့် ပျက်စီးသွားခဲ့ရပြီး ပြည်သူများအတွက် မည်သည့် တပ်ဖွဲ့၊ တာဝန်ရှိ အဖွဲ့အစည်းမှ ကူညီဆောင်ရွက်မှုမရှိသေးကြောင်း ဒေသခံများကပြောသည်။
