Wednesday, May 22, 2024

သျှမ်းတောင် တိုက်ပွဲ ၃ လ အတွင်း အရပ်သား ၆၀ ကျော်သေဆုံး

Must read

သျှမ်းပြည် တောင်ပိုင်း ပအိုဝ်းအမျိုးသားလွတ်မြောက်ရေးတပ်မတော် (PNLA) မဟာမိတ် ပူးပေါင်း တော်လှန်‌ရေး တပ်ပေါင်းစုများ နှင့် စစ်ကောင်စီ တို့အကြား ၃ လအကြား တိုက်ပွဲဖြစ်ပွားမှုကြောင့် အရပ်သား ၆၀ ကျော် သေဆုံး ပြီး ထိ ခိုက်ဒဏ်ရာရှိသူ ၇၈ ဦး အထိ ရှိနေကြောင်း စုံစမ်းသိရသည်။

တိုက်ပွဲ ၃ လအကြာ စစ်ကောင်စီမှ လေကြောင်းတိုက်ခိုက်ခြင်း နှင့် လက်နက်ကြီးထိမှန်မှုကြောင့် ၆ လသားမှ ၁၀ နှစ်အတွင်းရှိ ကလေးငယ် ၇ ဦးနှင့် အသက် ၁၅ တစ်ဦး၊ အမျိုးသား(၄၃)ဦး သေဆုံးပြီး၊ အမျိုးသမီး ၄ဦး နှင့် အတည်မပြုနိုင်သည့် အလောင်း ၆လောင်း စုစုပေါင်း ၆၁ ဦး သေဆုံးခဲ့ကြောင်း ပအိုဝ်းလူငယ်အစည်းအရုံး (PYO) မှ ထုတ်ပြန် ထားသည်။

ထို့အတူ တိုက်ပွဲများကြောင့် ဆီဆိုင်မြို့နယ်ရှိ ဒေသခံများ စစ်ဘေးရှောင်နေသူ ၅သောင်းနှစ်ထောင်ကျော်၊ ပင်လောင်းမြို့နယ်တွင် တစ်သောင်းခွဲ ၊ ဟိုပုံးမြို့နယ်တွင် တစ်ထောင် နှင့် ညောင်ရွှေမြို့နယ်တွင် ၂ထောင်တစ်ရာကျော် စုစုပေါင်း ခုနစ်သောင်းကျော်အထိရှိလာကြောင်း PYO ထုတ်ပြန်ချက်တွင်ရေးသားထားသည်။

ထိုစစ်ဘေးရှောင်များသည် ဟိုပုံးမြို့နယ်၊ တောင်ကြီးမြို့နယ်၊ ညောင်ရွှေမြို့နယ်နှင့် တောတောင်အတွင်း ထွက်ပြေးခိုလှုံနေရကြောင်း သိရသည်။

ညောင်‌ရွှေမြို့နယ် ကျေးရွာ ၄ ရွာခန့်ရှိ စစ်ဘေးရှောင် ၂ ထောင်ကျော်သည် ဧပြီလ ပထမ ပတ်မှစ၍ စစ်ကောင်စီ၏ လက်နက်ကြီးပစ်ခက်မှု မြင့်တက်လာမှုကြောင့် ကလေးငယ်နှင့် သက်ကြီးရွယ်အိုများကို ဘေးလွတ်ရာသို့ ပြောင်း‌‌ရွေ့ပေးရကြောင်း ပအိုဝ်းလူငယ် အစည်းအရုံး တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။

“ညောင်ရွှေဘက် ကတော့ စစ်ကောင်စီနဲ့ တော်လှန်ရေးအဖွဲ့တွေနဲ့ တိုက်ပွဲ ဖြစ်လို့ နမ့်ပွန်၊ညောင်လေးပင်၊ဒီရိ၊ ရေပူရယ်‌ပေါ့။ အဲ့ဖက်ကတော့ ကလေးနဲ့ လူကြီးတွေကို အဓီက ပြောင်းရွှေ့ထားပေးရတာပေါ့။ စစ်ကောင်စီ ဘက်က လက်နက်ကြီး ဖြစ်ခက်မှုများတာကို။စစ်ရှောင်တွေက အဓိကတော့ စားနပ်ရီက္ခာလိုအပ်နေတာပေါ့” ဟု ၎င်းက ပြောသည်။

ထိုအပြင် လက်နက်ကြီးနှင့် လေကြောင်းတိုက်ခိုက်မှုကြောင့် ထိခိုက် ဒဏ်ရာရရှိသူ ကလေးငယ် ၁၂ ဦး၊ အမျိုးသား ၃၉ ဦး ၊ အမျိုးသမီး ၁၆ ဦး နှင့် ကျား/မ အတည်မပြုနိုင်သူ ၁၁ ဦး ထိ ရှိနေကြောင်း သိရသည်။

တိုက်ပွဲဖြစ်ပွားချိန်မှစ၍ စစ်ကောင်စီသည် လေကြောင်းဗုံးကြဲတိုက်ခိုက်မှု ၄၆၂ ကြိမ်နှင့် အထက်ရှိပြီး၊ လက်နက် ကြီး ပစ်ခတ်မှု ၂၈၄၆ ကြိမ် ပြုလုပ်ခဲ့ကြောင်း ပအိုဝ်းလူငယ်အစည်းအရုံးက ဧပြီလ ၁၆ ရက် နေ့တွင်း ထုတ်ပြန် ထားသည်။

အဆိုပါ စစ်ကောင်စီ၏ လက်နက်ကြီး၊ လေကြောင်းတိုက်ခိုက်မှုများကြောင့် ဒေသခံနေအိမ် ၅၅၂ လုံး ပျက်စီးသွားပြီး ဘာသာရေးအဆောက်အအုံ ၂၅ ဦး၊ စာသင်ကျောင်း ၁၂ လုံး၊လမ်းတံတား ၂ စင်း၊‌ဆေးရုံ/ဆေးခန်း ၄ လုံးနှင့် ဈေး ၁ ခု ပျက်စီးသွားခဲ့ပြီဖြစ်ကြောင်းလည်း ထုတ်ပြန်ချက်၌ ရေးသားဖော်ပြထားသည်။

ဟိုပုံးမြို့နယ် စံဖူးကျေးရွာတွင် ဖြစ်ပွားခဲ့သည့် PNLA ၏ ယာဉ်တန်းကို စစ်ကောင်စီနှင့်လက်အောက်ခံ ပအိုဝ်းပြည်သူ့စစ် PNO အဖွဲ့တို့က ပစ်ဆို့ဟန်းတား စစ်ဆေးမှုကြောင့် (ဇန်နဝါရီလ ၂၁ ရက်)တွင် နှစ်ဖက်တပ်ဖွဲ့ကြား တိုက်ပွဲစတင် ဖြစ်ပွားခဲ့ခြင်းဖြစ်သည်။

Leave a Comments

- Advertisement -spot_img

Latest article